ދުނިޔޭގެ މަޝްހޫރު ބްރޭންޑެއް ކަމަށްވާ ރޯޒްވުޑްގެ ރިސޯޓެއް ރާއްޖޭގައި ހުޅުވަން ނިންމައިފި އެވެ.
ދެހާސް ހަތާވީހުގައި ހުޅުވަން ނިންމާފައިވާ މި ރިސޯޓްގެ ނަމަކީ ރޯޒްވުޑް ރަންފަރު އެވެ. މިއީ ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ސީޕްލޭންގައި ފުރައިގެން 10 ވަރަކަށް މިނިޓުން ދެވޭ ހިސާބުގައި ތަރައްގީ ލަގްޒަރީ ރިސޯޓެވެ.
ރޯޒްވުޑް ރަންފަރު ތަރައްގީކުރަނީ ރޯޒްވުޑް ހޮޓެލްސް އެންޑް ރިސޯޓްސްގެ ދަށުން ގަތަރުގެ އިސްތިމާރް ހޯލްޑިންއާ ހަވާލުކޮށްގެންނެވެ. އެންމެ ޒަމާނީ ފެންވަރަށް އަދި އެތައް ހިދުމަތެއް ލިބޭ ގޮތަށް ތަރައްގީކުރާ މި ރިސޯޓަކީ 120 ބީޗްފޮރޮންޓާއި އޯވަވިލާ ހިމެނޭނެ ތަނެކެވެ.
ރޯޒްވުޑް ހޮޓެލްސް އެންޑް ރިސޯޓްސް އަކީ ހޮންކޮންގްގެ ރޯޒްވުޑް ހޮޓެލް ގްރޫޕްގެ ދަށުން ހިންގާ ކުންފުންޏެކެވެ. އެތަނުން މިހާރު ވެސް 16 ގައުމެއްގައި 28 ޕްރޮޕަޓީ އޮޕަރޭޓްކުރެ އެވެ.
ދުނިޔޭގެ އެންމެ މަގުބޫލު ޓޫރިޒަމް މަންޒިލްގެ ތެރޭގައި ހިމެނޭ ރާއްޖޭގައި މިހާރު 170 ރިސޯޓް ހިންގަ އެވެ. މި އަހަރުގެ މިހާތަނަށް ވެސް އަލަށް ދެ ރިސޯޓް ހުޅުވާފައިވާ އިރު، އިތުރު ހަ ރިސޯޓެއް މި އަހަރު ހުޅުވަން ހަމަޖެހިފައިވެ އެވެ.