މީގެ 55 އަހަރު ކުރިން ރިލީޒްކުރި މަޝްހޫރު ފިލްމު "ރޯމިއޯ އެންޑް ޖޫލިއަޓް" ގެ ތަރިން އެ ފިލްމު އުފެއްދި ޕެރަމައުންޓާ ދެކޮޅަށް ކޯޓަށް ޖެނުއަރީ މަހު ހުށަހެޅި މައްސަލަ ބޭރުކޮށްލައިފި އެވެ.
ފްރާންކޯ ޒެފިރެލީ 1968 ގައި ޑައިރެކްޓްކުރި ފިލްމުގެ ޓައިޓްލް ރޯލުތައް ކުޅުނު ތަރިން ކަމަށްވާ މިހާރު އުމުރުން 72 އަހަރުގެ ލިއޮނާޑޯ ވައިޓިން އާއި 71 އަހަރުގެ އޮލިވާ ހަޒީ، ޕެރަމައުންޓަށް ދައުވާކުރީ އެ މީހުންގެ ޅަ އުމުރުގައި ބަރަހަނާ މަންޒަރުތަކެއް ކުޅުވައި، އޭގެ ސަބަބުން ނަފުސާނީ ގޮތުންނާއި މާލީ ގޮތުން ވެސް ކުރިމަތިލާން ޖެހުނު ގެއްލުންތަކާ ހެދި ކަމަށް ބުނެ އެވެ.
އޮކްޓޯބަރު 19، 1968 ގައި ރިލީޒްކުރި "ރޯމިއޯ އެންޑް ޖޫލިއަޓް" ކުޅުނު އިރު، ވައިޓިން އަށް 16 އަހަރެވެ. އަދި އޮލިވާ އަށް 15 އަހަރެވެ. އެ ފިލްމު ރިލީޒްކުރިތާ ބައި ގަރުނަށް ވުރެ ދުވަސް ފަހުން ޕެރަމައުންޓާ ދެކޮޅަށް ދައުވާކުރި އިރު، ފިލްމުގެ ޑައިރެކްޓަރު ފްރާންކޯ ވަނީ 96 އަހަރުގައި 2019 ގައި މަރުވެފަ އެވެ.
ވައިޓިން އާއި އޮލިވާ ޕެރަމައުންޓާ ދެކޮޅަށް ހުށަހެޅި މައްސަލާގައި ބުނެފައި ވަނީ އެ މީހުން ލައްވައި ފިލްމު ކުޅުވި އިރު، ބަރަހަނާ އެއްވެސް މަންޒަރެއް ފިލްމުގައި ނުހިމެނޭނެކަން އޭގެ ޓީމުން ކަށަވަރުކޮށް ދިން ކަމަށެވެ. އަދި ގައިގޯޅި މަންޒަރުތަކެއް ކުޅެން ޖެހުނަސް، އެ މީހުން ބަރަހަނާވާ ކަހަލަ އެއްވެސް ކޮސްޓިއުމެއް ވެސް އެފަދަ އެއްވެސް މަންޒަރެއް ފިލްމުގައި ނުހިމަނާނެކަމުގެ ޔަގީންކަން ވެސް ދިނެވެ.
ނަމަވެސް "ރޯމިއޯ އެންޑް ޖޫލިއަޓް" ސިނަމާތަކަށް ގެނައި އިރު، އެ މީހުން ބަރަހަނާވާ ގޮތަށް މަންޒަރުތަކެއް ޝޫޓްކޮށް، ފިލްމުގައި ހިމަނާފައިވާ ކަމަށް ބުނެފައިވެ ވެ. ދެ ތަރިން ބުނެފައިވާ ގޮތުގައި ޕެރަމައުންޓްގެ އެ އަމަލަކީ އުމުރުން 18 އަހަރު ވެސް ނުވާ ކުދިންތަކެއް ޖިންސީ ގޮތުން ނަހަމަ ގޮތުގައި ބޭނުންކޮށް، ވިޔަފާރި އަށް އެކަން ބޭނުން ކުރުމެވެ. އަދި އެކަމާ ގުޅިގެން "ރޯމިއޯ އެންޑް ޖޫލިއަޓް" ރިލީޒްވި ފަހުން ނަފުސާނީ ގޮތުން ބޮޑެތި ނޭދެވޭ އަސަރުތަކެއްކޮށް، އަދި އެ މީހުންނަށް ފަހުން ވަޒީފާއެއް ހޯދުން ކަހަލަ ކަންކަމަށް ވެސް ބޮޑެތި ގޮންޖެހުންތަކެއް ކުރިމަތިވި ކަމަށް ދައުވާގައި ބުނެފައިވެ އެވެ.
ވައިޓިން އާއި އޮލިވާ ޕެރަމައުންޓާ ދެކޮޅަށް ދައުވާކުރީ ލިބުނު ގެއްލުމުގެ ބަދަލަށް 500 މިލިއަނަށް ވުރެ ބޮޑު ބަދަލެއް ނަގައި ދިނުމަށެވެ. "ރޯމިއޯ އެންޑް ޖޫލިއަޓް" އަކީ 850،000 ޑޮލަރުން އުފައްދައި ބޮކްސް އޮފީހުގައި 38.9 މިލިއަން ޑޮލަރުގެ އާމްދަނީއެއް ހޯދި ފިލްމެކެވެ.
ފިލްމުގެ ތަރިން، އެ އުފެއްދި ސްޓޫޑިއޯއާ ދެކޮޅަށް ހުށަހެޅި މައްސަލަ ބޭރުކޮށްލުމާ ގުޅޭ ގޮތުން ލޮސް އެންޖެލިސް ސުޕޯރިއާ ކޯޓުން ބުނީ ދައުވާގެ ބޭނުމަކަށްވީ "އަމިއްލަ މަންފާއެއް ހޯދުން" ކަމަށާއި "ދައުވާ އިން ކުޑަކުދިން ނަހަމަ ގޮތުގައި ބޭނުންކުރިކަމާ ގުޅޭ މައްސަލައަކަށް ވެސް ނުފެތޭ" ކަމަށެވެ. އެހެންވެ އަސާސް ނެތް މައްސަލައަކަށްވާތީ ކޯޓުން މައްސަލަ ބޭރުކޮށްލީ ކަމަށް ބުނެފައިވެ އެވެ.
މިކަމާ ގުޅިގެން ވައިޓިން އާއި އޮލިވާ ބުނީ މައްސަލަ އިސްތިއުނާފު ކުރާނެ ކަމަށާއި ކިތަންމެ ދިގުލައިގެން ދިިޔަސް އެ މީހުންނަށް ލިބުނު ހޯދަން ކުރާ މަސައްކަތް ހުއްޓައި ނުލާނެ ކަމަށެވެ.