ރާއްޖޭގައި އޮތް އެންމެ ބޮޑު ވަބާ ކަމަށްވާ މަސްތުވާތަކެތީގެ ތެރެއަށް އަހަރެއްގެ ތެރޭގައި އަލަށް 500 އެއްހާ މީހުން ވަންނަ ކަމަށާއި މިއީ އެކަމަށް ކުރާ މަސައްކަތްތަކަށް އޮތް ވަރަށް ބޮޑު ގޮންޖެހުމެއް ކަމަށް ޕޮލިސް ކޮމިޝަނަރު މުހައްމަދު ޙަމީދު ވިދާޅުވެއްޖެ އެވެ.
ފުލުހުންގެ 90 ވަނަ އަހަރީ ދުވަސް ފާހަގަކުރަން ބޭއްވި ޖަލްސާގައި ސީޕީ ވިދާޅުވީ އަލަށް ތައާރަފުވާ ތަފާތު ބާވަތްތަކުގެ މަސްތުވާތަކެއްޗާ އެކު ޒުވާނުން އެކަމުގެ ތެރެއަށް ވަންނަ މިންވަރު އިތުރު ކަމަށެވެ. އެގޮތުން އަލަށް 400-500 ދެމެދުގެ އަދަދަކަށް އެކި އުމުރު ފުރައިގެ މީހުން ކޮންމެ އަހަރަކު ވެސް މަސްތުވާތަކެތީގެ ތެރެއަށް ވަންނަމުންދާ ކަމަށް ވިދާޅުވި އެވެ.
#HappeningNow: Grand celebrations commenced at Hulhumale' Synthetic Track to commemorate the 90th Anniversary of Maldives Police Service #MPS90thAnniversary pic.twitter.com/K2mm9CzLbD
— Maldives Police (@PoliceMv) April 29, 2023
ސިޕީ ވިދާޅުވީ މިކަން ހައްލުކުރުމަށް ފުލުހުން ހިމެނޭ ގޮތުން ޖިނާއީ ޢަދުލުގެ ނިޒާމާއި މި މައްސަލައާ ގުޅުން ހުރި ދައުލަތުގައި ހިމެނޭ ހުރިހާ އިދާރާތަކުން އެއް މިސްރާބަކަށް މަސައްކަތް ވެސް ކުރަން ޖެހޭ ކަމަށެވެ. އަދި މަސްތުވާތަކެތީގެ މައްސަލަ ހައްލުކުރުމަށް ފުލުހުންގެ ސްޓްރެޓެޖިކް އެކްޝަން ޕްލޭންގެ ދަށުން މަސްތުވާތަކެތި އަތުލައިގަނެވޭ މިންވަރު އެތައް ގުނައަކުން އިތުރުކޮށްފައިވާ ކަމަށް ވެސް ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި ފުލުހުން މަސައްކަތްކުރާ ގޮތާއި އެ މަސައްކަތްތަކަށް އިސްކަންދޭ ތަރުތީބުތަކާއި، ރޭވުންތެރިކަމުގެ ތެރެއިން ފުލުހުންނަށް މުހިންމު ނަތީޖާތަކެއް ނެރެވިދާނެ." ސީޕީ ވިދާޅުވި އެވެ.
މަސްތުވާތަކެތީގެ މައްސަލަ އަކީ ރާއްޖޭގައި އޮތް އިޖުތިމާއީ އެންމެ ބޮޑު މައްސަލަ އެވެ. މި ވަބާ މުޅި ރާއްޖެ އަށް ފެތުރިފައިވާ އިރު ރާއްޖޭގައި އުމުރުން 8 އަހަރުގެ ކުދިން ވެސް މަސްތުވާތަކެތި ބޭނުންކުރާކަން ރެކޯޑްތަކުން ދައްކަ އެވެ. ރާއްޖެ އަށް މަސްތުވާތަކެތި އެތެރެކުރުމާއި ވިއްކުމަކީ ވަރަށް ފުޅާކޮށް ކުރެވެމުންދާ އަދި ނުހުއްޓުވި އޮތް ބޮޑު މައްސަލައެކެވެ.