އައްޑޫގައި އަޅަން ނިންމާފައިވާ އިސްލާމީ މަރުކަޒު އިމާރާތް ކުރުމުގެ މަސައްކަތް މި އަހަރުގެ ތެރޭގައި ފެށޭ ވަރަށް ބަޖެޓްގައި ފައިސާ ހަމަޖައްސާފައިވާ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
އައްޑޫ މީދޫ ދާއިރާގެ މެންބަރު ރޮޒައިނާ އާދަމް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރެއްވި ސުވާލެއްގެ ޖަވާބުގައި ޑރ. ޝަހީމް ވިދާޅުވީ ސަރުކާރުން ކުރިން ނިންމާފައި އޮތީ އައްޑޫގައި ޒަމާނާ ގުޅޭ ބޮޑު މިސްކިތެއް އަޅަން ކަމަށެވެ.
"އައްޑޫ ސިޓީގެ އިސްލާމީ ކަންކަންކަމާއި މިސްކިތްތަކާއި އެހެނިހެން އިސްލާމީ މުއައްސަސާތައް ތަރައްގީ ކުރުމަކީ ސަރުކާރުގެ ވަރަށް މުހިންމު އަމާޒެއް. އެހެންކަމުން އެކަމަށްޓަކައި މިދަނީ ވަރަށް ބުރަ މަސައްކަތްތަކެއް ކުރަމުން،" ޑރ. ޝަހީމް ވިދާޅުވި އެވެ.
މިނިސްޓަރު އިތުރަށް ވިދާޅުވީ ހިތަދޫގައި ޒަމާނާ ގުޅޭ ބޮޑު މިސްކިތެއް ގާއިމު ކުރުމުގެ ތަސައްވަރެއް އެކުލަވާލައި، އެ ސީޓީގެ ކައުންސިލަށް ހުށައެޅުމުން، އެ ސިޓީގެ ރައްޔިތުންގެ އެދުމަކީ މިސްކިތުގެ ބަދަލުގައި އިސްލާމީ މަރުކަޒެއް އެޅުން ކަމަށެވެ.
"ކީރިތި ޤުރްއާނާއި އަދި އިމާމު ކޯހާއި ކަށުކަމާކެމި ފަދަ ކޯސްތައް ހިންގޭ ގޮތަށް ކްލާސްރޫމްތަކާއި ލައިބްރަރީއެއް ވެސް ހިމެނިގެން، އިސްލާމީ މަރުކަޒެއް ގާއިމުކުރުންކަމުގައި ހުށައެޅުމާ ގުޅިގެން، ރައްޔިތުންގެ ވިންދާ އެއްގޮތަށް އެ ތަސައްވުރަށް ބަދަލު ގެނެސް، އެ މަސައްކަތް ކުރިއަށްގެންދާ ގޮތަށް ވަނީ ނިންމާފަ." ޑރ. ޝަހީމް ވިދާޅުވި އެވެ.
އައްޑޫގައި އިސްލާމީ މަރުކަޒެއް ބިނާ ކުރަން ނިންމާފައިވާ ކަމަށް އިއުލާންކޮށްފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ.
އަދި އެ މަޝްރޫއު ރަސްމީކޮށް އިއުލާން ކުރީ މެއި 12، 2011 ގައި އައްޑޫގައި ބޭއްވި ކޮމިއުނިޓީ ކެބިނެޓް ބައްދަލުވުމުގައި އޭރުގެ އިސްލާމިކް މިނިސްޓަރު ޑރ. އަބްދުލް މަޖީދް އަބްދުލް ބާރީ އެވެ.
އިސްލާމީ މަރުކަޒު ބިނާ ކުރަން ކަނޑައަޅާފައި ވަނީ ހިތަދޫގައި ހުރި ގައުމީ ޔުނިވަސިޓީގެ ދަނާލުގެ ފުރަގަހުން ލިންކް ރޯޑާ ދިމާލުން އޮތް ބިމެވެ.