އައްޑޫ ގަމުގެ ދޫގަސް ތަރައްގީ ކުރާނީ 50 ކޮޓަރީގެ ހޮޓަލެއްގެ ގޮތުގައި އެތަން ތަރައްގީ ކުރުމުގެ އެއްބަސްވުމުގައި ވަރަށް އަވަހަށް ސޮއިކުރާނެ ކަމަށް ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ވިދާޅުވެއްޖެ އެވެ.
އޭނަ މިއަދު ކުރެއްވި ޓްވީޓެއްގައި ވިދާޅުވީ ދޫގަސް ތަރަގައްގީކުރަން ހަމަޖެހިފައި ވަނީ ގަން އިންޓަނޭޝަނަލް އެއާޕޯޓް ހިންގާ ކުންފުނި، އައްޑޫ އިންނޭޝަނަލް އެއާޕޯޓް (އޭއައިއޭ) ގައި ހިއްސާވާ ޕްރައިވެޓް ކުންފުނީގެ އެހީތެރިކަމާ އެކީގައި ކަމަށެވެ. އެ ކުންފުންޏަކީ މަޝްހޫރު ވިޔަފާވެރިޔާ ޗަމްޕާ ހަސަން އަފީފުގެ ކާސާ ހޯލްޑިން އެވެ.
ދޫގަސް މަޝްރޫޢުގެ ތެރެއިން ގަމުގައި އިތުރު 50 ކޮޓަރީގެ ހޮޓަލެއް ތަރައްޤީކުރުމަށް ހިމަނާފައިވޭ. އޭ.އައި.އޭގެ ޕްރައިވެޓް ޝެއަރހޯލްޑަރގެ އެހީތެރިކަމާއެކު ފައިސާހަމަޖެހިފައިވާ ދޫގަސް މަޝްރޫޢުގައި ވަރަށް އަވަހަށް ސޮއިކުރެވޭނެ.
— Hamdhan (@Ahmed_hamdhan) June 11, 2023
އެ ކުންފުނީގެ އެހީގައި އެތަން ތަރައްގީކުރާނީ 130 އެނދުގެ ތަނެއްގެ ގޮތުގައި ކަމަށާއި އެ މަޝްރޫއަށް އޭއޭއޭ އިން މިހާރު ކޮންޓްރެކްޓަރަކު ވެސް ހޯދާފައިވާ ކަމަށް ހަމްދާން ވިދާޅުވި އެވެ.
ދޫގަސް ޓޫރިސްޓް ހޮޓަލެއްގެ ގޮތުގައި ތަރައްގީކުރަން އެ އެތަން މިދިޔަ އަހަރު ވަނީ އޭއައިއޭއާ ހަވާލުކޮށްފަ އެވެ. ރައީސް އަބްދުﷲ ޔާމީންގެ ވެރިކަމުގައި ދޫގަހުގައި 120 އެނދުގެ ހޮޓަލެއް ތަރައްގީކުރަން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ވެސް ހަވާލުކުރި އެވެ.
އައްޑޫ އިންޓަރނޭޝަނަލް އެއަރޕޯޓު ކުންފުނިން މިހާރުވަނީ ގަމުގައި ހުންނަ ދޫގަސް އަލުން ތަރައްޤީކުރުމުގެ މަޝްރޫޢުއަށް ކޮންޓްރެކްޓަރެއް ހޯދާފައި. ދޫގަސް ވެގެންދާނީ 130 ކޮޓަރީގެ ޒަމާނީ ހޮޓަލަކަށް.
— Hamdhan (@Ahmed_hamdhan) June 11, 2023
އެކަމަކު އެ މަޝްރޫއުގެ އެއްވެސް މަސައްކަތެއް އެ ކުންފުނިން ކޮޮށްފައެއް ނުވެ އެވެ.
ދޫގަހަކީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ސަރުކާރުގެ ގެސްޓް ހައުސްއެއްގެ ގޮތުގައި ގިނަ އަހަރުތަކެއް ވަންދެން ހިންގި ތަނެކެވެ. އޭރު އެތަން މެނޭޖްކުރަމުން އައީ ކުރީގެ އެޓޯލް މިނިސްޓްރީގެ ދަށުން ހިންގަމުން އައި އައްޑޫ ޑިވެލޮޕްމަންޓް އޮތޯރިޓީ (އޭޑީއޭ) އިންނެވެ.
ނަމަވެސް ނަޝީދުފެ ވެރިކަމުގައި ދެކުނުގެ ދަތުރުފަތުރުގެ ހިދުމަތް ހަވާލުކުރި އެމްވީކޭ އަށް ސަބްސިޑީއެއްގެ ގޮތުގައި 50 އަހަރަށް ދޫގަސް ދީނެވެ. އޭފެ ފަހުން ފެނުނީ ދޫގަސް ހިންގުން ހުއްޓި، ވީރާނާވަމުން ދިޔަ ތަނެވެ. ފަހުން އެތަން ގޭން ރިޓްރީޓްގެ ނަމުގައި ވެސް ދުވަސްކޮޅެއް ވަންދެން ހިންގި އެވެ. އަދި ކާށިދޫ ދާއިރާގެ މަޖިލިސް މެމްބަރު އަބްދުﷲ ޖާބިރުގެ ޖޭ ހޮޓެލްސް އިން ވެސް ދުވަސްކޮޅެއް ވަންދެން ދޫގަހާ ހަވާލުވި އެވެ.
ދޫގަސް އޭއައިއޭއާ ހަވާލުކޮށް، އެތަން ތަރައްގީ ކުރަން މިދިޔަ އަހަރު ބަޔަކާ ހަވާލުކުރަން ސޮއިކުރާނެ ކަމަށް ވެސް އެކި ފަހަރު މަތިން ބުނެފައިވެ އެވެ.