އެމްޑީޕީ އަބަދު ވެސް އޮންނާނީ ވަރަށް ގަދަކޮށް ކަމަށް އެ ޕާޓީގެ ކުރީފެ ޗެއާޕާސަން ރީކޯ މޫސާ މަނިކު ވިދާޅުވެއްޖެ އެވެ.
އެމްޑީޕީގެ ރައީސްގެ މަގާމުގައި ހުންނެވި މުހައްމަދު ނަޝީދު އަޑީގައި ހުންނަވައިގެން "ދަ ޑިމޮކްރެޓްސް" ގެ ނަމުގައި އާ ޕާޓީއެއް ރަޖިސްކުރަން މަސައްކަތް ކުރާތީ ރައީސް އިބްރާހީމް މުހައްމަދު ސޯލިހަށް ވަރަށް ބޮޑަށް ތާއީދުކުރައްވާ މޫސަ ކުރެއްވި ޓްވީޓެއްގައި ވިދާޅުވީ އެ ޕާޓީގައި އުޅުނު ބަޔަކު ކުރިން ވެސް ޕާޓީ ރޫޅައިލަން ލައްކަ މަސައްކަތްކުރި ކަމަށެވެ.
އަދި އެފަދަ ބައެއް މީސްމީހުން އުފެއްދި ޕާޓީތައް ފެނު ނުހިފަހައްޓައިގެން ދިޔައީ އަޑި އަށް ކަމަށް ވިދާޅުވި އެވެ.
"އެމްޑީޕީ އަބަދު ވެސް ގަދަކޮށް އޮންނާނެ." މޫސަ ވިދާޅުވި އެވެ.
MDP ރޫޅާލަން ސިޔާސީ ގޮތުން ބަލިކޮށްލަން މިޕާޓީގައުޅެފަ ދިއަ ބައެއްމީހުން މީގެކުރިންވެސް ލައްކަ މަސައްކަތްކުރި، ޢާޚިރުގަ އެމީސްމީހުން އުފެއްދި ޕާޓީތަށްވެސް ފެންނުހިފަހައްޓައިގެން ދިއައީ އަޑިއަށް
MDP އަބަދުވެސް އޮންނާނެ އރާދަކުރެއްވިއްޔާގަދަކޮށް އޮންނާނެ— Moosa Maniku (Reeko) (@ReekoMoosa) May 31, 2023
"ދަ ޑިމޮކްރެޓްސް" ރަޖިސްޓްރީކުރަން އިލެކްޝަން ކޮމިޝަން (އީސީ) އަށް މިއަދު ހުށަހަޅަން ވަނީ ނިންމައިފަ އެވެ. މި ޕާޓީ އުފައްދަން ނަޝީދަށް ތާއީދުކުރާ މަޖިލީހުގެ 12 މެމްބަރަކު އެމްޑީޕީން ވަކިވެވަޑައިގަތް ނަމަވެސް ނަޝީދު އަދިވެސް ހުންނެވީ އެމްޑީޕީގަ އެވެ.
ޕާޓީ އުފައްދައި ރިޔާސީ އިންތިހާބަށް ވާދަކުރަން ވެސް "ދަ ޑިމޮކްރެޓްސް" އިން އޮތީ ނިންމައިފަ އެވެ.
ރައީސް ސޯލިހާ ދެކޮޅަށް އަދި އެމްޑީޕީގެ އުސޫލުތަކާ ހިލާފަށް ނަޝީދު ފާޅުގައި ނުކުންނެވީ ޖެނުއަރީގައި ބޭއްވި ރިޔާސީ ޕްރައިމަރީން ބަލިވެވަޑައިގަތުމުންނެވެ.
އެމްޑީޕީން މިހާރު އަންނަނީ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ކެމްޕޭން ކުރަމުންނެވެ.