މި އަހަރުގެ ރިޔާސީ އިންތިހާބުގައި ވާދަކުރަން ބޭނުންވާ ފަރާތްތަކަށް ނަން ހުށަހެޅުމުގެ ފުރުސަތު އަންނަ މަހުގެ 23 ގައި ހުޅުވައިލަން ނިންމައިފި އެވެ.
އިލެކްޝަން ކޮމިޝަން (އީސީ) ގެ ނައިބު ރައިސް އިސްމާއީލް ހަބީބު ކުރެއްވި ޓްވީޓެއްގައި ވިދާޅުވީ އިންތިހާބަށް ކުރިމަތިލާން ބޭނުންވާ ފަރާތްތަކުގެ ނަންތައް ބަލައިގަންނާނީ އޮގަސްޓް 7 އާ ހަމައަށް ކަމަށެވެ. އިންތިހާބަށް ވާދަކުރަން ނަން ހުށަހެޅުމުގެ ފުރުސަތު މި ފަހަރު މި ވަނީ 14 ދުވަހަށް އިތިރުކޮށްފަ އެވެ. ކުރިން އެ މުއްދަތު ދެމުން އައީ 10 ދުވަހަށެވެ.
ހަބީބު ވިދާޅުވީ ރިޔާސީ އިންތިހާބުގެ ގާނޫނަށް ގެނައި ބަދަލުގެ ސަބަބުން، ކެންޑިޑޭޓުންގެ ނަން ތަރުތީބުކުރާ ތާރީޚަށް ބަދަލެއް ނާންނާނެ ކަމަށެވެ. އަދި އިންތިޚާބުގެ މުހިންމު ތާރީޚުތައް ކޮމިޝަނުން ކަނޑައަޅާފައި ވަނީ، ގާނޫނަށް ބަދަލު އަތުވެދާނެ ކަމަށް ވިސްނައިގެން ކަމަށް ވެސް ވިދާޅުވި އެވެ.
ރިޔާސީ އިންތިޚާބު 2023 އަށް ކުރިމަތިލާ މީހުންގެ އެޕްލިކޭޝަން، އިންތިހާބާބެހޭ މަރުކަޒު (ދަރުބާރުގެ) އަށް، އީސީ އިން ބަލައިގަންނާނީ، ޖުލައި 23 ވާ އާދީއްތަ ދުވަހުން ފެށިގެން، އޮގަސްޓް 7 ވާ ހޯމަދުވަހު ގެ ނިޔަލަށް.
ރިޔާސީ އިންތިހާބުގެ ގާނޫނަށް، (އެޕްލިކޭޝަން ބަލައިގަތުުގެ… pic.twitter.com/QY2jzwhOry— Ismail Habeeb (@IsmailHabeeb) June 24, 2023
އިންތިހާބަށް ކުރިމަތިލާ ކެންޑިޑޭޓުންގެ ނަންތަކުގެ މެދުގައި ގުރުއަތުލުން އޮންނާނީ، ކެމްޕޭން ކުރުމަށް 30 ދުވަސް ލިބޭ ގޮތަށް، އޮގަސްޓް 9 ވާ ބުދަ ދުވަހު ކަމަށް ވެސް އީސީން ބުންޏެވެ.
މި އަހަރުގެ ރިޔާސީ އިންތިހާބުގައި ވާދަކުރައްވަން އިއުލާންކުރައްވާފައިވާ ބޭފުޅުންގެ ތެރޭގައި މިހާރުގެ ރައީސް އިބްރާހީމް މުހައްމަދު ސޯލިހާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އެމްއެންޕީގެ ރައީސް ކާނަލް މުހައްމަދު ނާޒިމާއި ކުރީގެ ހޯމް މިނިސްޓަރު އުމަރު ނަސީރުގެ އިތުރުން ކުރީގެ އެޓާނީ ޖެނެރަލް ޑރ. މުހައްމަދު މުނައްވަރު ވެސް ހިމެނެ އެވެ.
މީގެ އިތުރުން ކުރީގެ ރައީސް އަބްދުﷲ ޔާމީނަށް ޕީޕީއެމް/ޕީއެންސީގެ ރިޔާސީ ޓިކެޓް އެރުވި ނަމަވެސް އެ މަނިކުފާނު ގެންދަވަނީ 11 އަހަރުގެ ޖަލި ހުކުމެއް ތަންފީޒު ކުރައްވަމުންނެވެ.
އަލަށް އުފައްދަން ހުށަހަޅާފައިވާ ޕާޓީ ދަ ޑިމޮކްރެޓްސް އިން ބުނެފައިވާ ގޮތުގައި އެ ޕާޓީން ވެސް އިންތިހާބަށް ކެންޑިޑޭޓަކު ނެރޭނެ އެވެ. އެ ޕާޓީ އަކީ އެމްޑީޕީގެ ކުރީގެ ރައީސް މުހައްމަދު އިސްކޮށް ހުންނަވައިގެން އުފައްދަވާ ޕާޓީއެކެވެ.
މި އަހަރުގެ ރިޔާސީ އިންތިހާބު އޮންނާނީ ސެޕްޓެމްބަރު 9 ގަ އެވެ.