އުމުރުން އެންމެ 14 އަހަރުގެ ކުއްޖަކަށް މަހުޖަނު އީލޮން މަސްކްގެ ސްޕޭސް އެކްސްގައި ސޮފްޓްވެއާ އިންޖިނިއަރެއްގެ ގޮތުގައި މަސައްކަތް ކުރަން ފުރުސަތު ލިބިއްޖެ އެވެ.
މިއީ ބަންގްލަދޭޝް ދަރިކޮޅުގެ އެމެރިކާގެ ދެމަފިރިއަކަށް ލިބިފައިވާ އާދަޔާހިލާފަށް ވިސްނުން ތޫނު އަދި ޕްރައިމަރީ ގްރޭޑްތަކުގައި ކިޔަވާ އުމުރުގައި ޔުނިވަސިޓީއަކުން ގްރެންއޭޓްވެފައިވާ ކައިރާން ގްއާޒީ އެވެ. ސްޕޭސް އެކްސްގެ ދަށުން ކުރިއަށް ގެންދާ ސެޓެލައިޓް އިންޓަނެޓް ވިއުގަ "ސްޓާލިންކް" ގައި މަސައްކަތްކުރަމުގެ ފުރުސަތު އޭނަ ލިބިގެން ދިޔައީ ކެލިފޯނިއާގެ ސަންޓާ ކްލާރާ ޔުނިވަސިޓީ ސްކޫލް އޮފް އިންޖިނިއަރިން އިން އިއްޔެ ކޮމްޕިއުޓާ ސަައިންސްގެ ދާއިރާ އިން އިއްޔެ ގްރެޖްއޭޓްވުމާ ގުޅިގެންނެވެ.
ވޮޝިންޓަންގެ ރެޑްމޮންޑްގައި ހުުންނަ ސްޕޭސް އެކްސްގެ ފެސިލިޓީގައި ކައިޒާން ރަސްމީކޮށް ވަޒީފާ އަދާކުރަން ފަށާނީ އަންނަ މަހުން ފެށިގެންނެވެ. އެގޮތުން ސޮފްޓްވެއާ އިންޖިނިއަރެއްގެ ގޮތުގައި އޭނަ މައިގަނޑު ގޮތެއްގައި މަސައްކަތް ކުރާނީ "ސްޓާލިންކް" ގެ ވިއުގަ އަށް ބޭނުންވާ ސެޓެލައިޓާ ގުޅުން ހުރި މަސައްކަތެވެ.
ސްޕޭސް އެކްސް އިން ލިބުނު ފުރުސަތަކާ އެކީ ކައިރާން ވެފައީ އެ ކުންފުންޏާ ގުޅުނު އެންމެ ޅަ މުވައްޒަފަށެވެ. ދަރިފުޅަށް ލިބުނު ކާމިޔާބީއާ ގުޅިގެން ކައިރާންގެ މައިންބަފައިންނަށް ވެސް ވަނީ ވަރަށް ބޮޑު ލިބިފަ އެވެ. ކައިރާންގެ ބައްޕަ އަކީ ކުޑަކުދިންގެ ހާއްސަ ޑޮކްޓަރެކެވެ. މަންމަ އަކީ ޓީޗަރެކެވެ. ދަރިފުޅަށް ސްޕޭސް އެކްސް އިން ފުރުސަތު ލިބުނީ އެކަމަށް އަމިއްލަ އަށް އެޕްލައިކޮށްގެންނެވެ. އަދި އާންމުކޮށް ލިބުން ފަސޭހަ ފުރުސަތެއް ވެސް ނޫނެވެ.
ހިތްއަލިކަމާއި ލިބިފައިވާ ތޫނު ވިސްނުމުގެ ސަބަބުން ކައިރާން އަކީ އެންމެ ދެ އަހަރުގައި އޭނަގެ ކުޅަދާނަން ދައްކަން ފެށި ކުއްޖެކެވެ. ނަތީޖާއަކަށްވީ ޕްރައިމަރީ ގްރޭޑްތައް "ކަޓުވާލައި ފުންމައިގެން ގޮސް" އެންމެ 9 އަހަރުގައި ކެލިފޯނިއާގެ ލިވަމޯގެ ލަސް ޕޮސިޓަސް ކޮލެޖުން ކައިރާން އަށް މަތީ ތައުލީމު ހާސިލުކުރުމުގެ ފުރުސަތު ވެސް ފަހިވުމެވެ. އެތަނަށް ވަންނަން ހެދި އެންޓްރެންސް ޓެސްޓުން ކައިރާން 99.99 ޕަސެންޓް މާކްސް ވެސް ހޯދި އެވެ.
އޭގެ ފަހުން ތައުމީލީ ރޮނގުން އޭނަ ހޯދަމުން އައި ކުރިއެރުންތަކާ ގުޅިގެން، ކޮމްޕިއުޓަރު ފަދަ ތަކެތި އުފައްދާ މަޝްހޫރު ކުންފުނި އިންޓެލްގެ އާޓިފިޝަލް އިންޓެލިޖެންސް ރިސާޗް ކޯޕަރޭޝަންގައި އިންޓާންއެއްގެ ގޮތުގައި މަސައްކަތްކުރުމުގެ ފުރުސަތު ކައިރާން އަށް ލިބުނެވެ. އެތަނުގައި އޭނަ ހަތަރު އަހަރު މަސައްކަތްކުރި އެވެ. އަދި ކައިރާން ވަނީ ސައިބްސެކިއުރިޓީ ކުންފުންޏެއް ކަމަށްވާ ބްލެކްބާޑް.އޭއައިގައި ވެސް މަސައްކަތްކޮށް ތަޖުރިބާތަކެއް ހޯދައިފަ އެވެ.
ކައިރާން ބުނި ގޮތުގައި އާންމުންގެ ތެރޭގައި އޭނަ އާދަޔާހިލާފު ކުއްޖަކަށް ވިޔަސް އެ އުމުރުގެ އެހެން ކުދިން ކޮށް އުޅޭ ކަންތައްތައް ކޮށް އުޅެ އެވެ. އޭގެ ތެރޭގައި ވީޑިއޯ ގޭމް ކުޅުން ފަދަ ކަންކަން ހިމެނެ އެވެ. ކައިރާންގެ ފެވަރިޓް ގޭމަކީ "އެސަސިން ކްރީޑް" އެވެ.
އޭނަ ކިޔައިދިން ގޮތުގައި އަބަދު ވެސް ކިޔުންތެރިކަމަކީ ހަޔާތުގެ ވަރަށް ބޮޑު ބައެކެވެ. އެގޮތުން ސައިންސް ފިކްޝަން ލިޔުންތެރިޔާ ފިލިޕް ކޭ ޑިކްގެ ފޮތްތަކާއި ވިޔަފާރި ޚަބަރުތަކަށް ހާއްސަ ނޫސްވެރިޔާ މައިކަލް ލުވިސްގެ ލިޔިންތައް ވަރަށް ގިނައިން ކިޔާ ކަމަށް ކައިރާން ބުންޏެވެ.
"ވަރަށް އުފާވެއްޖެ ސްޕޭސް އެކްސްގައި މަސައްކަތްކުރަން ފުރުސަތު ލިބުނީމަ. އަހަރެން ސާބިކޮށް ދޭން ބޭނުން ވަނީ ކަމެއް ހާސިލުކުރަން ބޭނުންވާ ނަމަ އެކަމަކާ ދިމާއަށް މަސައްކަތްކުރާ ކޮންމެ މީހަކަށް ވެސް ބައިވަރުތައް ދޮރުތައް ހުޅުވޭނެކަން،" އެލްއޭ ޓައިމްސް އަށް ކައިރާން ބުންޏެވެ. "ބޭނުން ވަނީ އަހަރެން ކަހަލަ އެތައް ބަޔަކު ކުރިއަރައިގެން ދާން. އަހަރެން ގަބޫލު ކުރަނީ ސްޕޭސް އެކްސް އިން އަހަންނަށް ފަހިވި ފުރުސަތުގެ ސަބަބުން ކުރިއަށް އޮތް ތަނުގައި އެތައް ބަޔަކަށް ދޮރުތައް ހުޅުބިގެން ދާނެ ކަމަށް."
ދެން ސަމާސާއަކަށް ހަދާފައި ކައިރާން ބުނީ މިހާރު ތައްޔާރު ވަނީ ޖީންސާއި ޓީޝާޓް ލައިގެން ހަގީގީ އިންޖިނިއަރެއްގެ ގޮތުގައި ސްޕޭސް އެކްސްގައި ރަސްމީކޮށް ވަޒީފާ އަށް ނުކުންނަން ކަމަށެވެ.
"މި ލިބުނު ފުރުސަތަކަށްޓަކައި އަބަދު ވެސް ޝުކުރުވެރިވާނަން." ޒުވާން ވަރުގަދަ ސިކުނޑި ބުންޏެވެ.