ދުނިޔޭގެ މަޝްހޫރު ފާސްޓް ފުޑް ރެސްޓޯރަންޓް ބްރޭންޑެއް ކަމަށްވާ "މޭރީ ބްރައުން" އައުޓްލެޓެއް މި އަހަރު އައްޑޫގައި ހުޅުވާނެ ކަމަށް ކައުންސިލުން ބުނެފި އެވެ.
ކައުންސިލުން މިހެން ބުނީ ރާއްޖޭގައި އޭގެ ވިޔަފާރި ހިންގާ މޭރީ ބްރައުން މޯލްޑިވްސްގެ އިސްވެރިންނާ އެކި ބޭއްވި ބައްދަލުވުމަކަށް ފަހު މިއަދު އެވެ. ކައުންސިލުން ބުނީ "މޭރީ ބްރައުން" ގެ އައްޑޫ އައުޓްލެޓް ހަދަން ނިންމާފައި ހިތަދޫ ލިންކް ރޯޑްގައި ކުރިން އެޕޯލޯގެ ގުދަން ހުރި ތަނުގައި ކަމަށާއި މި އަހަރުގެ ފަހުކޮޅު އެތަން ހުޅުވާނެކަމުގެ ޔަގީންކަން ލިބިފައިވާ ކަމަށެވެ.
"މޭރީ ބްރައުން" ގެ އައްޑޫގައި ހުޅުވަން މަސައްކަތް ކުރަމުން އަންނަ އިރު، ދުނިޔޭގެ އެފަދަ މަޝްހޫރު ބްރޭންޑްތައް އައްޑު އަށް ގެންނަން ބޭނުންވާ ކަމަށް ވިދާޅުވެ، މޭޔަރު އަލީ ނިޒާރު މިހާތަނަށް ވަރަށް ބޮޑަށް ވާހަކަ ދައްކަވާފައިވެ އެވެ. އެގޮތުން މެކްޑޮނަލްޑްސް އާއި ކޭއެފްސީ އައްޑު އަށް ގެންނަން ބޭނުންވާ ކަމަށް 2021 ގައި ވިދާޅުވެފައިވެ އެވެ.
"މޭރީ ބްރައުން" ގެ އައުޓް މިހާރު ރާއްޖޭގައި ހިންގަނީ މާލެ ސަރަހައްދުގަ އެވެ. އެއީ މާލެ އާއި ހުޅުމާލޭގެ އިތުރުން ހުޅުލޭގަ އެވެ.
ކެނެޑާގެ "މޭރީ ބްރައުން" ގެ އައުޓްލެޓްތައް 230 އަށް ވުރެ ގިނަ ތަންތަނުގައި އަންނަނީ ހިންގަމުންނެވެ. އެ ބްރޭންޑް އުފަންވީ މީގެެ 54 އަހަރު ކުރިން 1969 ގަ އެވެ.
އައްޑޫގައި މި ވަގުތު ހުރި ދުނިޔޭގެ މަޝްހޫރު ބްރޭންޑަކީ ބަބްލް ޓީތަކަށް ހާއްސަ "ޗާ ޓައިމް" އެވެ. އެތަނުގެ އައުޓްލެޓެއް ހިތަދޫގައި ހުޅުވީ މިދިޔަ އަހަރު އެވެ.