އައްޑޫގައި ސަރުކާރުން މިހާރު ހިންގަމުން އަންނަ ބިޔަ މަޝްރޫއުތަކުގެ މަސައްކަތްތައް ކުރިއަށްދާ ދުވެލި ހުރީ ރަނގަޅަށް މޭޔަރު އަލީ ނިޒާރު ވިދާޅުވެއްޖެ އެވެ.
ހަންކެޑެ ބްރިޖްގެ މަސައްކަތް ކުރިއަށްދާ ގޮތް އިއްޔެ ބައްލަވާލައްވައި އޭނަ ކުރެއްވި ޓްވީޓެއްގައި ވިދާޅުވީ މިސްރާބު ހުރީ އައްޑޫ ޒަމާނީ ސިޓީއަކަށް ބަދަލުކުރުމަށް ކަމަށެވެ.
"އައްޑޫގެ ބިޔަ ބޮޑެތި ޕްރޮޖެކްޓް ތަކުގެ ސްޕީޑް ހުރީ ރަނގަޅަށް،" ނިޒާރު ވިދާޅުވި އެވެ. "މިސްރާބު ހުރީ ޒަމާނީ ސިޓީއެއްގެ ހުރިހާ މަސްދަރުތަކެެއް ހަމަކޮށް އައްޑޫގައި މިނިވަން އިގުތިސާދެއް ބިނާކުރުން."
ހަންކެޑެ ބްރިޖް 01 ގެ ޑެކް ސްލެބްގެ ކޮންކުރީޓް އަޅަން ފެށުން. އައްޑޫގެ ބިޔަ ބޮޑެތި ޕްރޮޖެކްޓް ތަކުގެ ސްޕީޑް ހުރީރަގަޅައް. މިސްރާބު ހުރީ ޒަމާނީ ސިޓީއެއްގެ ހުރިހާ މަސްދަރުތަކެެއް ހަމަކޮއް އައްޑޫގައި މިނިވަން އިގްތިސާދެއް ބިނާކުރުން. ޝުކުރިއްޔާ @ibusolih pic.twitter.com/KWjZ5cLNuz
— Ali Nizar (@DhekunuNizar) June 20, 2023
ހަންކެޑެ އިންޓަގްރޭޓެޑް ޓޫރިޒަމަށް ތަރައްގީކުރަން ނިންމުމާ ގުޅިގެން އައްޑޫ ލިންކް ރޯޑުން ގުޅިފައި އޮތް ހަންކެޑެ ބްރިޖް ބަދަލުކުރަން ނިންމައި އެ މަސައްކަތް ކުރިއަށް ގެންދަނީ އައްޑޫގެ މަގު ހެދުމުގެ މަޝްރޫއުގެ ތެރެއިން އިންޑިއާގެ އެފްކޮންސްއިންނެވެ.
އަލަށް ހަދާ ބްރިޖާ އެކީ ހަންކެޑެ ދެން ގުޅޭނީ އަދި ކުރިއަށް އޮތް ތަނުގައި ދަތުރުކުރާނީ މަރަދޫގެ ބޮޑު މަގާ ދިމާލުން ގުޅުވައިލާ ސަރަހައްދުންނެވެ. މި ބްރިޖްގެ ބޮޑެތި ގިނަ މަސައްކަތްތައް ހުރީ ނިމުމަކާ ހަމައަށް ވަނީ އައިސްފަ އެވެ.
ހަންކެޑެ ބްރިޖް 01 ގެ ޑެކް ސްލެބްގެ ކޮންކުރީޓް އަޅަން ފެށުމާއި ގުޅިގެން އެމަސައްކަތް ބައްލަވާލެއްވުމަށް އައްޑޫސިޓީގެ މޭޔަރ ޢަލީ ނިޒާރު ، ޑެޕިއުޓީ މޭޔަރ މުޙައްމަދު ޝުޢާއު އަދި ކައުންސިލްގެ އެސް.ޖީ މުހައްމަދު ޝުޖާއު ކުރެއްވި ޒިޔާރަތުގެ ތެރެއިން. pic.twitter.com/31fu1NMGKh
— Addu City Council (@AdduCityCouncil) June 20, 2023
ސަރުކާރުން އައްޑޫގައި ހިންގާ ބޮޑެތި މަޝްރޫއުތަކުގެ ތެރޭގައި ބިން ހިއްކުން ވެސް ހިމެނެ އެވެ. މީގެ ތެރެއިން ޓޫރިޒަމަށް ހާއްސަކޮށްގެން ރަށްތަކެއް ވެސް ހިއްކަ އެވެ. އަދި އައްޑޫ ގަން އިިންޓަނޭޝަނަލް އެއާޕޯޓް ތަރައްގީކުރުމުގެ މަޝްރޫއު ވެސް މި މަހުގެ ތެރޭގައި ރައީސް އިބްރާހީމް މުހައްމަދު ސޯލިހު ވަނީ ފައްޓަވައިފަ އެވެ. އެ މަސައްކަތް ހަވާލުކޮށްފައި ވަނީ އިންޑިއާގެ ރެނާޓަސްއާ އެވެ.
ސަރުކާރުން ބުނެފައި ވަނީ ތަރައްގީގެ ބޮޑެތި މަޝްރޫއުތަކާ އެކީ އައްޑޫ ބަދަލުވެގެން ދާނީ ހަގީގީ ފުރިހަމަ ސިޓީއަކަށެވެ.