ހިތަދޫ ކޮންވެންޝަން ސެންޓަރު ސަރަހައްދުން، ވަކި ކުރެވުނު ބައެއް އާއްމު ފަރާތްތަކުގެ ގޯތި އަނބުރާ އެފަރާތްތަކަށް ދިނުމަށް އައްޑޫ ސިޓީ ކައުންސިލުން ނިންމައިފި އެވެ.
ކުރީގެ ރައީސް މުހައްމަދު ނަޝީދުގެ ސަރުކާރުގެ ބޯ ހިޔާވަހިކަމުގެ މަޝްރޫއުގެ ދަށުން، ފްލެޓް އެޅުމަށްޓަށް ވަކި ކުރެވުނު ގޯތީގެ ބަދަލުގައި އެފަރާތްތަކަށް ބިން ހަމަ ޖައްސާ ނުދެވި އާއްމު ރައްޔިތުން އެކަމުގެ ޝަކުވާ ކުރަމުން ދަނިކޮށް އަލުން އެފަރާތްތަކަށް ގޯތި ދިނުމަށް ނިންމާފައިވަނީ މިދިޔަ އަންގާރަ ދުވަހު ބޭއްވި ކައުންސިލް ބައްދަލު ވުމުގައެވެ.
މައްސަލަ ކައުންސިލަށް ހުށަހެޅުއްވި ހިތަދޫ މެދު ދާއިރާގެ ކައުންސިލަރު ހުސެއިން ހިލްމި ވިދާޅުވީ، ވަކިކުރެވުނު ގޯތީގެ ބަދަލުގައި، ބިން ހަމަޖައްސައި ނުދެވި އޮތުމުން އެފަރާތްތަކަށް ނަފްސާނީ އަދި އިޖްތިމާއީ މައްސަލަ ކުރިމަތި ވަމުން އަންނަ ކަމަށެވެ.
ހުސެއިން ހިލްމީ ވިދާޅުވީ އަލުން އެފަރާތްތަކަށް ގޯތި ހަވަލު ކުރާނީ 6 މަސް ދުވަހުގެ ތެރޭގައި އެތަނުގެ އިންވަކިކޮށް، ފައުންޑެޝަން އަޅާ މަސައްކަތް ފަށާ ގޮތަށްކަމަށެވެ. ހުސެއިން ވިދާޅުވީ އެފަރާތްތަކަށް ކައުންސިލުން ބިން ހަވާލު ކުރުމުގެ މަސައްކަތް ކުރަމުން އަންނަ ކަމަށެވެ.
"ކައުންސިލުން ނިންމީ މިހާރި ފްލެޓް އެޅުމަށް ބިން ހަމަޖައްސައި، ފެންސް ޖަހާފައިވާ ސަރަހައްދު ނޫން އެހެން ސަރަހައްދު ތަކުން ކުރިން ދޫ ކުރި ގޯތިތައް އޭގެ ހައްގުވެރިންނަށް އަނބުރާ ދިނުމަށް."
އީސީސީ ހިމެނޭ ސަރަހައްދުން ދޫކުރި ބިން ފްލެޓް އެޅުމަށްޓަކައި ނެގުމާއި ގުޅިގެން، ކައުންސިލަށް ވަބީ ބޮޑެތި ފާޑު ކިއުންތައް އަމާޒުވެފައެވެ.