ޝަރުއީ ދާއިރާގެ މުވައްޒަފުންނަށް ޕާޓީތަކުގެ އިންތިހާބުތަކުގައި ވޯޓްވެސް ލެވޭ ގޮތަށް އުސޫލުތައް ބަދަލުކޮށް، ސިޔާސީ ދާއިރާގައި އުޅެވޭނެ މަގުފަހިކޮށް ދީފި އެވެ.
މިހާތަނަށް އެ ދާއިރާގެ މުވައްޒަފުން އަމަލު ކުރަމުން އަންނަ މުވައްޒަފުންގެ ގަވާއިދުގައި ސިޔާސީ ހަރަކާތްތަކުގައި އެއްވެސް ގޮތަކަށް ބައިވެރިވުމަކީ މަނާ ކަމެކެވެ. އެގޮތުން ސިޔާސީ ޕާޓީއެއްގެ އެއްވެސް މަގާމެއް ފުރުމާއި ވަޒީފާއެއް އަދާ ކުރުމާއި ޕާޓީއެއްގެ ގުނަވަނެއްގެ މެންބަރަކަށްވުމާއި ޕާޓީތަކުން ތައްޔާރުކުރާ ޕެޓިޝަންތަކުގައި ސޮއި ކުރުމާއި ވޯޓްލުންވެސް ޝަރުއީ ދާއިރާގެ މުވައްޒަފުންނަށް މަނަލެވެ. މަނާކޮށްފައެވެ.
ނަމަވެސް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން މިދިޔަ ބުރާސްފަތިދުވަހު އާންމުކުރި ކޯޑް އޮފް ކޮންޑަކްޓްގައިވާ ވަނީ ސިޔާސީ ހަރަކާތްތަކުގައި މުވައްޒަފުން ބައިވެރިވުމާ ބެހޭ ބާބު އުވާލައިފަ އެވެ.
އެ އުސޫލުގައި މިހާރު ވާ ގޮތުން ސިޔާސީ ޕާޓީއެއް ނުވަތަ ސިޔާސީ ހަރަކާތެއް ހިންގާ ޖަމިއްޔާއެއެއް ނުވަތަ ޖަމާއަތެއްގެ މެންބަރަކަށްވުމާއި ޕާޓީއެއްގެ އެތެރޭގެ އިންތިހާބެއްގައި ވޯޓުލުން ޝަރުއީ ދާއިރާގެ މުވައްޒަފުންނަށް މަނަލެއް ނޫނެވެ. އަދި އެ ފުރުސަތު ފަހިކޮށް ދީފައި ވަނީ "ޝަރުއީ ދާއިރާގެ މިނިވަންކަން ދެމެހެއްޓުމާއި އިތުބާރު ހިފެހެއްޓުން" މާއްދާގެ ދަށުންނެވެ.