އެމްޑީޕީގެ ތެރޭގައި ވަކި ޖަމާއަތެއް ހަދައިގެން އުޅުނު ބަޔަކު ޕާޓީން ވަކިޔަސް ވާނެ ގެއްލުމެއް ނެތް ކަމަށް އެ ޕާޓީގެ ޕާލިމަންޓްރީ ގްރޫޕް (ޕީޖީ) ގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު "ފިކުރެއްގެ ދިރުން" ގެ ނަމުގައި ހައްދަވައިގެން އުޅުއްވާ ފެކްޝަނަށް ނިސްބަތްވާ މަޖިލީހުގެ 12 މެމްބަރަކު ޕާޓީން އިއްޔެ ވަކިވުމާއި އަދި މިހާރު އާ ޕާޓީއެއް އެ ބޭފުޅުން ހައްދަވަން ނިންމެވުމާ ގުޅިގެން އަސްލަމް ވިދާޅުވީ ބަޔަކު ޕާޓީން ވަކިވުމަކީ ހިތާމަކުރައްވާ ކަމެއް ކަމަށެވެ.
އަދި ޕާޓީން ވަކިވެވަޑައިގަތް މަޖިލިސް މެމްބަރުން، މެމްބަރު ކަމަށް ހޮވިވަޑައިގަތީ އެމްޑީީޕީގެ ޓިކެޓްގައި ކަމަށްވެފައި ޕާޓީއާ ދެކޮޅަށް އެ ބޭފުޅުން ނުކުމެ މަސައްކަތް ކުރެއްވުމަކީ އެ ބޭފުޅުންގެ ނަޒާހަތްތެރިކަމާ ދޭތެރޭ ވެސް ސުވާލު އުފެދޭނެ ކަމެއް ކަމަށް އަސްލަމް ވިދާޅުވި އެވެ. އޭނަ ވިދާޅުވީ ޕާޓީން ވަކިވެ ވަޑަޑައިގަތް 12 މެމްބަރުންނަކީ އެމްޑީޕީއާ ވަރަށް ދުރުން މިހާތަނަށް މަސައްކަތް ކުރެއްވި ބަޔަކަށްވުމުން އެ ބޭފުޅުން ނެތަސް އޭގެ ގެއްލުމެއް ޕާޓީއަކަށް ނެތް ކަމަށެވެ.
އެހެންވެ އެމްޑީޕީގެ ތެރޭގައި ވަކި ޖަމާއަތެއް ފާޅުފައި ޕާޓީ ބައިބައިކުރަން މަސައްކަތް ކުރާ ބަޔަކު ޕާޓީ ދޫކޮށް ދިޔަސް ވާނެ މާ ބޮޑު ގެއްލުމެއް ނެތް ކަމަށް މީޑިއާއަކަށް ދެއްވި އިންޓަވިއުއެއްގައި އޭނަ ވިދާޅުވި އެވެ.
"އެމްޑީޕީގެ އެތެރޭގައި ތިބެ ޕާޓީ އާއި ގުޅިގެން މަސައްކަތް ނުކޮށް ވަކި ޖަމާއަތެއް ހައްދަވައިގެން މަސައްކަތް ކުރަށްވާ ބޭފުޅުން ޕާޓީ އާއި ދުރަށް ދިޔުމަކުން ޕާޓީއަށް ވާނެ އެއްވެސް ގެއްލުމެއް ނެތް ކަމަށް އަޅުގަނޑު ދެކެނީ." އަސްލަމް ވިދާޅުވި އެވެ.
އޭނަ ވިދާޅުވި ގޮތުގައި މީގެ ސަބަބުން މަޖިލީހުގެ ތެރޭގައި ވެސް ޕާޓީ އަށް އެމްޑީޕީގެ ސަރުކާރަށް ކުރިމަތިވާނެ ދަތިތަކެއް ނޯންނާނެ ކަމަށެވެ.
"އެއްވެސް ހުރަހެއް އެޅޭނެ ތަނެއް އަޅުގަނޑަކަށް ނުފެނޭ، އަޅުގަނޑުމެން އިތުރަށް ވަރުގަދަވެގެންދާނެ ހިތްވަރު އާލާވެގެން ދާނެ ކަމަށް އަޅުގަނޑު ދެކެނީ،" އަސްލަމް ވިދާޅުވި އެވެ. "އެއީ ޕާޓީގެ ތެރޭގައި ތިބެގެން ޕާޓީގެ ތެރޭގައި ވަރަށް ބޮޑަށް ފިތުނައަށް ވާ ގޮތަށް މަސައްކަތް ކުރައްވާ ބޭފުޅުން ވަކިވީމާ ޕާލިމެންޓްރީ ގުރޫޕަށް ވެސް މާ ރަނގަ ޅުވާނެ ކަމަށް އަޅުގަނޑު ދެކެނީ."
ނަޝީދުގެ "ފިކުރެއްގެ ދިރުން" ހައްދަވައިގެން ރައީސް އިބްރާހީމް މުހައްމަދު ސޯލިހާ ދެކޮޅަށް މަސައްކަތް ފެއްޓެވީ މި އަހަރުގެ ޖެނުއަރީގައި ބޭއްވި ރިޔާސީ ޕްރައިމަރީގައި ބޮޑުތަނުން ބަލިވެވަޑައިގަތުންނެވެ. އެ ފެކްޝަނަށް ނިސްބަތްވާ 12 މެމްބަރަކު އިއްޔެ އެމްޑީޕީން ވަކިވެވަޑައިގަތް ނަމަވެސް ނަޝީދު އަދިވެސް ހުންނެވީ އެމްޑީޕީ މެމްބަރެއްގެ ގޮތުގަ އެވެ.
އެކަމަކު މިހާރު ނިންމާފައި އޮތީ "ފިކުރެއްގެ ދިރުން" ސިޔާސީ ޕާޓީއެއްގެ ގޮތުގައި ރަޖިސްޓްރީކޮށް، މި އަހަރުގެ ރިޔާސީ އިންތިހާބަށް ވެސް ނުކުންނާށެވެ.