ސިފައިންގެ މުސާރަ ބޮޑުކުރުމުގެ މަސައްކަތް ކުރިއަށްދާ ކަމަށް ޑިފެންސް މިނިސްޓަރު މާރިޔާ އަހުމަދު ވިދާޅުވެއްޖެ އެވެ.
ސިފައިންގެ އެޖުޓަންޓް ޖެނަރަލް ކޯގެ 3 ވަނަ އަހަރީ ދުވަސް ފާހަގަ ކުރުމުގެ ގޮތުން ރޭ ބޭއްވި ރަސްމިއްޔާތުވައި މިނިސްޓަރު ވިދާޅުވި ގޮތުގައި ދާދި ފަހުން ރައީސް އިބްރާހީމް މުހައްމަދު ސޯލިހު ވިދާޅުވެފައިވާ ގޮތުގެ މަތިން ސަރުކާރުގެ ޕޭ ހާމަނައިޒޭޝަން އިނީޝިއޭޓިވްގެ ތެރެއިން ސިފައިންގެ މުސާރަ އަށް ވެސް ހެޔޮ ބަދަލް ގެނައުމުގެ މަސައްކަތްތައް ހަލުވިކަމާއެކު މިހާރު ކުރިއަށް ގެންދަވާ ކަމަށް ވިދާޅުވި އެވެ.
އެހެންވެ މާ ލަސްތަކެއް ނުވެ ސިފައިންގެ މުސާރަ ބޮޑުވެގެން ދާނެ ކަމަށް ވިދާޅުވި އެވެ.
މީގެ އިތުރުން ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށް ދޭން ހިންގާ "ސިފްކޯ ހިޔާ" ފުލެޓް މަޝްރޫއުގެ ތެރެއިން ފްލެޓްތަކުގެ ކުއްޔަށް ވެސް ލުޔެއް ދެއްވުމަށް ރައީސް ނިންމަވާފައިވާ ކަމަށް މިނިސްޓަރު ވިދާޅުވި އެވެ.
ސިފައިންނާއި ފުލުހުންގެ މުސާރަ ބޮޑުކުރަން ނިންމާފައިވާ ކަމަށް ރައީސް ވިދާޅުވީ ފުލުހުންގެ 90 ވަނަ އަހަރީ ދުވަސް ފާހަގަކުރަން މިދިޔަ މަހުގެ 29 ވަނަ ދުވަހުގެ ރޭ ބޭއްވި ޖަލްސާގަ އެވެ. އެ ރޭ ރައީސް ވިދާޅުވީ ޕޭ ހާމަނައިޒޭޝަންގެ މަސައްކަތުގެ ތެރެއިން، ފުލުހުންނާއި ދިވެހި ސިފައިންގެ މުސާރައަށް ހެޔޮ ބަދަލުތަކެއް ގެންނާނަން.އެކަމާ ބެހޭ ދިރާސާތައް ޕޭ ކޮމިޝަނުން ކުރަމުން އަންނަ ކަމަށެވެ.