ކޮވިޑްގެ ތިން އަހަރުގެ ބަންދަށް ފަހު މި އަހަރުގެ ޖެނުއަރީ މަހުން ފެށިގެން ޗައިނާގެ ޓޫރިސްޓުން ރާއްޖެ އަށް އަންނަން ފެށި ފަހުން އެ މާކެޓުން ޓޫރިސްޓުން އިތުރުގެ ޓޮޕް 10 މާކެޓްގެ ހަ ވަނަ އަށް މިހާރު ޖެހިފައިލައިިފި އެވެ.
ޖެނުއަރީ މަހުގެ 18 އިން ފެށިގެން ޗައިނާގެ ޓޫރިސްޓުން އަންނަން ފެށިތާ ދެ ހަފުތާއެއްހާ ދުވަހުގެ ތެރޭގައި އެ ގައުމު ޓޮޕް 10 މާކެޓަށް އަރައި 8 ވަނައިގައި ގިނަ ދުވަސްތަކެއް ވަންދެން އޮތެވެ. ޓޫރިޒަމް މިނިސްޓްރީން އެންމެ ފަހުން އާންމުކުރި ޓޫރިޒަމް ދާއިރާގެ ތަފާސްހިސާބުތަކަށް ބަލާ އިރު، ޗައިނާ މިހާރު ހަ ވަނައިގައި އޮތް އިރު، މި މަހުގެ 10 އާ ހަމައަށް އެ ގައުމުން ރާއްޖެ އަށް 36،625 ޓޫރިސްޓުން އައިސްފައިވެ އެވެ.
ޗައިނާ އަކީ ކޮވިޑްގެ ކުރިން ރާއްޖޭގެ ޓޮޕް 10 މާކެޓް ގަދަ ތިނެއްގައި ހިފަހައްޓަމުން އައި ގައުމެކެވެ.
މިނިސްޓްރީގެ ތަފާސްހިސާބުތައް ދައްކާ ގޮތުން މި މަހުގެ 10 އާ ހަމައަށް ރާއްޖެ އަށް ޖުމްލަ 731،783 ޓޫރިސްޓުން އައިސްފައިވެ އެވެ. އަދި އަހަރު މި އަހަރު ފެށުނީއްސުރެ އެންމެ ގިނަ ޓޫރިސްޓުން އައިސްފައި ވަނީ ރަޝިއާއިންނެވެ. ޓޮޕް 10 މާކެޓަށް ބަލާ އިރު ދެ ވަނައިގައި އޮތީ އިންޑިއާ އެވެ. އަދި ތިން ވަނައިގައި އޮތީ އިނގިރޭސިވިލާތެވެ. ލިސްޓްގައި ދެން ހިމެނެނީ އިޓަލީ، ޖަރުމަން، ޗައިނާ، އެމެރިކާ، ފްރާންސް ސްވިޓްޒަލޭންޑް އަދި ދެކުނު ކޮރެއާ އެވެ.
ރާއްޖޭން މި އަހަރު 1.9 މިލިއަން ޓޫރިސްޓުން ގެންނަން އަމާޒު ހިފާފައިވެ އެވެ.