ވެރިކަމާ ހަވާލުވެވަޑައިގަތް އިރު ރާއްޖެ އޮތީ ވަރަށް ބޮޑެތި ސިޔާސީ ހިޔާލު ތަފާތުވުންތަކުގެ ތެރޭގައި ކަމަށް މި ސަރުކާރު އައުމަށް ފަހު އެ ބިރު ފިލައި، ރާއްޖެ އަށް މިހާރު ހަމަޖެހުން އައިސްފައިވާ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ފ. އަތޮޅުގެ މިލަންދޫގެ ރައްޔިތުންނާ އެކީ ބޭއްވި ބައްދަލުވުމުގައި ރައީސް ވިދާޅުވީ އެ މަނިކުފާނު 2018 ގައި ވެރިކަމާ ހަވާލުވެވަޑައިގެންނެވިއިރު ރާއްޖެ އޮތީ ވަރަށް ހަލަބޮލިކަމަކާއި ބިރުވެރިކަމެއްގެ ތެރޭގައި ކަމަށެވެ. އަދި އެ ސަބަބާ ހުރެ އެންމެ ބޮޑު އިސްކަމެއް ދެއްވީ ގައުމުގައި ހަމަޖެހުން ގާއިމްކޮށްދެއްވުމަށް ކަމަށް ވިދާޅުވި އެވެ.
"އިރާދަކުރެއްވިޔާ މި ފަސް އަހަރު ނިމިގެންދާ އިރު މާލެއަށް، މުޅި ރާއްޖެއަށް، އެކި ރަށްރަށުގައި އަޅުގަނޑު ދަންނަވާލާނީ ކުރީގައި އެ އޮތް ހަމަނުޖެހުމާއި ބިރުވެރިކަން ބޮޑުތަނުން ދަށްވެއްޖެއޭ،' ރައީސް ވިދާޅުވި އެވެ. "ހަމަޖެހުމެއް ނެތް، އުސޫލެއް ނެތް، ބިރުވެރިކަމެއްގެ ތެރޭގައި މުޅި ރައްޔިތުން އުޅުނީ. އަޅުގަނޑުމެންގެ އެންމެ މުހިންމު މަސައްކަތަކަށްވީ މުޅި ރާއްޖޭގައި ހަމަޖެހުން ގާއިމުކޮށްދިނުން. ސްޓެބިލިޓީ ގާއިމުކުރުން. ސުލްހަ ގާއިމްކުރުން. އެންމެން އެކީގައި އުޅެވޭނެ ގޮތެއް."
އެ މަނިކުފާނު ވިދާޅިވީ ސިޔާސީ ވިސްނުން ތަފާތުވިޔަސް، އެންމެން އެކީގައި އުޅެވޭނެ ގޮތެއް ހޯދައި ދެވިއްޖެ ކަމަށެވެ. އަދި މި ސަރުކާރުގެ އަމާޒަކީ އަބަދު ވެސް ހިޔާލު ތަފާތުވުންތަކާ އެކީގައި ވެސް ރައްޔިތުންނަށް ބޭނުންވާ ތަރައްގީ ގެނެސްދިނުމުގައި އެންމެ އެކީގައި މަސައްކަތްކުރުން ކަމަށް ވިދާޅުވި އެވެ.
"އެއަށް ފަހު އެކުއެކީ މަސައްކަތްކޮށް ހުރިހާ ރަށަކަށް، އެ ހުރިހާ ރަށެއްގެ ރައްޔިތަކު އުޅޭ ރަށެއް މާލެއާއި ކައިރި ތަނެއް ނުބަލާ ބޭނުންވާ އަސާސީ ޚިދުމަތްތައް ޔަޤީންކޮށް ދިނުން" ރައީސް ވިދާޅުވި އެވެ.