ޖުމްހޫރީ ޕާޓީ (ޖޭޕީ) އަށް ރާއްޖޭގެ ވެރިކަމަށް އައުމުގެ ފުރުސަތު ދޭން ޖެހޭ ކަމަށާއި އެ ފުރުސަތު ދީފި ނަމަ އެ ޕާޓީގެ ކެންޑިޑޭޓް ގާސިމް އިމްރާހީމަކީ ރައްޔިތުން މާޔޫސްކޮށް ނުލާނެ ވެރިއަކަށް ވާނެ ކަމަށް ދާދި ފަހުން ޖޭޕީއާ ގުޅިވަޑައިގަތް ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެ އެވެ.
ގާސިމްގެ ވީޓީވީގައި ރޭ ހައިލަމް ވިދާޅުވީ ރާއްޖޭގެ ވަރަށް ގިނަ ޕާޓީތަކުގެ ވެރިކަން މިހާރު ދިވެހިން ތަޖުރިބާކޮށްފި ކަމަށާއި އެ ޕާޓީތަކުގެ ފަރާތުން ވެރިކަން ކުރެއްވި ބޭފުޅުން ވައުދުތަކާ ހިލާފުވެފައިވާ ކަމަށެވެ.
އައްޑޫ ހިތަދު އަށް ނިސްބަތްބާ ހައިލަމް ވިދާޅުވި ގޮތުގައި ރައްޔިތުން މި ފަހަރު ޖޭޕީ އަށް ފުރުސަތު ދިނުމަކީ ވަރަށް މުހިއްމު ބޮޑު ބަދަލަކަށް ވާނެ އެވެ. އޭގެ ސަބަބުން ރާއްޖޭގެ ހުރިހާ ދާއިރާއަކަށް ބޮޑެތި ކުރިއެރުންތަކެއް އަންނާނެކަމާ ދޭތެރޭ އެއްވެސް ޝައްކެއް ވެސް ނެތް ކަމަށް ވިދާޅުވި އެެވެ.
ހައިލަމް ވިދާޅުވީ ދިވެހިން އެންމެ ކަންބޮޑުވާ އެއް މައްސަލަ ކަމަށްވާ ރާއްޖޭގެ ޝަރުއީ ދާއިރާ އަށް ވެސް ގާސިމަށް ވެރިކަން ދީފި ނަމަ ބޮޑު އިސްލާހީ ބަދަލަކާއި ކުރިއެރުންތަކެއް ގެނެސްދެއްވާނެ އެވެ. އޭނަ ފާހަގަކުރެއްވި ގޮތުގައި ގާސިމަކީ އެތައް ރޮނގަތަކުން ތަޖުރިބާ އާއި ކުރިއެރުން ހޯއްދަވާފައި ބޭފުޅަކަށްވާތީ، ގާސިމްގެ ތަޖުރިނާ އަކީ ރާއްޖޭގެ ކުރިއެރުމަށް ވަރަށް މުހިއްމު ކަމެއް ވިދާޅުވި އެވެ.
އެގޮތުން ރައްޔިތުންނަށް އިޖުތިމާއީ ގޮތުންނާއި އިގްތިސާދީ ގޮތުން ވެސް ރަނގަޅު ދިރިއުޅުމެއް ލިބޭނީ ގާސިމު ވެރިކަމަށް ގެނެސްގެން ކަމަށް ހައިލަމް ވިދާޅުވި އެވެ.
"ރައްޔިތުން އެބަޖެހިވަޑައިގަންނަވާ އާ ތަޖުރިބާއެއް ކުރައްވަން، ތަޖުރިބާ ކުރަން ޖެހޭ ބޭފުޅަކީ ކޮންމެ ގޮތެއް ވިޔަސް ޖުމުހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް،" އޭނަ ވިދާޅުވި އެވެ. "ގާސިމަށް ރައްޔިތުން އިތުބާރު ކުރަން ޖެހޭ ސަބަބަކީ ގާސިމަކީ ސިޔާސީ މައިދާނުގައި ހުރިހާ ދާއިރާއަކުން ވެސް ތަޖުރިބާ ލިބިވަޑައިގެން ހުންނެވި ބޭފުޅެއް ކަމަށްވީމަ."
ހައިލަމް ވިދާޅުވީ ގާސިމަށް ފުރުސަތެއް ދީ ނަމަ ރައްޔިތުންގެ މާޔޫސްކޮށް ނުލާނެކަމުގެ ފުރިހަމަ ޔަގީންކަން ވެސް އޮތް ކަމަށެވެ.