އައްޑޫގައި ބިނާކުރަން ހަމަޖެހިފައިވާ އިސްލާމީ މަރުކަޒު އިމާރާތްކުރަން ހަމަޖެހިފައިވާ ބިން ސާފު ކުރުމުގެ މަސައްކަތް ފަށަައިފި އެވެ.
އެތަން އިމާރާތް ކުރަން ހަމަޖެހިފައި ވަނީ ހިތަދޫގައި ކުރިން ޕޮލިސް ޓްރެއިނިން ސްކޫލް ހިންގި ބިމުގަ އެވެ. ފެބްރުއަރީ 7، 2012 ގައި އައްޑޫގައި ހިންގި "ބޮޑު ހުޅު" ހާދިސާގައި ޓްރޭނިން ސްކޫލްގައި ރޯކޮށްލައި އަޅި އަށް ހަދާލި ފަހުން އެ ބިން އޮތީ އެއްވެސް ކަމަކަށް ބޭނުން ނުކޮށެވެ.
އެހެންވެ އިސްލާމީ މަރުކަޒު އަޅަން އެ ބިން ހަމަޖައްސާފައިވާތީ އެތަން ސާފުކުރުމުގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށް ހިތަދޫ ކޮރަވަލު ދާއިރާގެ ކައުންސިލަރު އިބްރާހީމް ޝިނާޒް މިއަދު ކުރެއްވި ފޭސްބުކް ޕޯސްޓެއްގައި ވިދާޅުވި އެވެ.
އައްޑޫ އިސްލާމީ މަރުކަޒު އިމާރާތްކުރަން ހަވާލުކޮށްފައި ވަނީ ފިޑޯ ޕްރައިވެޓް ލިމިޓެޑާ އެވެ. އެ ކުންފުންޏާއި އިސްލާމިކް މިނިސްޓްރީއާ ދެމެދު އެކަމުގެ އެއްބަސްވުމުގައި ސޮއިކުރީ މިދިޔަ މަހުގެ 24 ގަ އެވެ.
އައްޑޫ އިސްލާމީ މަރުކަޒަކީ 1،500 މީހުންގެ ޖާގަ އެލުލެވޭ ގޮތަށް ދެ ބުރިއަށް ހަދަން ނިންމާފައިވާ ތަނެކެވެ. އެތަނުގައި 450 މީހުންގެ ޖާގައިގެ މަލްޓި ޕާޕަސް ހޯލަކާއި ހަތަރު ކްލާސް ރޫމާއި ދެ ސެމިނާ ރޫމްގެ އިތުރުން އިދާރީ އޮފީހާއި އިސްލާމިކް ލައިބްރަރީއަކާއި ޕޭންޓްރީއެއް ވެސް ހިމެނޭނެ އެވެ.
މި މަޝްރޫޢުގެ މަސައްކަތް ހަވާލުކޮށްފައި ވަނީ މަސައްކަތް ފަށާތާ 540 ދުވަހުގެ ތެރޭގައި މަސައްކަތް ނިންމާ ގޮތަށެވެ. އަދި މިކަމަށް ހަރުދުވާނީ 55.52 މިލިއަން ރުފިޔާ އެވެ.