މި އަހަރުގެ ބޮޑު އީދު އައްޑޫގައި ކުގަދަކޮށް ކައުންސިލާ ގުޅިގެން ހަރަކާތްތައް ހިންގަން ބޭނުންވާ އަމިއްލަ ފަރާތަތަކަށް އެ ފުރުސަތު ހުޅުވާލައިފަ އެވެ.
މި އަހަރުގެ ބޮޑު އީދު، މިދިޔަ އަހަރެކޭ އެއްގޮތަށް "އައްޑޫ އީދި ސަމާ" ގެ ނަމުގައި ކުރިއަށް ގެންނަން ނިންމާފައި އިރު އަންނަ މަހުގެ 27 އިން ޖުލައި 1 އަށް އައްޑޫގައި ހަ އަވަށުގައި ތަފާތު ގިނަ ހަރަކާތްތަކެއް ހިންގަން ކައުންސިލުން ވަނީ ނިންމައިފަ އެވެ. އޭގެ ތެރޭގައި ތަފާތު ކުޅިވަރު މުބާރާތްތަކާއި މިއުޒިކް ޝޯއެއް ވެސް ހިމެނެ އެވެ.
އެހެންވެ އީދުގެ ހަރަކާތްތައް ކައުންސިލާ ގުޅިގެން ހިންގަން ޝައުގުވެރިވާ ފަރާތްތަކަށް އެކަމަށް އެދި ޕްރޮޕޯސަލް ހުށަހެޅުމުގެ ފުރުސަތު މި މަހުގެ 28 އާ ހަމައަށް ވަނީ ހުޅުވާލައިފަ އެވެ. މިކަމާ ބެހޭ އިތުރު މައުލޫމާތު ކައުންސިލްގެ ޕަބްލިކް ރިލޭޝަންސް އޮފިސަރު ސިމާން ހާދީގެ ނަމްބަރު 7741155 އަށް ގުޅައިގެން ހޯދޭނެ އެވެ.
ކައުންސިލުން މިހާރު އޮތީ "އައްޑޫ އީދި ސަމާ' އަށް ސްޕޮންސަރުން ހޯދުމަށާއި އިވެންޓްތަކުގެ ތެރޭގައި ސްޓޯލްތަކާއި ކެންޓީން ހިންގަން ބޭނުންވާ ފަރާތްތަކުގެ އިތުރުން ޝޯގައި ޕަފޯމްކުރަން ބޭނުންވާ ފަރާތްތަތަކަށް ވެސް އެކަމަށް އެދި ހުށަހެޅުމުގެ ފުރުސަތު ހުޅުވާލައިފަ އެވެ.
މިދިޔަ އަހަރު ބޮޑު އީދު ފާހަގަކުރަން ކައުންސިލުން 200،000ރ. ހޭދަކުރި އިރު، އައްޑޫގެ ހަ އަވަށުގައި އެކި ކަހަލަ ހަރަކާތްތަް ކުރިއަށް ގެންދިޔަ އެވެ. އަދި އެކަމަށް ގިނަ ބައެއްގެ އެހީތެރިކަމާއި އެއްބާރުލުން ވެސް ލިބުނެވެ.