ލޮލަށް ބުރިއެއް ހެރުމާ ގުޅިގެން އިންޑިއާ އިން ސާޖަރީއެއް ހަދަން ގިނަ ދުވަސްތަކަކަށް މަޑުކުރަން ޖެހޭތީ އައްޑޫ މީހަކު އެކަމަށް އާންމުންގެ އެހީ އަށް އެދިއްޖެ އެވެ.
ހިތަދޫ ސިޑްނީގޭ ޢަބްދުﷲ ޢައްސަދު، 38، ގެ ލޮލަށް ބުޅިއެއް ހެރުނީ މިދިޔަ މަހުގެ 30 ވަނަ ދުވަހު ކަންނެލި މަސްވެރިކަމުގައި ގޮސް އުޅެނިކޮށެވެ. އެ ހާދިސާއާ ގުޅިގެން އޭނަ އިމަޖެންސީގައި މާލެ ގެންގޮސް އައިޖީއެމްއެޗްގައި ވެސް ސާޖަރީއެއް ހެދި އެވެ.
ނަމަވެސް ޑޮކްޓަރު ވިދާޅުވެފައި ވަނީ އައްސަދުގެ ލޮލުގެ ހުދު ކަޅީގައިވާ ހުރިހާ ޓިޝޫސްތަކެއް ހަލާކުވެފައިވާ ކަމަށާއި ކަޅު ކަޅީގެ ބައެއް ޓިޝޫތައް ހަލާކުވެފައިވާ ކަމަށެވެ. އެހެންވެ ދެވަނަ ސާޖަރީއެއް ހަދަން ލަފާ ދެއްވާފައިވެ އެވެ.
އައްސަދުގެ އާއިލާ އިން ބުނި ގޮތުގައި އޭނަގެ ލޮލުގެ ފެނުން ގެއްލިދާނެ ކަމުގެ ބިރު ވަރަށް ބޮޑެވެ. އެހެންވެ ލޮލަށް އިތުރު އަވަސް ފަރުވާ ހޯދުމަށްޓަކައި ދެވަނަ ސާޖަރީއެއް ހެދުމަށް އާސަންދައިގެ އެހީގައި އޭނަ މި ވަގުތު ހުރީ އިންޑިއާ ޓްރިވެންޑްރަމްގަ އެވެ. ސާޖަރީ ހަދަން ހަމަޖެހިފައި ވަނީ އެތަނުގެ ލޮލުގެ ހާއްސަ ހޮސްޕިޓަލެއް ކަމަށްވާ ޗައިތަންޔާ ހޮސްޕިޓަލްގަ އެވެ.
އާސަންދައިގެ ދަށުން ބޭސް ފަރުވާގެ ކަންކަން ހަމަޖެހިފައި ވިޔަސް ކުއްލި ގޮތަކަށް ފުރައިގެން ގޮސް ގިނަ ދުވަސްތަކެއް ވަންދެން އިންޑިއާގައި ތިބެން ޖެހުމާ އެކީ އެކަމަށް އައްސަދުގެ އާއިލާ އަށް މާލީ އެހީތެރިކަން ވަނީ ބޭނުންވެފަ އެވެ. އާއިލާ އިން ބުނީ ތަނަވަސްކަން ހުރި ގޮތުން އިންޑިއާގައި ހޭދަކުރާ ދުވަސްތަކުގައި ކެއުމާއި ހުރުމުގެ ކަންކަން ހަމަޖެއްސުމަށް ދަތިތަކެއް ހުރި ކަމަށެވެ. އެހެންވެ ހެޔޮއެދޭ ފަރާތްތަކުގެ އެހީތެރިކަން ބޭނުންވެ އެވެ.
އެހީ ދޭން ބޭނުންވާ ފަރާތްތަކުން އައްސަދުގެ އެކައުންޓަށް ނަންބަރު: 7708383268101 Abdulla Assad ފައިސާ ޖަމާކުރެވިދާނެ އެވެ. އަދި އޭނަގެ ވައިބާ ނަމްބަރަކީ 7598353 މިއީ އެވެ.