އައްޑޫގައި ފުލުހަކު ކުޑަކުއްޖެއްގެ ގައިގައި ޖެހި މައްސަލައަކާ ގުޅިގެން ބޮޑު އަދަދަކުން ޖޫރިމަނާކޮށްފި އެވެ.
އޮގަސްޓް 30، 2016 ގައި ފޭދޫ ބޮޑު މަގު ސަރަހައްދު މުލައްޑޫ ގަރާޖު ހިސާބުގަނޑުގައި ހިނގި މި ހާދިސާއާ ގުޅިގެން ކްރިމިނަލް ކޯޓުން 18،000ރ. އިން ޖޫރިމަނާކުރީ ލ. ހޮޔަދޫ ޕޯނަމް، ނަޝީދު މުހައްމަދު ނަމަކަށް ކިޔާ ފުލުހެއްގެ މައްޗަށެވެ. ކުޑަކުއްޖެއްގެ ގައިގައި އޭނަ ޖެހިކަން ޝަރީއަތަށް ސާބިތުވެ، ކުރި ޖޫރިމަނާ ތިން މަސް ދުވަހުގެ ތެރޭގައި ދައުލަތަށް ދެއްކުމަށް އަމުރުކޮށްފައިވެ އެވެ.
ނަޝީދުގެ މައްޗަށްކުުރި ދައުލަތު ދައުވާގައި ބުނެފައި ވަނީ، ކުޑަކުއްޖަކު އިތުރު ބަޔަކާ އެކު، މަގުމަތީގައި ހިނގާފައި ދަނިކޮށް، އެ ކުއްޖާ އަށް ގޮވައި ފުލުސް މީހާ ކައިރިއަށް ދާން އެދުނު ކަމަށާއި ކުއްޖާ ދިއުމުން ކުޑަ ކުއްޖާގެ ވާތް ފަރާތު ކަންފަތް މަތީގައި ޖެހުމުގެ ސަބަބުން އޭނާއަށް އަނިޔާވެފައިވާ ކަމަށެވެ.
މި ދައުވާ ނަޝީދު އިންކާރު ކުރި ނަމަވެސް ދައުވާ ސާބިތުވާ ކަމަށް ކަނޑައަޅައި، ކްރިމިނަލް ކޯޓުން ކުރި ހުކުމުގައި ވަނީ ފުލުސް މީހާ އެ ކުށް ކުރިކަމުގެ އެކަށީގެންވާ ހެކި ވެސް ހުރި ކަމަށެވެ. އެގޮތުން މަގުމަތީގައި ހުރި ރިފްލެކްޓަރެއްގައި އެ ކުއްޖާ ޖެހުމުން ނަޝީދު އެ ކުއްޖާގެ ގައިގައި ޖެހިކަން ހެކިންގެ ބަހުން އެނގޭ ކަމަށް ހުކުމުގައިވެ އެވެ. އަދި، އެ ހާދިސާއާ ގުޅިގެން ކުއްޖާ އަށް ހޮސްޕިޓަލުން ފަރުވާ ދީފައި ވާއިރު އެ ކުއްޖާއަށް ލިބިފައިވާ އަނިޔާތައް މެޑިކަލް ލިޔުންތަކުން އެނގެން އެބައޮތް ކަމަށް ވެސް ހުކުމުގައިވެ އެވެ.
ގާނޫނުލް އުގޫބާތުގެ ދަށުން ދައުލަތުން ފުލުސް މީހާގެ މައްޗަށް ކުރި ދައުވާގެ އަސާސީ އަދަބަކީ ދެ މަހާއި 12 ދުވަހަށް ޖަލަށް ލުމެވެ. ނަމަވެސް ކުޑަކުއްޖަކަށް ހަމަލާދީފައިވާތީ އޭނާގެ އަދަބުގެ ދަރަޖަ މަތިކޮށް، ފުލުސް މީހާ ތިން މަސް ދުވަހުގެ މުއްދަތަކަށް ޖަލަށް ލުމަށް ވެސް ކްރިމިނަލް ކޯޓުން ކަނޑައެޅި އެވެ.
ނަމަވެސް ޖަލު ހުކުމުގެ ބަދަލުގައި ޖޫރިމަނާގެ އަދަބެއް ދޭން ނަޝީދު އެދުމުން، އޭނާގެ މައްޗަށް ކުރިން އެހެން ކުށެއް ސާބިތުވެފައި ނުވާތީ އާއި އޭނަ އަކީ ވަޒީފާއެއްގައި ހުރި މީހަކަށްވުމުގެ އިތުރުން ދައުލަތުން އެ ކަމަށް ދެކޮޅު ހަދާފައި ނުވާތީ ކޯޓުން ޖޫރިމަނާކުރަން ނިންމީ އެވެ.