ދުނިޔޭގެ އެންމެ ބޮޑު ފުލުހުންގެ މުއައްސަސާ "އިންޓަޕޯލް" ގެ އެމްބެސަޑަރަކަށް ބޮލީވުޑްގެ މަޝްހޫރު އެކްޓަރު ޝާހްރުކް ހާން ހަމަޖައްސައިފި އެވެ.
ރާވައިގެން ހިންގާ ބޮޑެތި ޖަރީމާތަކާ ދެކޮޅަށް އިންޓަޕޯލުން "ޓާން ބެކް ކްރައިމް" ގެ ނަމުގައި ކުރިއަށް ގެންދާ ކެމްޕޭނުގެ އެމްބެސަޑަރަކަށް ކާމިޔާބު ގިނަ ފިލްމަތަކެއް ކުޅެ، ދުނިޔޭގައި ދެވަނަ އަށް އެންމެ މުއްސަނދި އެކްޓަރުގެ ގޮތުގައި ހުރި ޝާހްރުކް ހަމަޖެއްސުމުން މިއީ ބޮލީވުޑްގެ ފަންނާނަކަށް މިފަދަ ޝަރަފެއް ލިބުނު ފުރަތަމަ ފަހަރުކަން ވެސް ފާހަގަކޮށްލެވެ އެވެ.
ޝާހްރުކް ވެސް ވަނީ މިއީ އޭނާ އަށް ލިބިގެން ދިޔަ ވަރަށް ބޮޑު ޝަރަފެއްގެ ގޮތުގައި ސިފަކޮށްފަ އެވެ. އަދި ކެމްޕޭން ހިންގުމަށް ވެވެން އޮތް ހުރިހާ އެހީތެރިކަމެއް ފޯރުކޮށް ދޭނެ ކަމަށް އޭނާ ބުންޏެވެ.
އުމުރުން 48 އަހަރުގެ ޝާހްރުކާ ބްރޭންޑް އެމްބެސެޑަރުކަން ރަސްމީކޮށް ހަވާލު ކުރީ ފްރާންސްގައި އިއްޔެ އޮތް ހާއްސަ ރަސްމިއްޔާތެއްގަ އެވެ.
"މި ކެމްޕޭނުގެ ތެރެއިން މުޅި ދުނިޔޭގައި ކުށްތައް ކުރުމަށް ހިންގާ ބޮޑެތި ޖަރީމާތައް ހުއްޓުވަން ވެވެން އޮތް ހުރިހާ މަސައްކަތެއް އަހަރަމެން ކުރާނަން. އަދި އިންސާފު ލިބެން ޖެހޭ ފަރާތްތަކަށް އިންސާފު ހޯދައި ދިނުމާއި އަދަބު ދޭން ޖެހޭ ފަރާތްތައް އިންސާފުގެ ކުރިމައްޗަށް ގެންނަން މަސައްކަތް ކުރާނަން،" ޝާހްރުކް ބުންޏެވެ. "ހުރިހާ އެންމެން ގުޅިގެން އެއް އަމާޒަކަށް މަސައްކަތްކޮށްފި ނަމަ ދުނިޔެއަކީ އަމަން ރައްކާތެރި އެންމެން ވެސް ހިތްހަމަޖެހިގެން އުފަލުގައި އުޅެވޭނެ ތަނަކަށް ވާނެ."
ޝާހްރުކާ އެމްބެސެޑަރުކަން ހަވާލު ކުރަން ބޭއްވި ރަސްމިއްޔާތުގައި އިންޓަޕޯލްގެ ސެކްރެޓަރީ ޖެނެރަލް ރޮނަލް ކޭ. ނޯބްލް ވިދާޅުވީ ޝާހްރުކްއަކީ އޭނާގެ ފިލްމުތަކުގެ ސަބަބުން އެތައް މިލިއަން ބައެއްގެ ދިރިއުޅުމަށް ހެޔޮ އަސަރުތަކެއް ކުރުވާފައިވާ ކުޅަދާނަ، ނުފޫޒް ގަދަ ޝަހުސިއްޔަތެެއް ކަމަށެވެ.
"އެހެންވެ މި ކެމްޕޭންގެ ތެރެއަށް ޝާހްރުކް ގެނެވުމަކީ ލިބުނު ވަރަށް ބޮޑު ފަހުރެއް އަދި ޝަރަފެއް ވެސްމެ. އެހެންވެ ކެމްޕޭނުގައި ޝާކްރުކް އޭނާގެ އާޓިސްޓިކް ހުނަރަކާ އެކު ކެމްޕޭން ކުރިއަށް ގެންދާނެ ގޮތް ބަލަން އަހަރެމެން އެންމެން މިތީ ވަރަށް ބޮޑަށް ކެތްމަދުވެފައި،" ރޮނަލްޑް ވިދާޅުވި އެވެ.
އިންޓަޕޯލްގެ "ޓާން ބެކް ކްރައިމް" ގެ އެމްބެސަޑަރުންނަށް މީގެ ކުރިން ވަނީ ހޮލީވުޑްގެ އެކްޓަރު ޖެކީ ޗަން އާއި އާޖެންޓީނާގެ މަޝްހޫރު ފުޓްބޯޅަ ތަރި ލައިނަލް މެސީ އާއި ފޯމިއުލާ ވަން ރޭސިންގެ ޗެމްޕިއަނުން ކަމަށްވާ ފާނަންޑޯ އަލޮންސޯ އަދި ކިމީ ރައިކަނެން ހަމަޖައްސައިފަ އެވެ.
ދުނިޔޭގެ 190 ގައުމެއް ބައިވެރިވާ އިންޓަޕޯލްގެ "ޓާން ބެކް ކްރައިމް" ކެމްޕޭނުގައި މަސްތުވާތަކެއްޗާއި ވަގު ފައިސާ ގެންގުޅުމާއި އިންސާނުންގެ ވަގުފާރި އާއި ކޮރަޕްޝަނާއި ކިޑްނެޕް ކުރުމާއި ކުޑަކުދިންނަށް ކުރާ އަނިޔާތަކާ ދެކޮޅަށް މުޅި ދުނިޔޭގައި ވަރަށް ފުޅާކޮށް ކެމްޕޭން ހިންގަން އިންޓަޕޯލުން ވަނީ ނިންމައިފަ އެވެ.
އަދި މި ކެމްޕޭނަށް މީގެ ކުރިން ވެސް ވަރަށް ބޮޑު ތަރުހީބެއް ލިބިފައިވެ އެވެ.