ވައިގެ މަގުން އައްޑޫ އެތެރެކުރި، ހަތްލައްކަ އަށްވުރެ ގިނަ ރުފިޔާގެ މަސްތުވާތަކެއްޗާއެކު ހައްޔަރު ކުރި މީހާގެ ބަންދަށް އިތުރު 15 ދުވަސް ހިތަދޫ މެޖިސްޓްރޭޓް ކޯޓުން ދީފި އެވެ.
މި މައްސަލާގައި ހައްޔަރުކޮށްފައިވާ މީހާގެ ބަންދަށް ދިން 15 ދުވަހުގެ މައްދަތު މިއަދަށް ހަމަވުމުން އޭނާގެ ބަންދާއިމެދު ގޮތެއް ނިންމުމަށް ކޯޓަށް ޙާޟިރު ކުރުމުން، ކޯޓުން ވަނީ މިނިސްޓްރީ އޮފް ހޯމް އެފެއާޒުން ކަނޑައަޅާތަނެއްގައި ބަންދުގައި ބަހައްޓައިގެން ތަޙުޤީޤު ކުރިއަށް ގެންދިއުމަށް އިތުރު 15 ދުވަހުގެ މައްދަތެއް ދީފަ އެވެ.
ޕޮލިސް އިންޓެލިޖެންސާއި އައްޑޫގައި މަސައްކަތްކުރާ ފުލުހުން ގުޅިގެން ހިންގި ހާއްސަ އޮޕަރޭޝަނެއްގައި އެމީހާ އަތުލައިގެންފައި ވަނީ ޖުލައި މަހުގެ 16 ވަނަ ދުވަހު ވައިގެ މަގުން އައްޑޫއަށް އައި ތަނުން ނެވެ.
އޭނާ އަތުލައިގެން ޗެކް ކުރި އިރު މަސްތުވާތެކެތި އެތެރެ ކޮށްފައިވަނީ އޭނާގެ ދެ ފައިގެ ދެ ފަލަމަސްގަނޑުގައި ޓޭޕް އަޅައި ރައްކާކޮށްގެންނެވެ. އޭނާގެ ފަލަމަސްގަނޑުގައި ބަނދެފައިވަނިކޮށް ފެނިފައިވަނީ ކޮކެއިންކަމަށް އެތަކެތީގެ ތަހުލީލު ރިޕޯޓުން ދައްކައެވެ.
މި މައްސަލަ އައްޑޫ ސިޓީ ހިތަދޫ ޕޮލިސް ސްޓޭޝަނުން ދަނީ ތަޙުޤީޤު ކުރަމުންނެވެ.