ޖުމްހޫރީ ޕާޓީ (ޖޭޕީ) ގެ ރިޔާސީ ޓިކެޓް އެ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމާ އަންނަ މަހުގެ 1 ގައި ރަސްމީކޮށް ހަވާލުކުރަން ނިންމައިފި އެވެ.
އެ ޕާޓީގެ އޮފިޝަލަކު ވިދާޅުވީ އެގޮތަށް ނިންމީ އިއްޔެ ބޭއްވި ބައްދަލުވުމެއްގައި ކަމަށެވެ. އޭނަ ވިދާޅުވި ގޮތުގައި އަންނަ މަހުގެ 1 ގައި ގާސިމަށް ޓިކެޓް ހަވާލުކުރުމާ އެކީ ޖޭޕީގެ ރިޔާސީ ކެމްޕޭން ވެސް ރަސްމީކޮށް ފެށިގެން ދާނެ ކަމަށެވެ.
މި އަހަރުގެ ރިޔާސީ އިންތިހާބުގައި ވާދަކުރައްވަން ގާސިމް ނިންމެވި އިރު، އޭނަ 2008 އާއި 2013 ގެ ރިޔާސީ އިންތިހާބުގައި ވެސް ވާދަކުރެއްވި އެވެ.
މާމިލިގިލި ދާއިރާގައި ހިމެނޭ އދ މާމިގިލި އަދި ފެންފުއްޓަކީ ޒަމާނުއްސުރެ ޖުމްހޫރީ ޕާޓީއަށާއި އަދި އަޅުގަނޑުގެ ސިޔާސީ މަސައްކަތްތަކަށް ނުހަނުބޮޑު ތާއީދެއް ދެއްވަވަމުން ގެންދަވާ ރައްޔިތަކު ދިރިއުޅުއްވާ ދެ ރަށެވެ. އިއްޔެވެސް 72 މެމްބަރުން އަޅުގަނޑުމެންނާއި ގުޅިފައިވާ އިރު ފާއިތުވި… pic.twitter.com/MXxLUSldg6
— Qasim Ibrahim (@qasimibrahim) May 8, 2023
ޖޭޕީ އަށް މެމްބަރުން އިތުރުކުރުމުގެ މަސައްކަތް ވެސް މިހާރު ވަރަށް ފޯރީގައި ކުރަމުން އަންނަ ކޯލިޝަން ހަދަން ބައެއް ޕާޓީތަކާ އެކީ ޖޭޕީން އަންނަނީ މަޝްވަރާ ވެސް ކުރަމުންނެވެ. އަދި އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަން މިހާރު ވެސް އޮތީ ޖޭޕީއާ އެކީގަ އެވެ.
ޖޭޕީ އަކީ ތިން ވަނަ އަށް ރާއްޖޭގެ އެންމެ ބޮޑު ޕާޓީ އެވެ. އަދި އެ ޕާޓީން މި ފަހަރު ބުނަމުން އަންނަނީ މިއީ ޖޭޕީގެ ފަހަރު ކަމަށާއި ގާސިމް އިންތިހާބު ކާމިޔާބު ކުރައްވާނެ ކަމަށެވެ.
މި އަހަރުގެ ރިޔާސީ އިންތިހާބު އޮންނާނީ ސެޕްޓެމްބަރު 9 ގަ އެވެ.