ދެހާސް އަށާވީސް ނިމިގެންދާ އިރު ރާއްޖޭގެ އިގުތިސާދު ދެގުނަވެގެން ދާނެ ކަމަށް ވެރިކަމުގެ ދެވަނަ ދައުރަކަށް ވާދަކުރައްވާ ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އައްޑު އަށް އެ މަނިކުފާނު ފެއްޓެވި ދަތުރުގެ ތެރެއިން އިއްޔެ ހަވީރު ބިން ހިއްކުމުގެ މަޝްރޫއު ފެށުމުގެ ރަސްމިއްޔާތުގައި ރައީސް ވިދާޅުވީ ސަރުކާރުގެ މި ފަސް އަހަރުގެ ތެރޭގައި ވެސް ރާއްޖޭގެ އިގުތިސާދީ ހާލަތު ރަނގަޅުކުރަން ގިނަ މަސައްކަތްތަކެއް ކުރެވި، އެދެވޭ އެތައް ހެޔޮ ބަދަލުތަކެއް ގެނެވިފައިވާ ކަމަށެވެ.
އަދި ކުރިއަށް އޮތް ފަސް އަހަރު ރާއްޖޭގެ އިގުތިސާދާ މެދު ކުރެވޭ އުންމީދުތައް ވަރަށް ބޮޑު ކަމަށް ރައީސް ވިދާޅުވި އެވެ. އެ މަނިކުފާނު ފާހަގަކުރެއްވި ގޮތުގައި 2018 ގައި ވެރިކަމާ ހަވާލުވެވަޑައިގަތް އިރު، ރާއްޖޭގެ ޖުމްލަ އުފެއްދުންތެރި ކަމަކީ 81 ބިލިއަން ރުފިޔާ އެވެ. އެކަމަކު މީގެ ފަސް އަހަރު ފަހުން ރާއްޖޭގެ އިގުތިސާދު ދެގުނަކޮށް، އުފެއްދުންތެރިކަން 177 ބިލިއަން ރުފިޔާއަށް ގެންދެވޭނެ ކަމަށް ރައީސް ވިދާޅުވި އެވެ.
"އެކަމަށް ބޭނުންވާ ހުރިހާ މަސައްކަތެއް މިހާރު މި ދަނީ ކުރަމުން. ރާއްޖޭގެ އުތުރާއި ދެކުނުގައި ސަރުކާރުން މި ވިއްދަނީ މުޅި ރާއްޖެ އެކުގައި އުފުލާލަދޭނެ އިޤްތިޞާދީ ދުންކަރާސް،" ރައީސް ވިދާޅުވި އެވެ. "އޭގެ ބުޑު ބަހައްޓާނެ ބިން އައްޑޫ ސިޓީގައި މިދަނީ ސަރާސަރުވެ ފެތުރެމުން. ރާއްޖެ އެކުގައި ތަރައްގީ ނުވެ."
ރައީސް ވިދާޅުވީ ދިވެހިން ބޭނުންވާ ކުރިއެރުމާއި ތަރައްގީ ލިބޭނީ މުޅި ރާއްޖެ އެއް ހަމައެއްގައި ކުރިއަރުވަން މަސައްކަތްކޮށްގެން ކަމަށެވެ.