އޮންލައިންކޮށް ޓެކްސީ ހޯދަން ތައާރަފުކުރި "ދެކުނު ރައިޑް" ގެ ހިދުމަތް ހުއްޓުމަކަށް އަތުވެއްޖެ އެވެ.
މިކަމާ ގުޅޭ ގޮތުން އެތަނުން މިއަދު ނެރުނު ބަޔާނެއްގައި ބުނީ އެޕް މިހާރު ޑައުންލޯޑުން ނަގާފައިވާތީ ހިދުމަތް ހުއްޓުމަށް އައި ނަމަވެސް އެންމެ ދެކުނުގެ ހަތަރު އަތޮޅު ކަމަށްވާ ގދ. އާއި ގއ. އާއި ފުވައްމުލަކުގެ އިތުރުން އައްޑު އަށް ހިދުމަތް ދޭން ކުރާ މަސައްކަތް ހުއްޓުމަކަށް ނާންނާނެ ކަމަށެވެ.
"ދެކުނު ރައިޑް" އިން ބުނި ގޮތުގައި ހިދުމަތް މި ވަގުތު ހުއްޓުމަކަށް މިއީ ހިދުމަތާ ދެކޮޅަށް ބަޔަކު ކުރި މަސައްކަތްތަކެއްގެ ސަބަބުން ކަމަށެވެ.
"ނަތީޖާއއްގެ ގޮތުން ގޫގުލްޕްލޭ ސްޓޯރުން އަޅުގަނޑުމެންގެ އެޕްތައް މިއަދު ވަނީ ސަސްޕެންޑްކޮށް، ގޫގުލްޕްލޭ ކޮންސޯލް އެކައުންޓް ރިމޫވްކޮށްފައި،" ބަޔާނުގައި ބުންޏެވެ. "[އެކަމަކު] ދެކުނު ރައިޑް އެނބުރި އަންނާނެ."
"ދެކުނު ރައިޑް" އިން ބުނީ އެ ހިދުމަތް ފެށިގެން އައީ ޓެކްސީގެ ހިދުމަތް ޑިޖިޓަލައިޒްކުރެވި، މިހާރު ހުރި ޓެކްސީ ސެންޓަރުތައް އެޕްގެ ތެރެއިން މެނޭޖްކޮށް، ވިޔަފާރިއަކަށް ބުރެ ބޮޑަށް ރައްޔިތުންނަށް ދެވޭ ހިދުމަތްގެ ގޮތުގައި ކަމަށެވެ
"ދެކުނު ރައިޑް" ހުއްޓުމަކަށް އައި އިރު، ޓެކްސީގެ ހިދުމަތް ހޯދަން ހާއްސަ "އަވަސް ރައިޑް" އައްޑު އަށް ތައާރަފުކުރަން މިހާރު އަންނަނީ މަސައްކަތްކުރަމުންނެވެ.