ދައުލަތުން ބޮޑު ހަރަދެއްކޮށްގެން އިމާރާތް ކުރި އިކުއިޓޯރިއަލް ކޮންވެންޝަން ސެންޓަރު ވީރާނާވެ، ނެތިގެން ދަނީއެވެ. އެކަމާއި ސަރުކާރުން އަޅާލާކަށް ބޭނުމެއް ނޫނެވެ.
އައްޑޫގައި ހުރި ކޮންވެންޝަން ސެންޓަރާއި އެތަނުގެ ވަށައިގެންވާ ސަރަހައްދު ބޯ ޖަންގައްޔައް ވެގެންދާއިރު ދައުލަތުގައި އެކަމަށް ހަރަދުކޮށްލާނެ އެންމެ ފައިސާ ފޮއްޗެއްވެސް ނެތެވެ. އެކަމަކު ދާދި ފަހުން ވަނީ މާލޭ ދަރުބާރުގެ ބޮޑު ހަރަދެއްކޮށް މަރާމާތު ކޮށްފައެވެ.
އީސީސީ މަރާމާތު ނުކުރެވި އެތަން ވީރާނާވަމުންދާތީ، ސަރުކާރުގެ ސަމާލުކަމަށް ގެނައުމަށް ހިތަދޫ ދެކުނު ދާއިރާގެ މަޖްލިސް މެމްބަރު އަލީ ނިޒާރު، ހޯމް މިނިސްޓަރު، ޑރ. މުއިއްޒު މަޖްލިސްއަށް ހާޒިރުކޮށް ސުވާލު ކުރުމުން ވެރިކަން ކުރާ ޕާޓީން ވަނީ އެބައްދަލުވުން ހަލަބޮލިކޮށްފައެވެ.
ރައީސް ވަހީދުގެ ސަރުކާރުގައި ވެސް ހައުސިން މިނިސްޓަރުކަން ކުރެއްވި ޑރ. މުއިއްޒުގެ ބެއްލެވުމުގެ ދަށުން އީސީސީ ވީރާނާކޮށްލި ކަން ޔަޤީންނެވެ. އެތަނަށް ގެނެސްފައި ހުރި ފަރުނީޗަރުތައް ވީ ހިސާބެއް އެނގޭ މީހަކު ސަރުކާރުގައި ހުރިހެނެއް ހީނުވެއެވެ.
އެމްއެންޑީއެފްއިން ސެކުރިޓީ ބަލަހައްޓަމުން ގެންދާ އީސީސީގެ ފަރުނީޗަރުތައް އެމްއެންޑީއެފް އިން ތަފާތު ހަފްލާތަކަށް ގެންގޮސް ދޭހާ އައްވަކާއި ވެހޭ ވާރާތެރޭގައި ބޭނުންކޮށް ވީރާނާކޮށްލާފައިވާ ކަން ޔަޤީންއެވެ. އެކަން ސަރުކާރުގެ ސަމާލުކަމަށް އައިސްފައި ނުވާކަންވެސް ޔަޤީންނެވެ.
ސިފައިންގެ 121 ވަނަ އަހަރީ ދުވަސް ފާހަނގަ ކުރުމަށް ގަމުގެ ސަދަން އޭރިއާ ކޮމާންޑްގައި ބޭއްވި ބައްދަލުވުމުގައި، އީސީސީގެ ހޯލުގައި ބޭނުންކުރި ސްޕޮންޖް ގޮޑިތައް ކުއްލިއަކަށް ވެހިގަތް ވާރޭގައި ވަނީ ތެމިފޯވެފައެވެ.
އޭގެ ފަހުން މޭއި މަހު ހިތަދޫ ޒޯން ސްޓޭޑިއަމްގައި ބޭއްވި އޭއެފްސީ ޗެލެންޖް ކަޕްގައި ބޭނުން ކުރުމަށް އެތަނުގެ ވިއައިޕީގައި ބޭނުންކުރި ފަރުނީޗަރު ގެންގޮސް އެހުރިހާ އެއްޗެއް ތިބީ ވާރެއާއި އައްވަށް ދޫކޮށްލާފައެވެ.
މިއަދު އޭގެތެރެއިން ގިނަ ގޮޑިތަކުގެ ފޮތިތައް ހުރީ، ފީވެފައެވެ. ގިނަ ފަރުނީޗަރު ހުރީ އެކި ދިމަދިމާލަށް ގެންގޮސްފައެވެ. އެތަނުގެ އިންވެންޓަރީ އޮތީ ކޮންތާކުކަން އެގޭ މީހަކު ނެތެވެ.
ޔަގީންވާ އެއްކަމަކީ ދައުލަތުން ބޮޑު ހަރަދެއް ކޮށްގެން ހަދާފައިވާ މި އިމާރާތް އައްޑޫގައި ހުރުމަށް ނޭދޭ ބަޔަކު ސަރުކާރުގައި ތިބި ކަމެވެ. އެހެން ނޫންނަމަ މިހާ ދުވަސްވެގެން ދިޔަ އިރު މިތަން މާރާމާތު ކުރީސްއެވެ.
ކޮންވެންޝަން ސެންޓަރަށް، ބޭރުގެ "ބިޔަ" ފަރާތްތަކުން ޝައުގުވެރިވިިކަމަށް ޓޫރިޒަމް މިނިސްޓަރ އަހްމަދު އަދީބް ވިދާޅުވިއެވެ. އަދި އައްޑޫގެ ފަތުރުވެރިކަމުގެ ޕްލޭން މިއަހަރު ޖޫން މަހު ލޯންޗް ކުރައްވާނެކަމަށް ވިދާޅުވިއެވެ. އެގޮތުން އައްޑޫގެ ޓޫރިޒަމް ޕްލޭން ހެދިގެންދައިރު، ކޮންވެންޝަން ސެންޓަރާއި، ހަންކެޑެ، އަދި އިސްމެހެލާ ހެރައިގެ އިތުރުން އައްޑޫގެ ބައެއް ފަޅުތައް ހިއްކުމަށް ޕްލޭން ކޮށްފައިވާ ކަމަށް އަދީބް ވިދާޅުވިއެވެ.
ސަރުކާރުން އައްޑޫ ތަރައްޤީ ކުރާނެ ކަމަށް ބުނެ އަދި މުޅިންވެސް ދައްކަނީ އޮށްޓަރެއް ނެތް ހުސް ވާހަކަ ތަކެވެ. އީސީސީ ފަދަ އިމާރާތް އައްޑޫގައި ހުރެ، އެތަންތަން ވީރާނަވެ ނިމިގެންދާއިރު އަޅާނުލުމުން ސަރުކާރުން އައްޑޫއަށް ދޭ އިސްކަން ފެނިގެންދެއެވެ.
"އަޅުގަނޑަކަށް މާލެއާއި އަތޮޅުތެރެއާއި އެއްވެސް ތަފާތެއް ނޯއްނާނެ" ކަމަށް ރައީސް ޔާމީން ވިދާޅިވިއަސް އެކަން މިދަނީ ރައްޔިތުންނަށް ފެންނަމުންނެވެ. ތަފާތެއް ނެތް ނަމަ އައްޑޫގައި ހުރި ކޮންވެންޝަން ސެންޓަރު ސިފައިން ނެރެގެން ނަމަވެސް ސާފުކޮށް މަރާމާތު ކުރުވީހެވެ.
ސަރުކާރުން އިތުރު ބޮޑު ހަރަދެއް ނުކޮށް، އޮލިމްޕަސް ސިނަމާ އާއި، "ރަމްޒީ ބްރިޖް" ސިފައިން ލައްވާ ހެއްދި ގޮތަށް އީސީސީވެސް ފުރަތަމަ ދުވަހުން ފެށިގެން ސިފައިންގެ ބެލުމުގެ ދަށުން ބެލެހެއްޓުނީހެވެ.
ދައުލަތުގައި ވަސީލަތްތައް ހުރެ އީސީސީ ވިރާނާވެގެން މިދަނީ ސަރުކާރުގެ ސީދާ އިހްމާލުންކަން "ޔަޤީން"އެވެ.