ޖުމްހޫރީ ޕާޓީ ޖޭޕީ) ގެ ލީޑަރު ގާސިމް އިބްރާހިމް އިއްޔެ ރައީސް އިބްރާހީމް މުހައްމަދު ސޯލިހު އިސްތިއުފާ ދެއްވާފައި ގެއަށް ކަނޑާލާންވީ ކަމަށް ވިދާޅުވެ ބަހުގެ ހަމަލާތަކެއް ދެއްވި އިރު އެ ޕާޓީގެ ގިނަ ބަޔަކު ސަރުކާރުގެ އެކި މަގާމުތަކުގައި ތިބޭތީ އަމާޒުވާ ފާޑުކިޔުންތައް ވެސް ގިނަ އެވެ.
އޭގެ ތެރޭގައި މިނިސްޓަރުން ވެސް ހިމެނެ އެވެ. ކެބިނެޓްގައި ޖޭޕީގެ ތިން މިނިސްޓަރަކު އެބަތިއްބެވި އެވެ. އެއީ ޓްރާންސްޕޯޓް މިނިސްޓަރުގެ މަގާމުގައި ހުންނެވި ގާސިމްގެ އަނބިކަނބަލުން އައިޝަތު ނަހުލާ އާއި ޓޫރިޒަމް މިނިސްޓަރު ޑރ. އަބްދުﷲ މައުސޫމް އަދި ފިޝަރީޒް މިނިސްޓަރު ޑރ. ހުސައިން ރަޝީދު ހަސަނެވެ. މައުސޫމް ވަނީ ގާސިމް ރިޔާސީ އިންތިހާނުގައި ވާދަކުރައްވަން ނިންމެވި ހިސާބުން ރައީސަށް ތާއީދުކުރަން ނިންމަވައިފަ އެވެ.
Qasim anhenunnaai, political post thakuga thibi JP kudhin kolhu magaamuga bagudi nubahdhaa ge ah kandaalaa.
— Ahmed Athif (@Ahmed_Athif) June 24, 2023
ސްޓޭޓް މިނިސްޓަރުންގެ ގޮތުގަ އާއި ދައުލަތުގެ އެކި އިދާރާތަކުގެ ސިތާސީ މަގާމުތަކުގައ ޖޭޕީގެ ގިނަ މެމްބަރުންތަކެއް އެބަތިއްބެވެ. އަދި ރައީސްގެ ނައިބު ރައީސް ފައިސަލް ނަސީމު ވެސް ނިސްބަތް ވަނީ ޖޭޕީއަށެވެ. އެކަން އެހެން އޮއްވައި ރައީސް ގެއަށް ކަނޑާލަން ގާސިމު ވިދާޅުވުމުން ބައެއް މީހުން ދަނީ އެކަމަށް ފާޑު ކިޔަމުންނެވެ.
ރިޔާސީ އިންތިހާބަށް ވާދަކުރައްވާ ކެންޑިޑޭޓެއްގެ ޕާޓީގެ މެމްބަރުން ސަރުކާރުގެ މަގާމުތަކުގައި ތިބި ގޮތަށް ބައިތިއްބާފައި ރައީސް ގެއަށް ކަނޑާލަން ގޮވާލުމުގެ އިތުރަށް ގާސިމު އިއްޔެ ވަނީ ޕާޓީން މި ފަހުން ވަކިވި ބައެއް މެމްބަރުންނަށް ވެސް ވަރަށް ބޮޑަށް ފާޑު ވިދާޅުވެފަ އެވެ. އޭނަ ވިދާޅުވި ގޮތުގައި އެ ބޭފުޅުން މަގާމުތަކަށޓަކައި ޕާޓީން ވަކިވީ "ލަދު ހަޔާތްކުޑަކަމުން" ނެވެ.
ރައީސަށް އިޝާރާތްކުރައްވައި ގާސިމް ވިދާޅުވީ މިހާރު މިހާރު ކަންތައް ކުރައްވަނީ މުޅިން ގޯސްކޮށް ކަމަށާއި ގޯހުގެ މައްޗަށް ގޯސް ހައްދަވަނީ ކަމަށެބެ.
"ޅަ އިހަލުން ހަރު އެއްޗެއްހި އަޅަމުން ގޮސް މިހާރު ދެން ނެތް ގޮބޮޅި ވެސް ނާޅާ. ހުރިހާ އެއްޗެއް އަޅާ ނިމެނީ،" ގާސިމަށް ދީފައި އޮތް ރަށެއް ކަމަށްވާ ކ. ވާވެއްދިފަޅު ވިއްކުން އެންޓި ކޮރަޕްޝަން ކޮމިޝަން (އޭސީސީ) އިން ހުއްޓުވާފައިވުމުން އެކަމާ ކޯފާ އިސްކުރައްވައި ރައީސާ ބެހޭ ގޮތުން ވިދާޅުވި އެވެ.
ގާސިމް ވިދާޅުވީ ރައީސް އިތުރު ދައުރަކަށް ކުރިމަތިލެއްވުމުގެ މާނައެއް ވެސް ނެތް ކަމަށާއި ރައްޔިތުންނަށް މިއަދު ކަންކަން ވަރަށް ސާފު ކަމަށެވެ.
"އިޓް އިޒް ޓޫ މަޗް. އިޓް އިޒް މޯ ދޭން އިނަފް. ޔޫ ހޭވް ޓު ގޯ ބެކް. މިހާރު ދާންވީ، ކަނޑާލަންވީ ގެއަށް. ވަރަށް ސާފުކޮށް މި ބުނީ. މިހާރު ކަނޑާލަންވީ ގެއަށް." އޭނަ ވިދާޅުވި އެވެ.
ޖޭޕީގެ މެމްބަރުން ސަރުކާރުގެ މަގާމުތަކުގައި ބައިތިއްބައިގެން ސަރުކާރަށް ދެކޮޅަށް މިހާރު ކެމްޕޭން ކުރައްވަމުން ގެންދަވާ އިރު، މިކަމުގައި ސަރުކާރުން ޖޭޕީއާ ދެކޮޅަކަށް މިހާތަނަށް "ނުކިއްސަރު" ނިންމުމެއް ވެސް ނުނިންމަ އއެވެ. އޭގެ ބަދަލުފައި ސަރުކާރުން ބުނެފައި ވަނީ ރައީސްގެ ސިޔާސަތުތައް ތަންފީޒުކުރަން މަގާމުތަކުގައި ތިބި ޖޭޕީގެ މެމްބަރުން ހުރަސް ނާޅާ ނަމަ އެ މީހުން ސަރުކާރުން ވަކި ކުރުމުގެ އެއްވެސް ވިސްނުމެއް ނެތް ކަމަށެވެ.
ގާސިމް ވެރިކަމަށް ވެރިކަމަށް ވަޑައިގެންނެވުމުގެ ފޯރީގައި ދައްކަވަމުން ގެންދަވާ ވާހަތައް މިހާރު ދެކޮޅު ނުޖެހޭ ކަމަށް ބުނާ މީހުން ވެސް މަދެއް ނޫނެވެ.