އެމްޓީސީސީ މެދުވެރިކޮށް މިދިޔަ އަހަރު ރާއްޖެ ޓްރާންސްޕޯޓް ލިންކް އާރްޓީއެލް) ގެ ދަށުން ދެމުން އަންނަ ފެރީގެ ހިދުމަތުން އަންނަ އަހަރު މުޅި ރާއްޖެ ގުޅުވައިލެވޭނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ރައީސް އިބްރާހީމް މުހައްމަދު ސޯލިހާ އެކީ ފ. އަތޮޅަށް މިހާރު ކުރައްވަމުން ގެންދަވާ ދަތުރުގެ ތެރެއިން ދަރަނބޫދޫގެ ބަނދަރު ހުޅުވަން ބޭއްވި ރަސްމިއްޔާތުގައި މިނިސްޓަރު ވިދާޅުވީ ސަރުކާރުގެ މިހާރުގެ އަމާޒަކީ ފެރީ ނިޒާމުން މުޅި ރާއްޖެ އެކީ ގުޅުވައިލުން ކަމަށެވެ. އެއީ ފަސޭކަމާ އެކީ އަތޮޅުތަކުގައި މެދުގައި ދަތުރުތައް ކުރެވި އިގުތިސާދީ ހަރަކާތްތައް ވެސް އިތުރުވާން ފަށާނެ ކަމަށް އަސްލަމް ވިދާޅުވި އެވެ.
އޭނަ ވިދާޅުވި ގޮތުގައި މި ސަރުކާރުން ކޮންމެ ކަމެއް ވެސް ކުރަމުން އަންނަ ދުރާލައި ރާވައި، ވަރަށް ރަނގަޅު އިންތިޒާމުތަކެއްގެ ތެރެއިން، އަދި ކުރަން އުޅެނީ ކޮން ކަމެއްތޯ ރަނގަޅަށް އެނގިގެން ކަމަށެވެ.
އަސްލަމް ވިދާޅުވި ގޮތުގައި އާރްޓީއެލް ފެރީގެ ހިދުމަތް ފެށިތާ މިހާރު އަހަރެެއްވެފައިވާ އިރު، ދެން އެންމެ އަވަހަށް އެ ހިދުނަތް ތައާރަފުކުރާނީ ހުވަދު އަތޮޅުގަ އެވެ. އެއީ ޖުލައި މަހުގެ ތެރޭގަ އެވެ. އޭގެ ފަހުން މުޅި ދެކުނު ފެރީން ގުޅައިލާނެ އެވެ. އާރްޓީއެލް ފެރީގެ ހިދުމަތް އެންމެ ފުރަތަމަ ފެށީ ހއ. އާއި ހދ. އާއި ށ. އަތޮޅުގަ އެެވ. އޭގެ ފަހުން މިހާރު އި ޅ. އަތޮޅުގައި ވެސް އަންނަނީ ހިދުމަތް ދެމުންނެވެ.
މި ހިދުމަތް ފޯރުކޮށް ދޭން ނިންމާފައި އޮތީ ޒޯންތަކަކަށް ބަހާލައިގެނެވެ. އެގޮތުން ފުރަތަމަ ފިޔަވަހީގެ ޒޯން އެކެއް ގައި ހިމެނެނީ ހއ. ހދ. އަދި ށ. އަތޮޅެވެ. ދެވަނަ އާއި ތިން ވަނަ ފިޔަވަހީގެ ޒޯން ދޭއްގައި ނ. ރ. ބ. އަދި ޅ. އަތޮޅު ހިމެނޭއިރު ޒޯން ތިނެއްގައި ހިމެނެނީ ކ. އއ. އދ. އަދި ވ. އަތޮޅެވެ. ޒޯން ހަތަރެއްގައި މ، ފ، ދ، ތ އަދި ލ ހިމެނޭއިރު، ޒޯން ފަހެއްގައި ހިމެނެނީ ގއ އަދި ގދ އަތޮޅެވެ ޒޯން ހައެއްގައި އައްޑު އާއި ފުވައްމުލަކެވެ.
އާރްޓީއެލް ފެރީގެ ހިދުމަތް ފުޅާކުރަން ސަރުކާރުން މަސައްކަތްކުރަމުން އަންނަ އިރު، މި ހިދުމަތާ ބެހޭ ދިސާރާއެއް ހަދަން ޕްލޭނިން މިނިސްޓްރީން އޮތީ ނިންމައިފަ އެވެ.
އާރްޓީއެލްގެ ދަށުން ރާއްޖޭގެ ބައެއް ހިސާބުތަކުގައި އަންނަނީ ބަހުގެ ހިދުމަތް ވެސް ދެމުންނެވެ.