އައްޑޫގެ މިސްކިތްތައް މަރާމާތު ކުރަން އެއް މިލިއަން ރުފިޔާ ހަމަޖައްސައި، އެކަން އައްޑޫ ސިޓީ ކައުންސިލަށް އަންގާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުންގެ ސުވާލްތަކަށް ޖަވާބު ދެއްވަމުން މިނިސްޓަރު ވިދާޅުވީ އައްޑުއަކީ ރާއްޖޭގައި އެންމެ މިސްކިތްތައް ގިނަ ސިޓީ ކަމަށެވެ.
އެގޮތުން އައްޑޫގެ 65 މިސްކިތެއްގެ މިހާރުގެ މަރާމާތަށް އެއް މިލިއަން ރުފިޔާ ހަމަޖައްސައި ދީފައިވާ ކަމަށް ވިދާޅުވި އެވެ.
މިނިސްޓަރު އިތުރަށް ވިދާޅުވީ ދައުލަތުގެ ބަޖެޓަށް ބުރައަކަށް ނުވާނޭ ގޮތަށް އައްޑޫގައި އިސްލާމީ ކަންތައްތައްކަށް ބޭނުންވާ ފައިސާ ހޯދުމަށްޓަކައި، އެ ސިޓީގައި ކުއްޔައްދޭނެ ވަގުފް އިމާރާތެއް ހަދަން ނިންމާފައިވާ ކަމަށެވެ.
އަދި މި އަހަރުގެ ކުރީކޮޅު ކައުންސިލަށް އެކަން ވަނީ އަންގައިފަ އެވެ. އަދި އެ އިމާރާތް އަޅާނެ ބިން މިހާރު ރަސްމީކޮށް ހަމަޖެހިފައިވާ ކަމަށާއި އިމާރާތަށް ގާތްގަނޑަކަށް ފަސް މިލިއަން ރުފިޔާ ޚަރަދުވާނެ ކަމަށް މިނިސްޓަރު ވިދާޅުވި އެވެ.
"މި އިމާރާތް ކުއްޔަށްދީގެން ލިބޭ ފައިސާ ޚަދަރުކުރާނީ އެ ސިޓީގެ ކައުންސިލްގެ ބެލުމުގެ ދަށުން، އެ ސިޓީގެ އިސްލާމީ ކަންކަމަށް. އޭގެ ތެރޭގައި މިސްކިތްތައް މަރާމާތުކުރުމާއި ޤުރުއާން ކިޔަވައިދިނުން ފަދަ ކަންކަން ހިމެނޭނެ. މިއީ މި ގޮތުން އަތޮޅެއްގައި ގާއިމުކުރެވޭ މިފަދަ ފުރަތަމަ އިމާރާތް،"ޝަހީމް ވިދާޅުވި އެވެ. "މި އިމާރާތް އެޅުމަށް ބޭނުންވާ ފައިސާގެ އެހީތެރިކަން ލިބޭތޯ އަޅުގަނޑު މިދަނީ ޖިއްދާގައި ހުންނަ އިސްލާމިކް ޑިވެލޮޕްމަންޓް ބޭންކާ ވާހަކަ ދައްކަމުން. އެތަނުން އެހީ ނުލިބިއްޖެ ނަމަ، އިސްލާމިކް މިނިސްޓްރީގެ ކޮންމެވެސް ފަންޑަކުން ވެސް މިކަން ކުރެވިދާނެ ވާހަކަ ދަންނަވަން."