ރާއްޖޭގެ ފަހުގެ ތާރީހެއްގައި ފެނިގެން ދިޔަ އެންމެ ހީވާގި އެއް ވަޒީރަކީ، ރުހުން ނުދީ ސަރުކާރުން "ބޭރުކޮށްލި" ޑރ. ޝަކީލާކަން ޔަޤީންއެވެ.
ބަލި ހާލު ބޮޑުވެފައިވާ ސިއްހީ ނިޒާމް ކޮޅަށް ޖެހުމަށް ޑރ. ޝަކީލާވަނީ ބުރަ މަސައްކަތްތަކެއް ކުރައްވާފައެވެ. އެކަމަނާގެ މަަސައްކަތް ބަޔަކު ހުއްޓުވާލީ "ހަޖަމް" ނުކުރެވިގެން ކަމަށް އަޅުގަނޑު ބުނާކަށް ޖެހިލުމެއް ނުވެއެވެ.
ސަރުކާރުގެ ފުރިހަމަ ޢައްލަބިއްޔަތު އޮތް މަޖްލީހަކުން އެކަމަނާއަށް ރުހުން ނުދީ ބޭރުކޮށްލި އެއް ސަބަބަކަށް މިއަދު އައްޑޫގެ ސިއްހީ ހާލަތު ވެއްޓިފައި އޮތް "ފުން ވަޅުގަނޑު" ފުދެއެވެ.
ޑރ. ޝަކީލާގެ ސިއްހީ ހިދްމަތް އައްޑޫއަށް
އައްޑޫގެ ސިއްހީ ހާލަތު ރަނގަޅު ކުރުމަށް އެދެވޭ މަސައްކަތެއް ސަރުކާރުން ނުކުރާ ކަމީ ޝައްކެތް އޮތްކަމެއް ނޫނެވެ. ހިތަދޫގައި އިމާރާތްކޮށްފައިވާ ރީޖަނަލް ހޮސްޕިޓަލް މަރާމާތު ނުކުރެވި، އެތަނުގެ ކަންކަން ބޮއްސުން ލާފައިވަނިކޮށް ހެލްތު މިނިސްޓަރުކަމާއި ހަވާލުވެ ވަޑައިގެން ހޮސްޕިޓަލް މަރާމާތު ކުރުމުގެ މަސައްކަތް ފެއްޓެވިއެވެ. އެގޮތުން އޮޕަރޭޝަން ތިއޭޓަރު ބޮޑުކޮށް ވޯޑުގެ ޖާގަ އިތުރުކުރުމުގެ މަސައްކަތް ފެއްޓެވިއެވެ. ހޮސްޕިޓަލަށް ވަގުތުން ވަގުތަށް ބޭނުންވި އިކުއިޕްމެންޓްވެސް ހޯއްދެވިއެވެ.
ޑައިލިސިސްގެ ހިދްމަތް ހޮސްޕިޓަލުން ފަށައި އެހިދްމަތް މެދު ނުކެޑި ކުރިއަށް ގެންދެވޭނެ އިންތިޒާމް ހަމަޖެއްސެވިއެވެ.
އައްޑޫގައި މީގެ 13 އަހަރު ކުރިން ފެށިގެން އަޅަން ކިޔަމުން ދިޔަ 100 އެނދުގެ ހޮސްޕިޓަލްގެ މަސައްކަތްވެސް ހާއްސަ އިސްކަމެއް ދެއްވައިގެން ދިޔައީ ކުރައްވަމުންނެވެ. އެގޮތުން 28 އެޕްރީލް 2014ގައި ހޮސްޕިޓަލް ޑިޒައިން ކުރުމަށް "ރިޔަން" އާއި އެކު އެއްބަސްވިއެވެ.
މުޅި ރާއްޖޭގެ ސިއްހީ ނިޒާމް ފެއިލްވެފައި ވަނިކޮށް، އެ ނިޒާމް ކޮޅަށް ޖެހުމުގެ މަސައްކަތަކީ އެއް ދުވަހުން ދެދުވަހުން ކުރެވޭނެ މަސައްކަތެއް ނޫނެވެ. ނަމަވެސް ޝަކީލާ ގެންދެވީ ގޮންޖެހުންތަކާއި ކުރިމަތި ލައްވައި މިދާއިރާ ހަރުދަނާ ކުރައްވަމުންނެވެ.
އޮގަސްޓް 11 ވަނަ ދުވަހު "ރުހުން ނުދީ" ޝަކީލާ ބޭރު ކުރެއްވުމަށްފަހު މިހާތަނަށް ހާސިލް ކުރެވުނު ވަކި މޮޅެއް ފެންނާކަށް ނެތެވެ. އައްޑޫގެ ސިއްހީ ކަންކަން މިއަދު މިވަނީ ބޮއްސުންލާފައެވެ. ހިތަދޫ ރީޖަނަލް ހޮސްޕިޓަލް މިއަދު އޮތީ ޝަކީލާގެ އަމިއްލަ ހޮސްޕިޓަލް އައިއެމްޑީސީގައި "އެޑްމިޓް"ކޮށްފައެވެ.
ހޮސްޕިޓަލްގައި އަންހެނުންގެ ޑޮކްޓަރެއް ނުހުންނަ ކޮންމެ ފަހަރަކު އިމަޖެންސީގައި ބަލިމީހާގެ ފުރާނަ ސަލާމަތް ކުރުމަށް "އައް ދިއްކޮށްލަނީ" ޝަކީލާގެ އައިއެމްޑީސީ ހޮސްޕިޓަލްގެ އަންހެނުންގެ ޑޮކްޓަރެވެ. ސްކޭނެއް، އެކްސްރޭއެއް، ނެހެދޭ ކޮންމެ އިރެއްގައި އެ ހިދްމަތް ފޯރުކޮށްދެނީ އައިއެމްޑީސީންނެވެ.
އައި.އެމް.ޑީސީ ހޮސްޕިޓަލަކީ އައްޑޫގައި ދިރިއުޅޭ ރައްޔިތުންނަށް ހިދްމަތް ފޯރުކޮށް ދިނުމުގެ މާތް މަޤްސަދެއްގައި ހުޅުވުނު ހޮސްޕިޓަލެކެެވެ. ގިނަ ގޮންޖެހުންތަކެއް ދިމާވި ނަމަވެސް ހުރިހާ ގޮންޖެހުންތައް ގިރާކުރަމުން މިހާރުވަނީ އައި،އެމް.ޑީ.ސީ ހޮސްޕިޓަލުގެ އެކްސްޓެންޝަން ޕްލޭންގެ ދަށުން އިމާރާތް ބޮޑުކުރުމުގެ މަސައްކަތްތަކާއި، އިތުރު އިކުއިޕްމަންޓްސް އާއި، ޑޮކްޓަރުންނާއި އަދި ތަފާތު ދާއިރާތަކުގެ މީހުން ހޯދުމުގެ މަސައްކަތް ބާރު ސްޕީޑެއްގައި ފަށާފައެވެ.
އައްޑޫގެ ސިއްހީ ހާލަތު ރަނގަޅު ކުރުމަށް ކުރައްވާ މަސައްކަތް އެކަމަނާ ކެބިނެޓްއިން "އެއްލާލިއަސް" ހުއްޓާ ނުލައްވައެވެ. ކެރިގެން އެ ވަޑައިގަންނަވަނީ ކުރިއަށެވެ.
ޑރ.ޝަކީލާ އާއި އައްޑޫގެ ތައުލީމް
އައްޑޫގައި ބައިނަލް އަގްވާމީ ސްކޫލެއް ހިންގުން ވެގެން ދިޔައީ ބޮޑު ގޮންޖެހުމަކަށެވެ. ނަމަވެސް ޑރ. ޝަކީލާގެ އިސްނެންގެވުމުގެ މަތީން ކެންގަރޫ ކިޑްސް އައްޑޫގައި ހުޅުވިއެވެ. ފުރަތަމ ދުވަސްކޮޅު ދިމާވި ހުރަސްތަކާއި ހެދި ކެންގަރޫ ސްކޫލް ހުޅުވައި ކިޔަވާދޭން ފެށީ ޝަކީލާގެ ގެ މޫންލައިޓް ވިލާގައެވެ. މަދު ކުދިން ކޮޅަކާއި އެކު ފެއްޓެވި ސްކޫލަށް މިއަދު އައްޑޫގެ ގުޅިފައިވާ ހުރިހާ ރަށަކުން ކުދިން ކިޔަވަން ދެއެވެ.
އެސްކޫލގެ ޖާގައިގެ ދަތިކަން ހައްލުކޮށް ސްކޫލް އިތުރަށް ތަރައްޤީ ކުރުމުގެ މަސައްކަތްވެސް އެކަމަނާ ހުއްޓާ ނުލައްވައެވެ.
ޑރ. ޝަކީލާ އާއި އައްޑޫގެ ތިމާވެށި
ޑރ. މުހައްމަދު ވަހީދު ހަސަން މަނިކުގެ ސަރުކާރުގައި، އެންވައިރަމެންޓް މިނިސްޓްރަކަށް ހުންނަވައިގެން، ހިތަދޫ އީދިގަލި ކިޅި އިކޯ ޓުރިޒަމްއަށް ތަރައްޤީ ކުރުމުގެ މަސައްކަތް ފައްޓަވައި، އެކަމުގައި އަމަލީ ގޮތުން ބައިވެރިވެވަޑައިގެންނެވިއެވެ.
ރައީސް ވަހީދުގެ ސަރުކާރުގައި އީކޯ ޓުރިޒަމް އައްޑޫގައި ފެށުމަށް އޭރު ކެބިނެޓްގައި ތިއްބެވި ބައެއް ވަޒީރުން ދެކޮޅު ހެއްދެވިއެވެ. ނަމަވެސް ޑރ. ޝަކީލާ ތަންފުކެއްވެސް ދޫ ނުދެއްވިއެވެ.
މިއަދު އީދިގަލި ކިޅި އިކޯ ޓޫރިޒަމްއަށް ތަރައްޤީ ކުރުމުގެ ފުރަތަމަ މަޝްރޫއުގެ މަސައްކަތް ބާރު ސްޕީޑެއްގައި ކުރިއަށްދާ އިރު އެކަން ހަގީގަތަކަށް ހެއްދެވުމުގައި ޑރ. ޝަކިލާ ވަނީ ބުރަ މަސައްކަތްތަކެއް ކުރައްވާފައެވެ. އައްޑޫއަށް ވަޑައިގެން ، ކައުންސިލާއި، ޖަމިއްޔާ ޖަމާއަތްތަކާއި، ޢާއްމު ރައްޔިތުންނާއި ބައްދަލުކޮށް އީކޯ ޓޫރިޒަމްގެ ފައިދާ ރައްޔިތުންނަށް ކިޔާ ދެއްވިއެވެ.
މިފަދަ އެތައް ހިދްމަތްތަކެއް، އައްޑޫ އާއި ދިވެހި ގައުމަށް ކޮށްދެއްވި އަގުހުރި ދަރިއެއް ސިޔާސީ ގޮތުން "ކަތިލައި"، ޑރ.ޝަކީލާގެ އަގުހުރި ހިދްމަތް، ގެއްލުވާލަން ބަޔަކު މަސައްކަތް ކުރަނީ ކޮންމެ ވެސް ބިރެއް ނުވަތަ ކަންބޮޑުވުމެއް ހުރެގެންކަން ޔަޤީންނެވެ.
އަަޅުގަނޑުމެން އައްޑޫ ރައްޔިތުން ޑރ. ޝަކީލާ ބަލައިގަންނަނީ އަގުހުރި ހިދްމަތްތަކެއް ކޮށްދެވި ގައުމީ ބަޠަލެއްގެ ގޮތުގައެވެ.
"ޝުކުރިއްޔާ ޑރ. މަރިޔަމް ޝަކީލާ"