އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ހަސަން މުޣުނީ ކުރެއްވި ޓްވީޓެއްގައި ރައީސް އިބްރާހީމް މުހައްމަދު ސޯލިހަށް ވަގަށް ގޮވި މައްސަލަ ރައީސް އޮފީހުން ބަލަން ފަށައިފި އެވެ.
ފަހުން ޑިލީޓްކޮށްފައިވާ ޓްވީޓްގައި ވިދާޅުވެފައި އޮތީ "ހިންނަވަރު ވަގު އިބްރާހިމްބެ ދައުލަތުގެ ކުންފުނިތަކުގެ ވެރިންނަށް އައްޔަންކޮށްފައި ވަނީ އެ ކުންފުނިތައް ހިންގުމުގެ އެއްވެސް ގާބިލުކަމެއް ނެތް ކޮރަޕްޓުވެފައިވާ ވަގުންގެ ޓީމެއް" ކަމަށެވެ.
އެގޮތުން އާބަންކޯގެ އެމްޑީ އަހުމަދު އާތިފާއި އެސްޓީއޯގެ އާ އެމްޑީ މުހައްމަދު ސައީދާއި އެމްއޭސީއެލްގެ އެމްޑީ މަހުޖޫބު ޝުޖާއު އާއި، އާރުޑީސީގެ އެމްޑީ މޫސާ އަލިމަނިކު (މޫކޭ) އަދި ސްޓެލްކޯގެ އެމްޑީ އަހުމަދު ޝަރީފާއި ފެނަކައިގެ އެމްޑީ މުހައްމަދު ސައީދަކީ ކޮރަޕްޓުބައެއް ކަމަށް ވިދާޅުވެފައިވެ އެވެ.
ކުރިން ސްޓެލްކޯގެ މެނޭޖިން ޑިރެކްޓަރުކަން ކުރެއްވި އަދި ޖުމްހޫރީ ޕާޓީ އަށް ނިސްބަތްވާ މުޣުނީ ވިދާޅުވީ ސަރުކާރުގެ ކުންފުނިތައް މެދުވެރިކޮށް ސަރުކާރުން ހިންގަމުންދާ ކޮރަޕްޝަން ހަތަރު މަހުގެ ތެރޭގައި ނިމުމަކަށް އަންނާނެ ކަމަށެވެ.
އޭނަގެ މި ވާހަކަތަކާ ގުޅިގެން ސަރުކާރަށް ނިސްބަތްވާ ގިނަ ބައެއްގެ ފާޑުކިޔުން އަމާޒުވެ، މަގާމުން ވަކި ކުރަން ވެސް ގޮވާފައިވެ އެވެ.
މުޣުނީގެ މައްސަލަ ރައީސް އޮފީހުން ބަލަމުން އަންނަ އިރު، އޭނަ އިއްޔެ އޮފީހަށް ހާޒިރު ވެސް ކުރި އެވެ.