ރާއްޖެ އެތެރެކުރި މުދަލަށް ބޭރު ކުންފުނިތަކުން ދައްކަން ޖެހޭ ފައިސާ ދެއްކުމުގައި މަކަރާއި ހީލަތް ހަދައިފައިވާ މައްސަލާގައި މއ. ހަނީސަކްލް-1 ޙުސައިން ޝިފާޢުގެ މައްޗަށް 23 ދައުވާއެއް ކުރަން ޕްރޮސެކިއުޓަ ޖެނެރަލް އޮފީހުން ކްރިމިނަލް ކޯޓަށް ހުށަހަޅައިފި އެވެ.
އޭނަގެ މައްޗަށް ދަޢުވާކުރަނީ ތުރު މީހަކާ ބައިވެރިވެގެން އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރިއެއް ކަމަށްވާ "ކިންގްޑަމް އޮފް ފުރުޓްސް" މެދުވެރިކޮށް ރާއްޖެ އިން ބޭރުގެ ކުންފުނިތަކުގެ މުދާ ރާއްޖެ އެތެރެކޮށް، އެ މުދަލަށް ބޭރު ކުންފުނިތަކުން ދައްކަންޖެހޭ ފައިސާ ދެއްކުމުގައި މަކަރާއި ހީލަތް ހަދައިފައިވާ މައްސަލައިގައެވެ.
ޝިފާއުގެ މައްޗަށް އުފުލާފައި ވަނީ އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ 9 ދައުވާ އާއި މަކަރާއި ހީލަތް ހެދުމުގެ ކުށުގެ 7 ދައުވާ އާއި މަނީ ލޯންޑްރިންގެ ކުށުގެ 7 ދައުވާ އެވެ.
މި ދައުވާތައް ސާބިތުވެއްޖެ ނަމަ މަދުވެގެން 38 އަހަރުގެ ޖަލު ހުކުމެއް އޭނަގެ މައްޗަށް އަންނާނެއެވެ.
ޝިފާއުގެ ވަގު މުއާމަލާތުގެ މައްސަލަ ފަޅާއެރީ ރާއްޖެ އިން ބޭރުގެ އެކި ކުންފުނިތަކުން އޭނަ ގަނެފައިވާ ތަކެއްޗަށް ފައިސާ ދިންކަމަށް ދެއްކުމުގެ ގޮތުން ސައްހަ ނޫން ޓެލެގްރަފިކް ޓްރާންސްފާ (ޓީޓީ) އުފެއްދުމާ ގުޅިގެންނެވެ.
އެގޮތުން މި މައްސަލައިގައި ހިމެނޭ ފައިސާގެ އަދަދު 123،844.54 ޑޮލަރު (1،909،682ރ.) އަށް އަރަ އެވެ.
އެ ފައިސާ ދައުލަތަށް ނަގައި ދިނުމަށް ވެސް ޕީޖީން ހުށަހަޅާފައިވެ އެވެ.