އައްޑޫ ސިޓީން ކުޑަކުއްޖަކު ހިމަބިއްސަށް ޕޮޒިޓިވްވުމާ ގުޅިގެން ކޮމިއުނިޓީ ސާވޭއެއް ހަދައި 19 މީހަކަށް ވެކްސިން ދީފި އެވެ.
އެޗްޕީއޭ އިން ނެރުނު ބަޔާނެއްގައި ބުނެފައިވަނީ އެ ކޭސްއާ ގުޅިގެން މިހާތަނަށް 65 މީހެއް ކޮންޓެކްޓުންގެ ގޮތުގައި ފާހަގަ ކުރެވިފައިވާ ކަމަށާއި ނަމަވެސް އެކަކުގެ ގައިންވެސް ބަލީގެ އަލާމާތެއް ނުފެންނަ ކަމަށެވެ.
"މީސަލްސް އަށް ޕޮޒިޓިވްވީ ފަރާތާއި ކޮންޓެކްޓުންގެ ގޮތުގައި ދެނެގަނެވިފައިވާ ހުރިހާ ފަރާތްތަކަކީވެސް މީސްލްސް ވެކްސިން ފުރިހަމަ ކޮށްފައިވާ ފަރާތްތަކެވެ." އެޗްޕީއޭ އިން ބުނެ އެވެ.
އެޗްޕީއޭ އިން ބުނި ގޮތުގައި މީސްލްސް ވެކްސިންގެ ދެ ޑޯޒް ފުރިހަމަ ކޮށްފައިނުވާ މީހުން ބެލުމަށް ކުރިއަށް ގެންދިޔަ ކޮމިއުނިޓީ ސާވޭގެ ތެރެއިން 41 މީހެއްގެ މަައުލޫމާތު ސާފުކޮށްފައި ވެ އެވެ. އޭގެ ތެރޭގައި 16 ގެއަކާއި އެއް ފިހާރަ ހިމެނެ އެވެ. ސާވޭއަށް ފަހު 19 މީހަކަށް ވަނީ ވެކްސިން ދީފަ އެވެ.
ހިމަބިއްސަކީ ރާއްޖޭން ނައްތާލާފައިވާ ބައްޔެއް ކަމަށްވާއިރު އެޗްޕީއޭ އިން ވަނީ މި ބަލީގެ އެންމެ ކޭހެއް ފެނުނަސް ބެލެވޭނީ އައުޓްބްރޭކެއްގެ ގޮތުގައި ކަމަށް ބުނެފަ އެވެ.
ހިމަބިހީގެ މައިގަނޑު އަލާމާތްތައް:
– ހުން އައުން
– ހަމުގައި ރަތް ބިހިތަކެއް ނެގުން
– ކެއްސުން، އަރިދަފުސް ފޭބުން އަދި ލޯ ރަތްވުން ފަދަ އަލާމާތްތައް ވެސް ބައެއް މީހުންގެ ފަރާތުން ފެނުން އެކަށީގެންވޭ