މީގެ 20 އަހަރު ކުރިން ސައިނަސް ތެރެއަށް ދިޔަ ދަތުގެ އެތިކޮޅެއް އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ނަގައިފި އެވެ.
އޭއީއެއްޗް މިކަން ހާމަކޮށް ބުނެފައިވަނީ މީގެ ވިހި އަހަރު ކުރިން މާލޭ ހޮސްޕިޓަލަކުން ދަތެއް ނެގުމުގެ ތެރޭގައި ސައިނަސް ތެރެއަށް ދިޔަ ދަތުގެ އެތިކޮޅެއް އެންޑޯސްކޮޕީ މެދުވެރިކޮށް ނަގާފައިވާ ކަމަށެވެ. މިއެތި ކޮޅު ނަގާފައިވަނީ އޭއީއެޗްގެ އީއެންޓީ ސާޖަނުންގެ ޓީމަކުންނެވެ. މި ސާޖަރީއަށް ގާތްގަނޑަކަށް ދޮޅު ގަޑިއެއް ހާއިރު ނެގިއިރު ސާޖަރީ ކަމީޔާބު ކަމަށާއި ބަލި މީހާގެ ހާލުވެސް ރަނގަޅު ކަމަށް އޭއީއެޗްއިން ބުނެއެވެ.
މިއީ އެންޑޯސްކޮޕީ މެދުވެރިކޮށް އޭއީއެޗްގައި މިފަދަ ސާޖަރީއެއް ކުރެވުނު ފުރަތަމަ ފަހަރު ކަމަށް އެހޮސްޕިޓަލުން މައުލޫމާތު ދެއެވެ.
އޭއީއެޗް އިން ޚިދުމަތް ދޭން ފެށި ފަހުން ދަނީ ބޮޑެތި ކުރިއެރުންތަކެއް ހޯދަމުންނެވެ. އެގޮތުން މިހާރު ވެސް ގިނަ ސާޖަރީތަކެއް ކުރެވޭކަން އެ ހޮސްޕިޓަލުން ފާހަގަ ކުރެއެވެ. އެގޮތުން ލެޕްރޮސްކޯޕިކް ކޮލެސިސްޓެކްޓޮމީ އާއި، ހިސްޓެރެކްޓޮމީއާއި ކަކުލު ހުޅު ބަދަލުކުރުން ފަދަ ސާޖަރީތައް މިހާރު ދަނީ ކުރެވެމުން ކަމަށް އެ ހޮސްޕިޓަލުން ބުނެ އެވެ.