ކުރީގެ ރައީސް މުހައްމަދު ނަޝީދު އުފައްދަވަން ނިންމާފައިވާ ޕާޓީ އުފެއްދުމުގެ ހުއްދަ އަށް އެދި މިއަދު އިލެކްޝަން ކޮމިޝަން (އީސީ) އަށް ހުށަހަޅަން ނިންމައިފި އެވެ.
މިކަމާ ބެހޭ ގޮތުން ނަޝީދުގެ "ފިކުރެއްގެ ދިރުން" ފެކްޝަނުން ބުނީ ޕާޓީ އެކަމުގެ ފޯމު އީސީ އަށް ހުށަހަޅަން ނިންމާފައި ވަނީ މެންދުރު 12:45 ގައި ކަމަށެވެ.
ޕާޓީ އުފައްދަން މިއަދު ފޯމް ހުށަހަޅަން ނިންމި އިރު، ޕާޓީ އަށް ކިޔާނެ ނަމެއް ހޯދަން އާންމުކޮށް އޮތީ ހުޅުވާލައިފަ އެވެ. ނަޝީދު އިސްކޮށް ހުންނަވައިގެން އާ ޕާޓީއެއް އުފައްދަން ނިންމިކަން "ފިކުރެއްގެ ދިރުން" ފެކްޝަނުން އިއުލާންކުރީ މިދިޔަ ބުދަ ދުވަހު އެވެ. އެ ދުވަހު އެ ފެކްޝަނަށް ނިސްބަތްވާ މަޖިލީހުގެ 12 މެމްބަރަކު އެމްޑީޕީން ވަކިވެވަޑައިގެންފައިވެ އެވެ. ނަމަވެސް ނަޝީދު އަދި އެމްޑީޕީން އިސްތިއުފާއެއް ނުދެއްވަ އެވެ.
އާ ޕާޓީއެއް އުފެއްދުމަށް ފަހު، "ފިކުރެއްގެ ދިރުން" އިން މި އަހަރުގެ ރިޔާސީ އިންތިހާބަށް ވާދަކުރަން ވެސް ވަނީ ނިންމައިފަ އެވެ.
ނަޝީދު އެމްޑީގެ ރައީސަކަށް ހުންނަވައިގެން ޕާޓީގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހާ ދެކޮޅަށް "ފިކުރެއްގެ ދިރުން" ފެކްޝަން ހައްދަވައިގެން ފާޅުގައި ނުކުންނެވީ ޖެނުއަރީގައި ބޭއްވި ރިޔާސީ ޕްރައިމަރީގައި ބޮޑުތަކުން ބަލިވެވަޑައިގަތުމާ ގުޅިގެންނެވެ.
ނަޝީދު އުފައްދަވާ އާ ޕާޓީގެ ތަރުޖަމާނަކަށް އިއްޔެ ވަނީ އަފްޝަން ލަތީފު ހަމަޖައްސައިފަ އެވެ. އޭނަ އަކީ މިދިޔަ ހަފުތާގައި ލޯކަލް ގަވަރަމަންޓް އޮތޯރިޓީ (އެލްޖީއޭ) ގެ ރައީސްކަމުން އިސްތިއުފާ ދެއްވި ބޭފުޅާ އެވެ.