އެމްޑީޕީގެ މެމްބަރެއް ކަމަށްވާ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ޕާޓީން ވަކިވެފައިވާ ކަމަށް ނިންމައިފި އެވެ.
އެގޮތަށް ނިންމާފައި ރޭ ބޭއްވި ޕާޓީގެ ފިޔަވަޅު އަޅާ ކޮމިޓީން ބޭއްވި ބައްދަލުވުމަކަށް ފަހު އެވެ. އެކަމަކު މިކަން އެމްޑީޕީން ރަސްމީކޮށް ހާމައެއްނުކުރެ އެވެ. އެނގިފައިވާ ގޮތުގައި އެކަން އެމްޑީޕީން މިއަދު ރަސްމީކޮށް އިއުލާންކުރާނެ އެވެ.
އާޒިމް ޕާޓީން ވަކިކުރަން ނިންމީ އޭނައާ ގުޅޭ ގޮތުން ޕާލަމެންޓްރީ ގްރޫޕުން ހުށަހެޅި މައްސަލަ ބެލުމަށް ފަހު އެވެ.
މިފަދަ ފިޔަވަޅެއް އެޅުމުގެ ކުރިން އޭނަ ވަނީ ފިޔަވަޅު އަޅަން ހިތަށް އެރުވުމަކީ ވެސް އެމްޑީޕީ އަށް ކުރެވޭނެ ކުށެއް ކަމަށް ވިދާޅުވެފަ އެވެ. އާޒިމަކީ "ފިކުރެއްގެ ދިރުން" ގެ ނަމުގައި އެމްޑީޕީގެ ތެރޭގައި މިހާރު ވަކި ފެކްޝަނެއް ހިންގަވާ ޕާޓީގެ ރައީސް މުހައްމަދު ނަޝީދުގެ ފަޅީގައި ހުންނެވި ބޭފުޅެކެވެ. އަދި އޭނަ އަކީ ރައީސް އިބްރާހީމް މުހައްމަދު ސޯލިހަށާއި ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދަވާ ބޭފުޅެކެވެ.
އާޒިމަށް ފިޔަވަޅު އަޅައިދޭން އެމްޑީޕީގެ ގްރޫޕުން އެދުނީ ޗާގޮސް މައްސަލާގައި އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމަށް ހުށަހެޅި މައްސަލާގައި ސޮއި ކުރެއްވުމާއި ސަރުކާރާ ދެކޮޅަށް ރާވާ މުޒާހަރާތަކުގެ ޕްރެސް ކޮންފަރެންސްތަކުގައި ބައިވެރިވެވަޑައިގަންނަވާތީ އެވެ.