އައްޑޫގެ ބޮޑެތި މަޝްރޫއުތައް ރަސްމީކޮށް ފައްޓަވައި ދެއްވުމަށް ރައީސް އިބްރާހީމް މުހައްމަދު މާދަމާ ހަވީރު އައްޑު އަށް ވަޑައިގަންނަވާ ގޮތަށް ހަމަޖެހިއްޖެ އެވެ.
ރައީސް ރާއްޖޭގެ އެންމެ ދެކުނުގެ ސިޓީ އަށް ވަޑައިގަންނަވާތީ ހޫނު މަރުހަބާއެއް ކިޔަން އެމްޑީޕީގެ މެމްބަރުން އަންނަނީ ތައްޔާރުވަމުންނެވެ.
މާދަމާ އައްޑު އަށް ވަޑައިގެން ރައީސް އެންމެ ފުރަތަމަ ރަސްމީކޮށް އިފުތިތާހުކޮށް ދެއްވާނީ މި ހަފުތާގައި އަމަލީ މަސައްކަތް ފެށި އައްޑޫ ބިން ހިއްކުމުގެ މަޝްރޫއެވެ. އެގޮތުން މާދަމާ ހަވީރު އެ މަޝްރޫއު އިފުތިތާހު ކުރުމަށް ބާއްވާ ރަސްމިއްޔާތު އޮންނާނީ މަރަދޫގަ އެވެ. އައްޑޫ ބިން ހިއްކުމުގެ މަޝްރޫއު އަކީ ރައީސް މިދިޔަ އަހަރުގެ މާޗް އައްޑު އަށް ކުރެއްވި ދަތުރުގައި މާޗް 27، 2022 ގައި ނެދަލޭންޑްސްގެ ކުންފުނި ވެން އޫޑްއާ ހަވާލުކުރި ޕްރޮޖެކްޓެކެވެ. މި މަޝްރޫއުގެ މަސައްކަތް މިހާރު އަންނަނީ ވަރަށް ބާރަށް ކުރިއަށެވެ.
މީގެ އިތުރުން އާދީއްތަ ދުވަހު ހަވީރު ގަމުގައި ބާއްވާ ރަސްމިއްޔާތެއްގައި ގަން އެއާޕޯޓް ތަރައްގީކުރުމުގެ މަޝްރޫއު ރައީސް ފައްޓަވައި ދެއްވާނެ އެވެ. މި މަޝްރޫއު ސަރުކާރުން ހަވާލުކޮށްފައި ވަނީ އިންޑިއާގެ ރިނާޓަސްއާ އެވެ. އެގޮތުން އެއްބަސްވުމުގައި ސޮއިކުރީ މިދިޔަ މާޗް މަހުގެ 5 ގަ އެވެ.
އާދީއްތަ ދުވަހު ގަން އެއާޕޯޓް މަޝްރޫއު އިފުތިތާހުކޮށް ދެއްވުމަށް ފަހު، އެރޭ ހިތަދޫ ސިޓީ ސްކެއާގައި ރައީސް އައްޑޫ ރައްޔިތުންނާ ވެސް ބައްދަލުކުރައްވާނެ އެވެ.
ރައީސްގެ އައްޑޫ ދަތުރުގައި ސަރުކާރުން މިހާރު އައްޑޫގައި ހިންގަމުން އަންނަ ބައެއް އެހެން މަޝްރޫއުތަކުގެ މަސައްކަތް ވެސް ކުރިއަށްދާ ގޮތަށް ބައްލަވާލައްވާނެ އެވެ. އައްޑޫގައި މިހާރު ކުރިއަށްދާ އެންމެ ބޮޑު އެއް މަޝްރޫއަކީ ހުރިހާ އަވަށެއްގެ މަގުތައް ހެދުމުގެ މަޝްރޫއެވެ. އެ މަސައްކަތް ކުރަނީ އިންޑިއާގެ އެފްކޮންސްއިންނެވެ.
ބިން ހިއްކުމާއި މަގު ހެދުމާއި އެއާޕޯޓް ތަރައްގީކުރުމުގެ މަޝްރޫއަކީ އިންޑިއާ ސަރުކާރުގެ 800 މިލިއަން ޑޮލަރުގެ ލައިން އޮފް ކްރެޑިޓް (އެލްއޯސީ) ގެ ދަށުން ކުރިއަށް ގެންދާ މަޝްރޫއުތަކެވެ.
ރައީސް ސޯލިހު އެންމެ ފަހުން އައްޑު ވަޑައިގެންނެވީ މިދިޔަ ޖެނުއަރީގަ އެވެ.