މަޝްހޫރު އެކްޓަރު އާމިރު ހާންގެ އާ ފިލްމް "ޕީކޭ" ގެ ފުރަތަމަ ޕޯސްޓަރުގައި އޭނާ "އަޮރިޔާމުން" ހުރި މައްސަލަ ހޫނުވެއްޖެ އެވެ.
މިދިޔަ މަހުގެ 31 ވަނަ ދުވަހު "ޕީކޭ" ގެ މޯޝަން ޕޯސްޓަރާއި ސްޓިލް ޕޯސްޓަރު އާންމު ކުރުމާ އެކު، އިންޓަނެޓްގައި މި ތަކެތި ވަނީ ވައިރަހެއްހެން ފެތުރިގެން ގޮސްފަ އެވެ.
އަނެއްްކޮޅުން މިދިޔަ އަހަރު ހައްޖުވެގެން ވެސް ހުރި އުމުރުން 48 އަހަރުގެ އާމިރަށް ވަރަށް ގިނަ ބަޔަކު ވަނީ މި މައްސަލާގައި ފާޑު ވެސް ކިޔަން ފަށައިފަ އެވެ.
އޭގެ ތެރޭގައި ޓްވިޓާ އާއި އެފްބީގައި ތިބި އޭނާގެ ގިނަ އަދަދެއްގެ ފޭނުން ހިމެނެ އެވެ. އަދި ހަަމަ މިއާ އެކު ބޮލީވުޑްގެ ބައެއް ތަރިން ވެސް އާމިރް "އޮރިޔާން" ޕޯސްޓަރަށް ތަފާތު އެކި ގޮތްގޮތަށް ކޮމެންޓްކޮށްފައިވެ އެވެ.
ބައެއް މީހުން ސިފަ ކުރި ގޮތުގައި އާމިރް ފަދަ ގިނަ ބަޔަކު އިހުތިރާމް ކުރާ އެކްޓަރެއްގެ ފަރާތުން، މިފަދަ އަމަލެއް ފެނުމަކީ ދުވަހަކު ވެސް އުންމީދު ކުރި ކަމެއް ނޫނެވެ.
އަދި ބައެއް މީހުން އާމިރް ސިފަކޮށްފައި ވަނީ ބޮލީވުޑްގައި މިހާރު ވިދަމުން އަންނަ ބަތަލާ އަދި ކުރީގެ "ޕޯންސްޓާ" ސަނީ ލިއޯން އަށް ވުރެ "ހަޔާތް ކުޑަ" މީހެއްގެ ގޮތުގަ އެވެ.
ފިލްމުގެ ޕޯސްޓަރުގައި ފޭރާމުން ބަރީއަވެ، ކުރިމަތި ފަރާތް ހަމައެކަނި ހިފަހައްޓައިގެން ހުރި އިހުގެ ރޭޑިއޯއަކުން އާމިރު ނިވާކޮށްގެން ހުރި މައްސަަލަ މިހާރު ވަނީ ކޯޓާ ހަމައަށް ވެސް ގެންގޮސްފަ އެވެ.
އާމިރްގެ ފަރާތުން މި ފެނުނު "ހައިރާން" ކުރުވަނިވި އަމަލާ ގުޅިގެން، "ޕީކޭ" ގެ ޕޯސްޓަރުގެ މައްސަލަ ކޯޓަށް ވައްދާފައި ވަނީ ވަކީލެއް ކަމަށްވާ މަނޯޖް ކުމާރެވެ.
މި މައްސަލައިގެ އަޑު އެހުމެއް މި މަހުގެ 7 ވަނަ ދުވަހަށް މިހާރު ވަނީ ކޯޓްގައި ތާވަލް ވެސް ކޮށްފަ އެވެ.
އޭނާ ކޯޓަށް ހުށަހެޅި މައްސަލާގައި ބުނެފައި ވަނީ އެ ޕޯސްޓަރަކީ އާންމު މުޖުތަމައު ގަބޫލް ކުރާނެ އެއްޗެއް ނޫން ކަމަށާއި އެއީ ކޮށްފައިވާ ޖިންސީ ހަޑިމުޑުދާރު އަމަލެއް ކަމަށެވެ.
އެހެންވެ އެ ޕޯސްޓަރު މަނާ ކުރަން ޖެހޭ ކަމަށް މަނޯޖް ވަނީ ބުނެފަ އެވެ. އަދި މިފަދަ "ދަށު ދަރަޖައިގެ" އަމަލެއް ކޮށްފައިވާތީ އާމިރާއި "ޕީކޭ" ގެ ޓީމްގެ އިތުރުން އެ ޕޯސްޓަރު ޕަބްލިޝްކޮށްފައިވާ ނޫހަކާ ދެކޮޅަށް ދައުވާ ކުރަން ޖެހޭ ކަމަށް މަނޯޖް ބުންޏެވެ.
"އަހަރެންގެ ގެއަށް ނޫސް ލިބުނު އިރު، ނޫހުން މި ޕޯސްޓަރު ފެނުނީމަ ކުއްލި ޝޮކެއް ލިބުނީ. ނޫހަކީ އެތައް ބަަޔަކު ބަލާ އެއްޗެއް. އަނެއްކާ އެއީ އެކި އުމުރުގެ މީހުން ބަލައި އުޅޭ އެއްޗެއް. އޭގެ ތެރޭގައި އުމުރުން ދުވަސްވީ މީހުންނާއި ކުޑަކުދިން ވެސް ހިމެނޭ،" މަނޯޖް ބުންޏެވެ.
"ޕީކޭ" ޕޯސްޓަރުގެ މައްސަލަ ހޫނުވެފައިވާ އިރު، އެ ފިލްމުގެ ޑައިރެކްޓަރު ރާޖް ކުމާރު ހިރާނީ، ގަބޫލް ކުރާ ގޮތުގައި އާމިރް ހުރީ "އޮރިޔާމަކުން" ނޫނެވެ. އޭނާ ވަނީ ތަކުރާރުކޮށް އެހެން ބުނެފަ އެވެ.
ފިލްމުގެ ޕޯސްޓަރު އާންމު ކުރުމަށް، "ޕީކޭ" ގެ ޕްރޮޑިއުސަރު ވިންދޫ ވިނޯދް ޗޯޕްޅާގެ އަންހެނުން އަދި މަޝްހޫރު ފިލްމް ކްރިޓިކް އަނޫޕަމާ ޗޯޕްޅާ އަށް ދިން އިންޓަވިއުއެއްގައި ހިރާނީ ބުނީ "އާމިރް އެހެރީ އޮރިޔާމުން ނޫން" ކަމަށެވެ.
އެ އިންޓަވިއުގައި އޭނާ އިތުރަށް ބުނެފައި ވަނީ ޕޯސްޓަރުން ފެންނަނީ "ހަމަ ހަގީގީ އާމިރު" ކަމަށެވެ.
"އެއީ ފޮޓޯޝޮޕްކޮށް،އެއްވެސް ކަހަލަ އެޑިޓިންއެއް ހަދާފައި އިން ޕޯސްޓަރެއް ނޫން. ޕޯސްޓަރުން އެ ފެންނަނީ ހަމަ އާމިރުގެ އަސްލު ހަށިގަނޑު،" އާމިރް ހިމަނައިގެން "3 އިޑިއަޓްސް" ޑައިރެކްޓް ކުރި ހިރާނީ ބުންޏެވެ.
އަންނަ ޑިސެމްބަރު މަހުގެ 19 ގައި ރިލީޒް ކުރަން ހަމަޖެހިފައިވާ "ޕީކޭ" ގައި އާމިރާ އެކު ބަތަލާއެއްގެ ގޮތުގައި ފެނިގެން ދާނީ އަނުޝްކާ ޝަރްމާ އެވެ.
މީގެ އިތުރުން ސަންޖޭ ދަތު، ސުޝާންތު ރާޖްޕުޓް، ބޮމަން އިރާނީ އަދި ސޯރަބް ޝުކްލާ ފަދަ ތަރިން މި ފިލްމުން ފެނިގެން ދާނެ އެވެ.