ޗާގޯސް މައްސަލައާ ގުޅުވައިގެން ރާއްޖޭގެ އިމާ ބެހޭ ގޮތުން ކުރީގެ އެޓާނީ ޖެނެރަލް ޑ. މުހައްމަދު މުނައްވަރު ދެއްކެވި ވާހަކަތަކަށް ހޯމް މިނިސްޓަރު އިމްރާން އަބްދުﷲ މިއަދު ފާޑު ވިދާޅުވެއްޖެ އެވެ.
ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް މިއަދު ކުރެއްވި ޓްވީޓެއްގައި ވިދާޅުވީ ޗާގޯސް އަކީ ރާއްޖޭގެ ތަނެއް ކަމަށް ވިދާޅުވާން ޑރ. މުނައްވަރަށް ކެރިވަޑައިނުގަތް ކަމަށެވެ.
"އެގޮތަށް ވިދާޅުވާން ކެރިވަޑައިނުގަތުމުން މި ހުރިހާ ދުވަހު ވިދާޅުވީ ނަތީޖާއެއް ނެތް ހުސް ވާހަކަފުޅުތަކެއްކަން މިއަދު ވަރަށް ސާފުކޮށް ހާމަވޭ." އިމްރާން ވިދާޅުވި އެވެ.
Chagos akee Raajjeyge thaneh kamah Dr munahvarah vidhaalhuvaan kerivadainugathumun mi hurihaa dhuvahu vidhaalhuvee natheejja eh neiy hus vaahakafulhuthakeh kan miadhu v saafukoh haamavey.
— Imran Abdulla (@ShimranAb) May 4, 2023
މި އަހަރުގެ ރިޔާސީ އިންތިހާބުގައި ވާދަކުރައްވަން ނިންމަވާފައިވާ މުނައްވަރު އިއްޔެ ބޭއްވި ނޫސް ކޮންފަރެންސެއްގައި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވެފައިވެ އެވެ. އެގޮތުން ރާއްޖެ އާއި މޮރިޝަސްގެ އިމުގެ މައްސަލާގައި އިންޓަނޭޝަނަލް ޓްރައިބިއުނަލް ފޮ ލޯ އޮފް ދަ ސީ (އިޓްލޮސް) އިން ނިންމި ނިންމުން ސަރުކާރުން ބަލައިގަތުން ކުށްވެރިކުރައްވައި ފާޑު ވިދާޅުވި އެވެ.
މުނައްވަރު ވިދާޅުވީ ރައީސް އިބްރާހީމް ސޯލިހްގެ ވެރިކަން ދަނީ ވަރަށް އަވަހަށް ނިމުމަކާ ދިމާލަށް ކަމަށާއި މި ވެރިކަން ނިމުމަކަށް އައުމާއެކު ދިވެހި ކަނޑުން ގެއްލުނު ބައި ހޯދުމުގެ މައްސަލަ އަލުން ފަށާނެ ކަމަށެވެ.
"ދެން ފައްޓާނެ ގޮތް ނޭންގޭނެ އޭ އެ ބޭފުޅުން ވިދާޅުވާނެ. އެ ބޭފުޅުންނަކަށް ނޭންގޭނެ. ކުދިވެރީންނަށް ނޭންގޭނެ. އެކަމަކު އަޅުގަނޑު މި ދަންނަވަނީ ވަރަށް ސާފުކޮށް މައްސަލަ ބެލޭނެ ގޮތްގޮތް ހުންނާނެ. މައްސަލަ ބަލާނެ." އޭނާ ވިދާޅުވި އެވެ.
މުނައްވަރު ވިދާޅުވީ މި ސަރުކާރަށް ދެވަނަ ދައުރެއް ލިބިއްޖެ ނަމަ ދެން ދޫކޮށްލާނީ ހަނިމާދޫ ކަމެއް ނޫނީ އުތުރު ތިލަފަޅުކަމެއް ވެސް ނޭނގޭ ކަމަށެވެ. އަދި ދައުލަތް ހިންގަން މިއަދު ތިބީ ހަމައެކަނި ގަމާރު ބައެއް ނޫން ކަމަށާއި މިއީ ހަމަވެސް ބައެއް ނޫން ކަމަށް ވިދާޅުވި އެވެ. އެގޮތުން ދައުލަތުގެ މަސްލަހަތު ހިމާޔަތް ކުރަން އެއްވެސް ކަމެއް ނުކުރާ ކަމަށާއި ދައުލަތް ހިންގަން މިއަދު ތިބީ ސީދާ ދައުލަތުގެ ދުޝްމަނުން ކަމަށް މުނައްވަރު ވިދާޅުވި އެވެ.
"މި ނޫނީ ދައުލަތް ހިންގަން ތިބި ބަޔަކަށް ދައުލަތަށް ވާނުވާ ނޭންގި އެއް ނެތް. އެއީ ދައުލަތުން އެއްބައި ގެއްލުނީމަ ވެސް އަތްތިލަ ބަޑި ޖަހަނީ. މި މީހުން ހަމައެއް ނޫން. ގަމާރީ އެކަންޏެއް ނޫން، ހަމައެއް ވެސް ނޫން." އޭނަ ވިދާޅު ވި އެވެ.