އައްޑޫ ސިޓީ ކައުންސިލްގެ ފޭދޫ ދާއިރާގެ ބައި އިލެކްޝަންގައި އެމްޑީޕީން ވާދަކުރާނެ ކެންޑިޑޭޓަކު ހޮވުމަށް ބޭއްވި ޕްރައިަމަރީ އަލީ ފަހުމީ އަހްމަދު ކާމިޔާބް ކޮށްފިއެވެ.
ފަސް ކެންޑިޑޭޓަކު ވާދަކުރި އިންތިހާބްގައި ފަހުމީ ޓިކެޓް ކާމިޔާބް ކުރެއްވީ 208 ވޯޓުންނެވެ. އިބްރާހިމް ހަލީލްއަށް 141 ވޯޓު ލިބުނު އިރު ހައްވާ ޒީނަތުއަށް ލިބުނީ 118 ވޯޓެވެ.
ކައުންސިލްގެ ފުރަތަމަ ދައުރުގައި ފޭދޫ ދާއިރާ ތަމްސީލު ކުރެއްވި އަހްމަދު މިރުޒާދު (މިރާ)އަށް ލިބުނީ 112 ވޯޓެވެ. އަދި މުންތަޤިމްއަށް ލިބުނީ 46 ވޯޓެވެ.
ފޭދޫގެ އެމްޑިޕީގެ އިސްވެރިންގެ ވަރަށް ބޮޑު ތާއިދެއް އޮތް ފަހުމީއަކީ ލިއުންތެރިކަމުގެ ދާއިރާއިން ވަރަށް ފާހަގަކޮށްލެވޭ ބޭފުޅެކެވެ. އެގޮތުން ފަހުމީ ލިޔުއްވި "އައްޑޫ ގަން ހިންގުން" އަދި "ސުވާދީބް"އަކީ ފާހަނގަކޮށްލެވޭ ދެ ފޮތެވެ.
ކުރިން ފޭދޫގެ ރަށް ކުރިއަރުވާ ކޮމެޓީ އާއި އެސްޓިއޯގެ އިސް މަގާމުތަކެއް، ފުރުއްވި ފަހްމީގެ ޒުވާން އުމުރު ހޭދަކޮށްފައިވަނީ ހިލޭ ސާބަހަށް ފޭދޫގެ ދަރިންނަށް އުގަންނައި ދިނުމުގައެވެ.
އަދި މިހާރުވެސް އާޓްގެ ފަންނުގައި ފަހްމީ ދަނީ އައްޑޫއަށް އިތުރު ތަރައްޤީ ގެނައުމަށް މަސައްކަތް ކުރަމުންނެވެ.
އެމްޑީޕީގެ ޓިކެޓް ފަހްމީ ކާމިޔާބް ކުރެއްވިއިރު ޕީޕީއެމްއިން ފުރުސަތު ދީފައިވަނީ ފޭދޫ، ފަރިމާ، އީނާ ނަސީރުއަށެވެ.
ފަހްމީގެ "އައްޑޫ ގަން ހިންގުން" ވަނީ އައްޑޫލައިވްގައި ޝާއިއު ކުރުމަށް ހަދިޔާކޮށްފައެވެ. އެހެންވެ މި ފުރުސަތުގައި ފަހްމީ ހޯއްދެވި ކާމިޔާބީ އަށާއި، އައްޑޫލައިވް އާއި މެދު ބާއްވާ ގާތް ކަމަށްޓަކައި މަރުހަބާ އާއު ޝުކުރު ދަންނަވަމެވެ.