ރިޔާސީ އިންތިހާބު ބޯމަތީގައި އޮތް އިރު، އިލެކްޝަން ކޮމިޝަން (އީސީ) މި ވަގުތު އޮތީ ނުކުޅެދޭ ހާލަތެއްގައި ކަމަށް އެ ކޮމިޝަންގެ ރައީސް ފިއާދު ތައުފީގު ވިދާޅުވެއްޖެ އެވެ.
މީޑިއާތަކަށް ދެއްވި އިންޓަވިއުއެއްގައި އޭނަ ވިދާޅުވީ އީސީ މިހާރު އޮތް ހާލަތަކީ އެ ކޮމިޝަންގެ ރައީސަށާއި މެމްބަރުންނަށް ވެސް ލިބޭ ހުތުރެއް ކަމަށެވެ.
ފުއާދު ވިދާޅުވި ގޮތުގައި އަލަށް އުފައްދަން ހުށަހެޅި ދަ ޑިމޮކްރެކްޓްސް އަށް ހުއްދަ ނުދެވި އެކަން މަޑުޖެހުމަކަށް އައީ ކޮމިޝަންގެ މެމްބަރުންގެ އެއްބާރުލުން މިހާރު ނުލިބޭތީ އެވެ. އެގޮތުން ކޮމިޝަންގެ ޖަލްސާތަކަށް ބައެއް މެމްބަރުން ވަޑައިނުގަންނަވާ ކަމަށް ވެސް ވިދާޅުވި އެވެ.
"[އެ ޕާޓީ ރަޖިސްޓްރީކޮށް ދޭން] މިދިޔަ ހަފުތާގެ އާދީއްތަ ދުވަހާ ހަމައަށް ދިޔައިރު އޮތީ އަޅުގަނޑުމެން ޗެކް ކުރަން ޖެހޭ ހުރިހާ ޗެކެއް ކުރެވި ނިމިފަ، އަދި އިތުރަށް އެކަމަކު އެހެން ބޭފުޅުން ބޭނުންފުޅުވީ، އިތުރު ޗެކެއް ކުރަން، އެޗެކް ވެސްކޮށް މިހާރު އޮތީ ނިމިފައި." ފުއާދު ވިދާޅުވި އެވެ.
"އެހެން ނަމަވެސް ޖަލްސާއަށް ބައެއް ބޭފުޅުން ވަޑައިނުގަތުމުގެ ސަބަބުން މިދިޔަ ބުދަ ދުވަހު ވެސް ޖަލްސާ ނުބޭއްވިފައި ވަނީ،" އޭނަ ވިދާޅުވި އެވެ. "އެހެންވީމަ އެ ޕާޓީ އަށް ހުއްދަ ނުދެވި އޮތުމަކީ އަޅުގަނޑު ދެކޭ ގޮތުގައި އެއީ އަޅުގަނޑުމެންގެ ވަރަށް ބޮޑު ވެއްޓުމެއް."
ފުއާދު ވިދާޅުވި ގޮތުގައި ކަމިޝަންގެ ވާޖިބު އަދާކުރުމަށް މެމްބަރުން މިހާރު ތިއްބެވީ ނުކުޅެދިފައި ކަމަށެވެ.
"އެއީ އަޅުގަނޑަށް ވެސް ލިބޭ ހުތުރެއް. އަނެއްކާ ކަމިޝަނުގެ ކޮންމެ މެމްބަރަކަށް ވެސް ލިބޭ ހުތުރެއް." އޭނަ ވިދާޅުވި އެވެ.
އިދިކޮޅުން ދަނީ ސަރުކާރުން އީސީ ނުފޫޒު ފޯރުވައި އެތަން ހިސާރުކޮށްފައިވާ ކަމަށް ވެސް ތުހުމަތުކުރަމުންނެވެ.