ފިތުރު އީދު ވާނީ އަންނަ ހުކުރު ދުވަހަށް ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
އީދު ވާނީ ކޮން ދުވަހަކުތޯ ޓްވިޓާގައި މީހަކު ސުވާލުކުރުމުން މައުމޫން ވިދާޅުވީ ފަލަކީ ހިސާބުން ދައްކާ ގޮތުގައި އީދު ވާނީ ހުކުރު ދުވަހަށް ކަމަށެވެ.
Falaki hisaabun dhahkaa gothugai eid vaanee hukuru dhuvahah.
— Maumoon Abdul Gayoom (@maumoonagayoom) April 17, 2023
މި އަހަރުގެ ފިތުރު އީދު ނަމާދުގެ ބޮޑު ޖަމާއަތް މާލެ ސަރަހައްދުގައި އޮންނާނެ ކަމަށް އިސްލާމިކް މިނިސްޓްރީން ވަނީ ބުނެފަ އެވެ.
އިސްލާމިކް މިނިސްޓްރީން ބުނި މާލޭގައި ބޮޑު ޖަމާއަތް އޮންނާނީ މާފަންނު ސްޓޭޑިއަމާއި އިސްލާމީ މަރުކަޒާއި މައިދާން ސަރަޙައްދާއި ސަލްމާން މިސްކިތާއި މާބްލް ސަރަޙައްދުގައި ކަމަށެވެ. ހުޅުމާލޭގައި ބޮޑު ޖަމާއަތް އޮންނާނީ ހުޅުމާލެ ފޭސް 1 ގެ ސިންތެޓިކް ޓްރެކާއި ހުޅުމާލެ ފޭސް 2ގެ ކްރިކެޓް ސްޓޭޑިއަމްގަ އެވެ. އަދި ވިލިމާލޭގައި ބޮޑު ޖަމާއަތް އޮންނާނީ އެ އަވަށު ފުޓްބޯޅަ ދަނޑުގަ އެވެ.
ބޮޑު ޖަމާޢަތުގައި ޢީދު ނަމާދުކުރުމަށް ނިންމި ނަމަވެސް މޫސުން ތަން ނުދޭ ނަމަ ހުކުރުކުރާ ހުރިހާ މިސްކިތެއްގައި ވެސް ޢީދު ނަމާދުކުރާނެ ކަމަށް މިނިސްޓްރީން ބުންޏެެވެ.
އީދު ނަމާދަށް ދާ އިރު ސަމާލުކަން ދޭންވީ ކަންތައްތައް:
* ކޮންމެ މީހަކު ވެސް ގެއިން ވުޟޫކޮށްގެން ދިއުން
* އަމިއްލަ މުޞައްލައެއް ގެންދިއުން
* އަމިއްލަ ފެންފުޅިއެއް ގެންދިއުން
* ފައިވާންލާނެ ޕްލާސްޓިކް ނޫން ކޮތަޅެއް ގެންދިއުން
މާލޭގެ އިތުރުން ރާއްޖޭގެ ވަރަށް ގިނަ ހިސާބުތަކުގައި ވެސް މިހާރު އީދު ނަމާދު ކުރަނީ ބޮޑު ޖަމާއަތުގަ އެވެ.