ރާއްޖޭން އެންމެ ފުރަތަމަ އިސްލާމްވި ކަމަށް ބުނާ ސ. މީދޫގައި ހައިބަތު ހުރި މިސްކިތެއް ބިނާ ކުރަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކުރިމަތި ކުރެއްވި ސުވާލްތަކަށް ޖަވާބު ދެއްވަމުން މިނިސްޓަރު ވިދާޅުވީ މީދު އަކީ ވަރަށް މުހިންމު ތާރީހީ ބިނާތަކާއި ސަގާފަތެއް އޮތް އަދި އިލްމީ އެތައް ދަރީންނެއްގެ އުފަން ބިމެއް ކަމަށެވެ.
އެހެންކަމުން އެ ރަށުގެ ހައިބަތާއި ގަދަރުވެރިކަމާ ގުޅޭ މިސްކިތެއް އެ ރަށުގައި ގާއިމުވެފައި ނުވާތީ، އެ ރަށުގައި އެ ފެންވަރުގެ މިސްކިތެއް ބިނާ ކުރުމަށް ސަރުކާރުން ވަނީ ނިންމާފައި ކަމަށް ޑރ. ޝަހީމް ވިދާޅުވި އެވެ.
އަދި އެ ކަމަށް މި އަހަރުގެ ބަޖެޓްގައި ފައިސާ ހިމަނައި، މިސްކިތް އަޅާދޭނެ ފަރާތެއް ހޯދުމަށް، ދެ ފަހަރަށް ޓެންޑަރަށް ވެސް ލި ކަމަށް ޑރ. ޝަހީމް ވިދާޅުވި އެވެ.
އެހެން ނަމަވެސް ދެ ފަހަރު ވެސް އެ މަސައްކަތް ކޮށްދިނުމަށް އެއްވެސް ފަރާތަކުން ކުރިމަތިލާފައި ނުވާތީ އެމަސައްކަތް ފެށުން ލަސްވެފައިވާ ކަމަށް މިނިސްޓަރު ވިދާޅުވި އެވެ.