ފޭދޫ ބަނދަރު ސަރަހައްދުގައި އޮތް ހުސް ބިން ތަރައްގީ ކުރާނެ ގޮތަކާ ބެހޭ ގޮތުން އާންމުންގެ ހިޔާލު ހޯދަން އައްޑޫ ސިޓީ ކައުންސިލުން ނިންމައިފި އެވެ.
ފޭދޫ ބަނދަރު ތަރައްގީ ކުރާނެ ގޮތަކާ ބެހޭ ގޮތުން މީގެ ކުރިން ވެސް އެކި ފަހަރު މަތިން ވާހަކަ ދެކެވިފައިވެ އެވެ.
އެގޮތުން އައްޑޫ ސިޓީ ކައުންސިލުން ކުރިން ބުނަމުން ގޮސްފައި ވަނީ ފޭދޫ ބަނދަރަކި އައްޑޫގެ ފެރީގެ މައި ހަބް ކަމަށެވެ.
އެހެންވެ އެ ސަރައްދު ތަރައްގީ ކުރާނީ ފެރީ އާއި އެއާ ގުޅުން ހުރި ވިޔަފާރީގެ ހިދުމަތްތައް ފޯރުކޮށް ދެވޭ ގޮތަށް ކަމަށް ކައުންސިލުން ބުނެފައިވެ އެވެ.
އެގޮތުން ފެރީ ޓާމިނަލެް ހެދުމާ އެކު، ކެފޭ/ރެސްޓޯރެންޓް އަދި ފިހާރަ ފަދަ ތަންތަން އެ ސަރަހައްދުގައި ގާއިމުކޮށް ހިދުމަތް ދިނުމަކީ ވަރަށް ބޮޑު ކުރިއެރުމެއް އަންނާނެ ކަމެއް ކަމަށް ކައުންސިލުން ބުނެފައިވެ އެވެ.
ފޭދޫ ބަނދަރު ސަރަހައްދުގައި އޮތް ބިން ތަރައްގީ ކުރާނެ ގޮތަކާ ބެހޭ ގޮތުން ހިޔާލު ހޯދަން ނިންމާފައިވާ އިރު، ބަނދަރުގެ އިރުމަތީ ފަރާތުން ހިއްކާފައިވާ ސަރަހައްދުގައި ފޭދޫ ފުޓްސަލް ދަނޑު ތަރައްގީ ކުރި ނަމަ ވަރަށް ރަނގަޅު ވީސް ކަމަށް ބައެއް މީހުން ބުނެފައިވެ އެވެ.
މިދިޔަ މަހުގެ 23 ވަނަ ދުވަހުގެ ރޭ ހުޅުވި ފޭދޫ ފުޓްސަލް ދަނޑު އަޅާފައި ވަނީ މީހުން ދިރިއުޅެން އިމާރާތްކޮށްފައިވާ ހައުސިން ޔުނިޓްތަކެއްގެ ކުރިމަތީގަ އެވެ.
މީގެ ސަބަބުން އެތަނުގައި ދިރިއުޅެން ފަށާ އާންމުންނަށް ކުރިއަށް އޮތް ތަނުގައި ވަރަށް ބޮޑެތި ދަތިތަކާ ކުރިމަތިލާން ޖެހޭނެ ކަމަށް ބައެއް މީހުން ބުނެ އެވެ.