މި މަހުގެ ކުރީކޮޅު އައްޑޫގައި ތޫނު އެއްޗަކުން ހަމަލާދީ މަރާލި އަހުމަދު ޝުއައިބްގެ މަރުގެ މައްސަލައިގެ ތަހުގީގު މިހާރު އެއްކޮށްހެން ނިމިފައިވާތީ އެ މައްސަލާގައި ދައުވާކުރަން މި ހަފުތާގައި ފޮނުވާނެ ކަމަށް ފުލުހުން ބުނެފި އެވެ.
މި މަހުގެ ފުރަތަމަ ދުވަހުގެ މަރަދޫފޭދޫ ބްލޫ ސްޓޫ ދެބެއިންގެ މެދުގައި ހިނގި މަރާމާރީއެއްގައި ޝުއައިބް، 27، މަރާލީ އޭނަގެ ކޮއްކޮ ހުސައިން މަވާޒް، 25، އެވެ. ތޫނު އެއްޗަކުން އޭނަ ޝުއައިބަށް ދިން ހަމަލާތަކުގައި ލިބުނު ސީރިއަސް ގެއްލުންތަކަށް ފަރުވާ ދެމުން ދަނިކޮށް މަރުވީ މި މަހުގެ 1 ގަ އެވެ.
މި ހާދިސާއާ ގުޅިގެން ރަށު ތެރޭގައި އަޑު ފެތުރުނީ މަސްތުވާތަކެތި ގަންނަން މަވާޒްގެ ފޯނު ޝުއައިބް ވިއްކައިލުމުން ދެބެއިންގެ މެދުގައި މައްސަލަ ހޫނުވެ މާރާމާރީ ހިންގީ ކަމަށެވެ. އެ ހާދިސާ އަށް ފަހު މަވާޒް އުޅުނީ ފިލައިގެންނެވެ، ނަމަވެސް ހަމަ އެ ދުވަހު އޭނަ ފުލުހުންނާ އަމިއްލަ އަށް ހަވާލުވުމުން، ޝަރީއަތް ނިމެންދެން ހުރީ ބަންދުކޮށްފަ އެވެ.
މިކަމާ ގުޅޭ ގޮތުން ފުލުހުން ބުނީ ބޭބެ މަރާލި ގޮތް މަވާޒް ތަހުގީގަށް ކިޔައި ދައިވާ ކަމަށާއި ތަހުގީގަށް ލިބުނު ކުރިއެރުންތަކާ އެކީ ތަހުގީގު އެއްކޮށްހެން ނިމިފައިވާ ކަމަށެވެ. އަދި މަވާޒްގެ މައްޗަށް ދައުވާކުރަން ޕްރޮސެކިއުޓަ ޖެނެރެލް (ޕީޖީ) އަށް މި ހަފުތާގައި ފޮނުވާނެ ކަމަށް ވެސް ފުލުހުން ބުންޏެވެ.
ފުލުނުން ބުނީ މި ތަހުގީގާ ގުޅޭ އިތުރު މައުލޫމާތު ވަރަށް އަވަހަށް އާންމުކުރާނެ ކަމަށެވެ.