މި ރަމަޟާން މަހު ފިތުރު ޒަކާތް ދެއްކުމަށް ވީހާވެސް ގިނަ ފަރާތްތަކަށް ފުރުސަތު ދިނުމުގެ ގޮތުން މިއަދު އިރު އޮށްސި 6:00 ޖެހުމާއި ހަމައަށް ބަނޑޭރި ޕޯޓަލް މެދުވެރިކޮށް ޒަކާތް ބަލައިގަންނާނެ ކަމަށް އިސްލާމިކް މިނިސްޓްރީން ބުނެފިއެވެ.
އެމިނިސްޓްރީން ބުނީ، ރަމަޟާންމަސް ފެށުމާއިއެކު ފިޠުރު ޒަކާތް ބަލައިގަންނަން ފަށާފައިވާއިރު އޮންލައިން އެކި ޕްލެޓްފޯމްތަކުން ދިޔައީ ޒަކާތް ބަލައިގަންނަމުން ކަމަށެވެ. ނަމަވެސް ބަނޑޭރިޕޭ ފިޔަވައި އޮންލައިންކޮށް ޒަކާތްދެއްކުން 27 ރަމަޟާން ގައިވަނީ މެދުކަނޑާލާފައިވާ ކަމަށް މިނިސްޓްރީން ބުނެއެވެ.
ބަނޑޭރި ޕޭއި އަކީ ސަރުކާރު އިދާރާތަކަށް ފައިސާ ބަލައިގަންނަ މައި ޕޯޓަލްއެވެ. މި ޕޯޓަލް މެދުވެރިކޮށް ފިތުރު ޒަކާތް ދެއްކުމަށް އިސްލާމިކް މިނިސްޓްރީ ނަގާފައި ޕޭމެންޓް ޑީޓެއިލްގައި ފިތުރު ޒަކާތް ޙިޔާރުކުރައްވައި ޒަކާތް ދައްކާ ފަރާތްތަކުގެ މައުލޫމާތު ފުރުމަށް ޒަކާތް ދެއްކުމަށް ކުރިއަށް ދެވޭނެއެވެ.
އަދި ފައިސާއިން ޒަކާތް ބަލައިގަތުން ރަމަޟާން މަހުގެ ފަހު ދުވަހު 17:30 އާއި ހަމައަށް މިނިސްޓްރީގެ ހޯލުގައި އޮންނާނެ ކަމަށް މިނިސްޓްރީން ބުނެއެވެ. މީގެ އިތުރުން ގޮވާމުން ފިޠުރު ޒަކާތް ދެއްކުން ކުރިއަށްދާނީ މިރޭ 22:30އާ ހަމައަށް މަޖީދިއްޔާ ސްކޫލްގެ ޞަލާޙުއްދީން ހޯލުގައި ކަމަށް މިނިސްޓްރީން މައުލޫމާތު ދެއެވެ.