މަަރަދޫ ޔޫތު ސެންޓަރު ހަދަން އަލުން ބީލަމަށް

އައްޑޫ މަރަދޫގައި ކޮމިއުނިޓީ ސެންޓަރެއް ނުވަތަ ޔޫތު ސެންޓަރަށް ހަދަން އައްޑޫ ސިޓީ ކައުންސިލުން ބީލަމަށް ހުޅުވާލައިފި އެވެ.

މި މަސައްކަތް އެންމެ ފުރަތަމަ ބީލަމަށް ލީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ޔޫތު މިނިސްޓްރީންނެވެ.

ކައުންސިލުން ބުނީ މަރަދޫ ކޮމިއުނިޓީ ސެންޓަރު ޑިޒައިން އެންޑް ބިލްޑް އުސޫލުން ހަދައިދޭން ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ 9 އާ ހަމައަށް ހުޅުވާލާފައިވާ ކަމަށެވެ. ބީލަމުގައި ބައިވެރިވާން 300ރ. ގެ ފީއަކާ އެކީ ރަޖިސްޓްރީވާން ވެސް ޖެހެ އެވެ. ރަޖިސްޓްރީވުމުގެ ފުރުސަތު ހުޅުވާލާފައި ވަނީ މިއަދުން ފެށިގެން މި މަހުގެ 21 އާ ހަމައަށެވެ.

އަދި މިކަމާ ބެހޭ ގޮތުން މައުލޫމާތު ދޭން ބާއްވާ ސެޝަނެއް މި މަހުގެ 22 ވަނަ ދުވަހުގެ ހެނދުނު 11:00 ގައި ކައުންސިލް އިދާރާގައި އޮންނާނެ އެވެ. އެ ސެޝަންގައި ބައިވެރި ނުވާ ފަރާތްތަކަށް ބީލަން ހުށަހެޅުމުގެ ފުރުސަތެއް ނުލިބޭނެ އެވެ.

މަރަދޫ ކޮމިއުނިޓީ ސެންޓަރު ހަދަން ބީލަން ހުށަހަޅާ ފަރާތްތަކުން ބިޑް ސެކިއުރިޓީގެ 20،000ރ. ހުށަހަޅަން ޖެހެ އެވެ. ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 120 ދުވަހެވެ.