ކަރަން ޖޯހަރުގެ ދަރްމާ ޕްރޮޑަކްޝަންގެ ކުރިއަށް ހުރި ފިލްމުތަކުގެ ތެރެއިން "ބްރަދާސް" ގެ ލީޑް ރޯލަށް އަކްޝޭ ކުމާރާއި ޖެކޮލިން ފެނާންޑޭޒްގެ އިތުރުން ސިދާތު މަލްއުތުރާ ސޮއިކޮށްފި އެވެ.
މިކަން ކަރަން ވަނީ ޓްވިޓާ މެދުވެރިކޮށް ފޭނުންނާ ހިއްސާ ވެސް ކޮށްފަ އެވެ.
އޭނާ ބުނީ "ބްރަދާސް" ސިނަމާތަކަށް އަންނާނީ އަންނަ އަހަރުގެ އޮކްޓޯބަރު މަހުގެ 2 ވަނަ ދުވަހު ކަމަށެވެ.
މި ފިލްމަކީ ކަރަންގެ ދަރްމާ އަށް އަކްޝޭ އާއި ޖެކޮލިން ކުޅޭ ފުރަތަމަ ފިލްމެވެ.
އެކަމަކު މިއީ މިއީ އަކްޝޭ އާއި ޖެކޮލިން އެއް ފިލްމަކުން ފެންނަ ފުރަތަމަ ފަހަރެއް ނޫނެވެ. އެ ދެ ތަރިން މީގެ ކުރިން ވަނީ "ހައުސްފުލް" ފްރެންޗައިޒްގައި މަަސައްކަތްކޮށްފަ އެވެ.
ނަމަވެސް މިއީ ޖެކޮލިން އާއި ސިދާތު އެކުގައި ކުޅޭ ފުރަތަމަ ފިލްމެވެ.
ސިދާތުއަކީ ކަރަން 2012 ގައި ޑައިރެކްޓް ކުރި "ސްޓުޑަންޓް އޮފް ދި އިޔާ" އިން ބޮލީވުޑަށް ލޯންޗް ކުރި ތަރިއެވެ.
"ބްރަދާސް" ޑައިރެކްޓް ކުރަން ހަމަޖެހިފައި ވަނީ ދަރްމާގެ "އަގްނީޕަތު" ގެ ޑައިރެކްޓަރު ކަރަން މަލްއުތުރާ އެވެ.
މިއީ ސަލްމާން ލީދް ރޯލް ކުޅޭ "ޝުއްދީ" ގެ ކުރިން ކަރަން ޑައިރެކްޓް ކުރާ ފުރަތަމަ ފިލްމެވެ.
"ޝުއްދީ" ސިނަމާތަކަށް އަންނާނީ 2016 ގަ އެވެ.
މީޑިއާ ރިޕޯޓްތައް ބުނާ ގޮތުން "ބްރަދާސް" އަކީ 2011 ގައި ނިކުތް ހޮލީވުޑްގެ ފިލްމް "ދަ ވޮރިއާ" އަސްލަކަށް ބަލައިގެން ހަދާ ފިލްމެކެވެ.
"ބްރަދާސް" ގެ މުހިއްމު ރޯލަކުން ޖެކީ ޝްރޮފް ވެސް ފެނިގެން ދާނެ އެވެ.