އަބަދުވެސް އިވެނީ ކޮންމެވެސް މޮޅު ފޯނެއްގެ އަޑެވެ. މޮޅު ޓީވީ އެއް ނޫނީ ކޮންމެވެސް މޮޅު ކާރެއްގެ އަޑެވެ. ޒަމާން ބަދަލުވެ ޓެކްނޮލޮޖީ އަށް އައިިސްފައިވާ ބަދަލުތަކާއި އެކު ހަމައެކަނި ތަރައްޤީ ވެގެން ދިޔައީ ފޯނުތަކާއި ކޮމްޕިއުޓަރު އަދި ޓީވީ ތަކެއް ނޫނެވެ. ދައްކަން މި އުޅެނީ ދުނިޔޭގެ ބޮޑެތި ގައުމުތަކުން އެމީހުންގެ ހަތިޔާރުތަކަށް ގެންނަމުންދާ ތަރައްޤީ އާއި ބަދަލުތަކުގެ ވާހަކައެވެ.
ފުރަތަމަ ބޮޑު ހަނގުރާމައިގެ ދުވަސްވަރުން ފެށިގެން މީގެ 20 ވަރަކަށް އަހަރު ކުރިއާއި ހަމަޔަށް ދިވެހިން ވަރަށް ހެވިލައިގެން ތިބެ ދެއްކި ވާހަކައެއް އޮވެ އެވެ. އެއީ ދިވެހި ރާއްޖޭގެ ރަށްތައް އުފެދިފައި އޮތް ގޮތުން މި ގައުމަށް ބޮން ނޭޅޭނެ ވާހަކަ އެވެ. އެއީ ތެދެކަށްވެސް ވެދާނެ އެވެ. އޭރު ބޮން އެޅީ ވަކި ޓާގެޓެއް ބަލައިގެނެއް ނޫނެވެ. އޭރިއާ ބޮމްބާޑްމެންޓް ކިޔާ ސިސްޓަމަކަށެވެ. އެ ސިސްޓަމަށް ބޮން އެޅި އިރު ބޮން އެޅި ބަޔަކަށްވެސް އެ ބޮން ގޮވާނެ ހިސާބެއް ޔަގީންކޮށް ބުނެދޭން ނޭނގެ އެވެ. އަހަރެމެންގެ ރަށްތައް ކުދިކަމުން އެއިރު މިއިން ރަށަކަށް ބޮމެއް އެޅުން ފަސޭހަ ކަމަކަށް ނުވާނެ ކަން އެއީ ޔަޤީން ކަމެކެވެ. އެހެން ކަމުން އަހަރެމެންގެ ކާބަފައިން ބުނަމުން އައިސްފައިވާ އެވާހަކަ ތެދަކަށް ވުން ވަރަށް ގާތެވެ.
ކޮންމެއަކަސް އެއީ އޭރުގެ ވާހަކަ އެވެ. ދެން އޮތީ މިހާރުގެ ވާހަކަ އެވެ. އެމެރިކާ އިން ލޯންޗް ކޮށްލާ ނިއުކްލިއާ މިސައިލަކަށް އެއައި ގޮތަށް އައިސް އަހަރެން ގޭގެ ކުޑަދޮރުން ވަދެ މޭޒު މަތީ ބަހަށްޓާފައި ހުންނަ މާ ޓުކުރިއެއް ގޮށްވާލުމަކީ އެހާ އަޖައިބު ކުރުވަނިވި ކަމަކަށް މިހާރަކު ނުވާނެ އެވެ. ބުނަން މި އުޅޭ ވާހަކަ އަކީ އަހަރެމެންގެ ދުނިޔޭގައި ހީވެސް ނުކުރާހާ ވަރުގަދަ އަދި ނުރައްކާތެރި ހަތިޔާރު އުފައްދަމުންދާ ވާހަކަ އެވެ.
މީގެ ކުރިން ލޭޒާ ބަޑި އަހަރެމެންނަށް ފެންނަމުން ދިޔައީ ކާޓޫނު އަދި ފިލްމް ތަކުންނެވެ. ދާދި އިހަކަށް ދުވަހު ޖަރުމަން ވިލާތުގެ ޑިފެންސް ފާމެއް ކަމަށްވާ ރެއިންމެޓަލް ޑިފެންސް އިން ވަނީ ލޭޒާ ބަޑިއެއް ހަދާފަ އެވެ. މި ދައްކަނީ ޖީބުގައި ބާއްވާ ފިސްތޯލެއްގެ ވާހަކައެއް ނޫނެވެ. މިއީ ރާޑަރުގެ އެހީގައި މަސަތްކަތް ކުރާ މާ ސިންގާ ބަޑިއެކެވެ. މީގެއިން ނެރޭ ލޭޒާ ބީމަކީ 50 ކިލޯވަޓްގެ ބީމެއް ކަމަށް އެ ކުންފުނީގެ އޮފިޝަލުން ބުނެ އެވެ. 2 ކިލޯމީޓަރު ދުރުން އުދުހިފައި ދާ ޖާސޫސް އުޅަނދެއް ވައްޓާލުން އެއީ މި ލޭޒާ ސިސްޓަމަށް މާ އުނދަގޫ ކަމަކަށް ނުވެ އެވެ. ޓެސްޓް ތަކުގައި މި ލޭޒާ ވަނީ 1 ކިލޯމީޓަރު ދުރުން ބޮޑެތި އިމާރާތް ކުރުމަށް ބޭނުން ކުރާ ސްޓީލް ބީމެއް މެދުން ބުރިކޮށްލާފަ އެވެ. އަދި 3 ކިލޯމީޓަރު ދުރުން ގަޑިއަކު 180 ކިލޯމީޓަރު ބާރުމިނުގައި އުދުހިފައި ދިޔަ ޖާސޫސް މަތިންދާ ބޯޓް ތަކެއް ވެސް ވަނީ އެ ސިސްޓަމްގައިވާ ރާޑަރުގެ އެހީގައި ކާމިޔާބު ކަމާއި އެކު ވައްޓާލާފަ އެވެ. ދެވަނަ ޓެސްޓަށް އިންޖިނިއަރުން ދަނީ މި ލޭޒާގެ ބާރު 2 ގުނަ އިތުރު ކުރުމަށް ވިސްނަމުން ކަމަށް އެ ކުންފުނީގެ އޮފިޝަލަކު ވަނީ ބުނެފަ އެވެ.
މިހާރު މިފަދަ ކިތަންމެ ހަތިޔާރެ ދުނިޔޭގައި އެބަ ތިއްބެވެ. ދެން ސުވާލަކީ "މި ހަތިޔާރުތަކާއި އެކު ދުނިޔެ 3 ވަނަ ބޮޑު ހަނގުރާމައަކަށް ގޮސްފިނަމަ ވާނީ ކިހިނެއް ބާ ؟" މި ސުވާލެވެ. ގިނަ މީހުން ބުނަނީ ދުނިޔެ ނެތި ފަނާ ވެދާނެ ކަމަށެވެ. ކޮންމެއަކަސް މިފަދަ ދުވަހެއް ދެކޭކަށް އެކަކުވެސް ބޭނުމެއް ނުވާނެ އެވެ. އެކަމަކު ގަބޫލު ކުރެވޭ ހަގީގަތަކީ، އެތައް ބިލިއަން ޑޮލަރެއް ހަރަދު ކޮށްގެން ގައުމުތަކުން ނުރައްކާތެރި ހަތިޔާރުތައް އުފައްދަނީ ރީއްޗަށް ފޮރުވާފައި ބަހަށްޓާކަށް ނޫން ކަމެވެ. އަދި ތިމަން މެނަށް އެ އެއްޗިހި ހެދޭކަން ދައްކާކަށްވެސް ނޫން ކަމެވެ. އެންމެންވެސް ތައްޔާރުވަނީ ކުރިމަތިލާން ޖެހިދާނެ ނުރައްކަލަކަށެވެ. ހަނގުރާމަ އަކަށެވެ.